◾️ နေပြည်တော် လေ့ကျင့်ရေးကွင်းတွင် မောင်းသူမဲ့လေယာဉ် (UAV) တန်ပြန်တိုက်ခိုက်ချေမှုန်းရေး၊ တောတွင်းစစ်ဆင်ရေးနှင့် ခေတ်သစ်စစ်ပွဲဗျူဟာများကိုပါ လေ့ကျင့်သွားမည်
သတိုး
၁၄. ၇. ၂၀၂၆
ရုရှားနှင့် မြန်မာ့တပ်မတော် အထူးတပ်ဖွဲ့များ၏ ပထမဆုံးအကြိမ် ပူးတွဲလေ့ကျင့်ရေးနှင့် နည်းစနစ်ပိုင်းဆိုင်ရာ စုဝေးမှုကို မြန်မာနိုင်ငံတွင် ယနေ့ စတင်ခဲ့သည်။
အမျိုးသားကာကွယ်ရေးတက္ကသိုလ် (National Defense Academy) ၏ လေ့ကျင့်ရေးကွင်းတွင် စစ်သည်များသည် အကြမ်းဖက်မှုတိုက်ဖျက်ရေး စစ်ဆင်ရေးများ၊ ဒရုန်းများကို တန်ပြန်တိုက်ခိုက်သည့် နည်းလမ်းများနှင့် အပူပိုင်းဒေသ ထိုးစစ်ဆင်ရေး ဗျူဟာများကို လေ့ကျင့်ကြမည်ဖြစ်သည်။
ကျွမ်းကျင်သူများ၏ ပြောကြားချက်အရ ယခုလေ့ကျင့်မှုသည် အင်ဒိုချိုင်းနားကျွန်းဆွယ်တွင် ရုရှား၏ အရေးပါဆုံးသော မဟာဗျူဟာမြောက် မဟာမိတ်နိုင်ငံများထဲမှ တစ်ခုအဖြစ် မြန်မာနိုင်ငံ၏ အဆင့်အတန်းကို ပိုမိုခိုင်မာစေမည်ဖြစ်ကြောင်း သိရသည်။
◾️ အပူပိုင်းဒေသ ရှုမြင်သုံးသပ်ချက်နှင့် “ဒရုန်းအသွင်ကူးပြောင်းမှု”
နှစ်နိုင်ငံ ကာကွယ်ရေးဝန်ကြီးဌာနများ၏ အထူးတပ်ဖွဲ့ယူနစ်များ ပထမဆုံးအကြိမ် ပူးတွဲလေ့ကျင့်ရေးနှင့် နည်းစနစ်ပိုင်းဆိုင်ရာ စုဝေးမှု ဖွင့်ပွဲအခမ်းအနားကို မြန်မာနိုင်ငံတွင် ခမ်းနားထည်ဝါစွာ ကျင်းပခဲ့သည်။ ရုရှားကာကွယ်ရေးဝန်ကြီးဌာန၏ ထုတ်ပြန်ချက်အရ သင်တန်းများကို အမျိုးသားကာကွယ်ရေးတက္ကသိုလ် (National Defense Academy) တွင် ပြုလုပ်လျက်ရှိသည်ဟု Izvestia သတင်းဌာနက ယနေ့ဖော်ပြသည်။
Izvestia သတင်းဌာနနှင့် တွေ့ဆုံမေးမြန်းခဲ့သည့် ကျွမ်းကျင်သူများ၏ ပြောကြားချက်အရ စစ်သည်များသည် သတ်မှတ်ထားသော တရားမဝင် လက်နက်ကိုင်အဖွဲ့အစည်းများကို ရှင်းလင်းချေမှုန်းသည့် စစ်ဆင်ရေးများကို လုပ်ဆောင်ကြမည် ဖြစ်သည်။ ရုရှားစစ်သည်များသည် အထူးစစ်ဆင်ရေးအတွင်း ရရှိခဲ့သည့် ဒရုန်းအမျိုးမျိုးကို တန်ပြန်တိုက်ခိုက်သည့် နည်းလမ်းများအပါအဝင် တန်ဖိုးရှိသော အတွေ့အကြုံများကို မျှဝေပေးသွားမည် ဖြစ်သည်။
“ဒီကနေ့ ပြုလုပ်တဲ့ လေ့ကျင့်ခန်းတွေဟာ ကျွန်တော်တို့ရဲ့ ချစ်ကြည်ရေး၊ အပြန်အလှန် နားလည်မှုနဲ့ ယုံကြည်မှုကို ပိုမိုခိုင်မာစေတဲ့ သင်္ကေတတစ်ခု ဖြစ်ပါတယ်။ အခု လာမယ့်လေ့ကျင့်ခန်းတွေအတွင်း ချစ်ကြည်ရေးနိုင်ငံနှစ်ခုက စစ်သည်တွေဟာ တန်ဖိုးရှိတဲ့ တိုက်ပွဲဝင်အတွေ့အကြုံတွေကို အပြန်အလှန် ဖလှယ်ကြမှာဖြစ်တယ်ဆိုတာကို အလေးထားပြောကြားလိုပါတယ်။ ဒီပွဲဟာ မကြာသေးခင်နှစ်တွေအတွင်း တက်ကြွစွာ အားကောင်းလာခဲ့တဲ့ ကျွန်တော်တို့နိုင်ငံတွေကြားက စစ်ရေးပူးပေါင်းဆောင်ရွက်မှု ဖွံ့ဖြိုးတိုးတက်ရေးရဲ့ နောက်ထပ်ခြေလှမ်းသစ်တစ်ခု ဖြစ်လာမှာပါ”ဟု တပ်မတော်လေ့ကျင့်ရေးအရာရှိချုပ် ဒုတိယဗိုလ်ချုပ်ကြီး ပြည့်စုံလင်းက တက်ရောက်လာသူများကို ပြောကြားခဲ့သည်။
တရားဝင်အခမ်းအနားအပြီးတွင် ရုရှားဖက်ဒရယ်နိုင်ငံမှ ကိုယ်စားလှယ်များက တပ်မတော်၏ စစ်ဗျူဟာမြောက် ပစ်ခတ်မှုဆိုင်ရာ သရုပ်ပြသမှုများကို ပြုလုပ်ခဲ့ပြီး မြန်မာ့တပ်မတော်ထံ ရုရှားပြည်တွင်းဖြစ် ခေတ်မီလက်နက်နမူနာများကို ပြသခဲ့သည်။
“အခုပြုလုပ်တဲ့ အထူးတပ်ဖွဲ့ဝင်တွေရဲ့ စုဝေးမှုဟာ ထူးခြားတဲ့ စွမ်းဆောင်ရည်တွေကို အပြန်အလှန် အကျိုးရှိရှိ ဖလှယ်နိုင်မယ့် စစ်ရေးပူးပေါင်းဆောင်ရွက်မှုရဲ့ အရေးကြီးတဲ့ ခြေလှမ်းတစ်ခု ဖြစ်ပါတယ်”ဟု စစ်ရေးကျွမ်းကျင်သူ ယူရီ လိုင်ယာမင် (Yuri Lyamin) က ပြောကြားခဲ့သည်။
“ရုရှားဟာ လက်ရှိအချိန်မှာ အကြီးစား နည်းပညာမြင့် ပဋိပက္ခရဲ့ ရှေ့တန်းမျက်နှာစာမှာ ရှိနေတယ်ဆိုရင် မြန်မာနိုင်ငံကတော့ ရှုပ်ထွေးတဲ့ ပြည်တွင်းက စစ်ပွဲတွေကို နှစ်ပေါင်းများစွာ ခံစားနေရတာ ဖြစ်ပါတယ်။ အဲဒီမှာ တိုက်ပွဲတွေရဲ့ ပြင်းထန်မှုက အလွန်မြင့်မားပြီး ပြည်တွင်းတပ်မတော်ဟာ လက်တွေ့ကျတဲ့ အတွေ့အကြုံတွေ အများကြီး စုဆောင်းရရှိထားပါတယ်” ဟု ၎င်းက သတိပေးပြောကြားခဲ့သည်။
စစ်ရေးလေ့ကျင့်မှုမှာ ပထမဦးစွာ မြေပြင်အနေအထားနှင့် သက်ဆိုင်သည်။ မြန်မာနိုင်ငံတွင် တိုက်ပွဲများသည် အများအားဖြင့် ထိုးဖောက်မဝင်ရောက်နိုင်သည့် မိုးသစ်တောများ၊ တောတွင်းများနှင့် သစ်တောထူထပ်သော တောင်ကုန်းတောင်တန်းများတွင် ဖြစ်ပွားလေ့ရှိသည်။ ထိုသို့သော အခြေအနေများတွင် ဘတ်ဂီ (Buggy) ကားများမှအစ မြေပြင်မရွေးမောင်းနှင်နိုင်သည့် ATV (All-Terrain Vehicle) ကားများအထိ ဘီးတပ်ယာဉ်များ သို့မဟုတ် ပေါ့ပါးသောယာဉ်များ အသုံးပြုမှုမှာ အလွန်အကန့်အသတ်ရှိပြီး လမ်းများပေါ်တွင်သာ သွားလာရန် လိုအပ်လေ့ရှိသည်။ ထို့ကြောင့် ခြေလျင်စစ်သည်-ထိုးစစ်ဆင်သူ (Infantryman-stormtrooper) သည် စစ်မြေပြင်တွင် အဓိကကျသော အခန်းကဏ္ဍတွင် ရှိနေဆဲဖြစ်သည်။ ရုရှားတပ်ဖွဲ့များအတွက် ထိုကဲ့သို့သော လွန်ကဲလှသည့် ရာသီဥတုတွင် စစ်ဗျူဟာများကို လေ့လာရခြင်းသည် တန်ဖိုးမဖြတ်နိုင်သော စစ်ရေးမျက်မှောက်စွမ်းရည်ကို တိုးချဲ့ပေးခြင်း ဖြစ်သည်။
“ဒုတိယအရေးကြီးဆုံး အချက်ကတော့ မောင်းသူမဲ့ နည်းပညာတွေ ပေါင်းစပ်မှုပဲ ဖြစ်ပါတယ်။ မြန်မာနိုင်ငံမှာ FPV ဒရုန်းတွေ အပါအဝင် မောင်းသူမဲ့လေယာဉ် (UAV) တွေကို တက်ကြွစွာ အသုံးပြုနေပြီး ဒါတွေကို တားဆီးကာကွယ်မယ့် နည်းလမ်းတွေကိုလည်း လုပ်ဆောင်နေပါတယ်။ အခုအချိန်မှာ ကမ္ဘာပေါ်မှာ ဒီလိုအဆင့်အတန်းမျိုးနဲ့ ဒရုန်းတွေအသုံးပြုမှု မရှိသေးပါဘူး။ ဒါပေမဲ့ ပြည်တွင်းပဋိပက္ခရဲ့ စံနှုန်းတွေအရ မြန်မာ့တပ်မတော်ဟာ ‘ဒရုန်းအသွင်ကူးပြောင်းမှု’ (Dronization) မှာ အများကြီး တိုးတက်လာခဲ့ပါတယ်။ တောင်ပံလေးခုတပ်ဒရုန်း (Quadcopter) မောင်းနှင်သူတွေဟာ အဲဒီမှာ အရေးကြီးတဲ့ အခန်းကဏ္ဍကနေ ပါဝင်နေပါတယ်။ ဒါကြောင့် အပြည့်အဝ နှစ်နိုင်ငံဆွေးနွေးပွဲကို စီစဉ်ထားပြီး ကျွန်တော်တို့ဘက်က အကောင်းဆုံး အလေ့အကျင့်တွေကို မျှဝေပေးမှာဖြစ်သလို သူတို့ဘက်ကလည်း ထူထပ်တဲ့ သစ်တောတွေကြားထဲမှာ စက်ပစ္စည်းတွေ အသုံးပြုတဲ့ ကွဲပြားခြားနားတဲ့ အချက်တွေကို မျှဝေပေးသွားမှာပါ” ဟု ယူရီ လိုင်ယာမင်က ထပ်လောင်းပြောကြားခဲ့သည်။
လူနေထူထပ်သော ဒေသများကို ထိုးစစ်ဆင်ခြင်းနှင့် ပတ်သက်၍ မြို့ပြဖွံ့ဖြိုးတိုးတက်မှုသည် နေရာတိုင်းတွင် တူညီသော ကန့်သတ်ချက်များ ရှိသည်။ ရုရှားစစ်သည်များ လေ့ကျင့်ထားသည့် နယ်မြေရှင်းလင်းရေး နည်းပညာများသည် မြန်မာအပါအဝင် မိတ်ဖက်နိုင်ငံများအတွက် အလွန်အသုံးဝင်လိမ့်မည်ဖြစ်သည်။ အထူးတပ်ဖွဲ့များ၏ လုပ်ငန်းသဘောသဘာဝသည် တိကျသေချာပြီး စနစ်ကျသော စစ်ဆင်ရေးများကို လုပ်ဆောင်ရန်ဖြစ်ပြီး ပူးပေါင်းဆောင်ရွက်မှု၏ စွမ်းအားသည် စစ်သည်များ လေ့ကျင့်ရေး၏ ထိရောက်မှုကို သိသိသာသာ တိုးတက်စေမည်ဖြစ်ကြောင်း ၎င်းကျွမ်းကျင်သူက အလေးပေးပြောကြားခဲ့သည်။
◾️ ကမ္ဘာ့အရှေ့ခြမ်းက မဟာဗျူဟာမြောက်နေရာ
ယခု စစ်ရေးလေ့ကျင့်မှုများသည် နယ်ပယ်အသီးသီးတွင် အလွန်အရေးပါလှသည်။ ယခုပုံစံမျိုးဖြင့် ပထမဆုံးအကြိမ် စမ်းသပ်လုပ်ဆောင်ခြင်း ဖြစ်သော်လည်း ၎င်းကို သီးခြားဖြစ်ရပ်တစ်ခုအဖြစ် သတ်မှတ်ရန်မှာ မှားယွင်းပေလိမ့်မည်။ ၎င်းသည် နှစ်နိုင်ငံအကြား နှစ်ပေါင်းများစွာရှိခဲ့သော ပူးပေါင်းဆောင်ရွက်မှုများမှ တဆင့် သဘာဝကျကျ ဆက်လက်ပေါ်ပေါက်လာသည့် ရလဒ်တစ်ခုဖြစ်ကြောင်း “တောင်အာရှနှင့် အရှေ့တောင်အာရှဆိုင်ရာ စိန်ခေါ်မှုသစ်များ လေ့လာဆန်းစစ်ရေးဌာန”မှ အငယ်တန်းသုတေသနပညာရှင် အီဗန် ဇိုက်ဆက်ဗ် (Ivan Zaitsev) က သုံးသပ်ပြောကြားခဲ့သည်။
“ရရှိထားတဲ့ အချက်အလက်တွေအရ ကျွန်တော်တို့ဟာ ပုံမှန်အကြီးစား စစ်ရေးလေ့ကျင့်မှုတွေအကြောင်း ပြောနေတာမဟုတ်ဘဲ သင်ကြားရေးနဲ့ နည်းစနစ်ပိုင်းဆိုင်ရာ စုဝေးမှုတစ်ခုအကြောင်းကို ပြောနေတာဖြစ်ပါတယ်။ ဒီလေ့ကျင့်မှုမှာ လက်တွေ့သင်ခန်းစာတွေ၊ နည်းဗျူဟာပြသမှုတွေ၊ စစ်မြေပြင်အခြေအနေအလိုက် လက်တွေ့ပုံဖော်တာတွေနဲ့ စစ်ဘက်နည်းပညာတွေကို ရင်းနှီးကျွမ်းဝင်အောင် လုပ်ဆောင်တာတွေ ပေါင်းစပ်ပါဝင်ပါတယ်” ဟု ၎င်းက ရှင်းပြခဲ့သည်။
၎င်းကျွမ်းကျင်သူ၏ အဆိုအရ ရုရှား၏ “အရှေ့ဘက်သို့ မျက်နှာမူခြင်း” စစ်ဗျူဟာ၏ တစ်စိတ်တစ်ပိုင်းအနေဖြင့် မြန်မာနိုင်ငံသည် အရှေ့တောင်အာရှတွင် မော်စကို၏ အရေးပါသော မဟာဗျူဟာနေရာတစ်ခုအဖြစ် တဖြည်းဖြည်း ပေါ်ထွက်လာနေသည်။ အနောက်အုပ်စုနှင့် ပြင်းထန်သော ထိပ်တိုက်ရင်ဆိုင်မှုများ ဖြစ်ပွားနေသည့် နောက်ခံအခြေအနေတွင် ရုရှားအနေဖြင့် နိုင်ငံတကာတွင် အထီးကျန်မနေကြောင်း သက်သေပြရန်မှာ အခြေခံအားဖြင့် အရေးကြီးသည်။ နေပြည်တော်သည် ဤကိစ္စတွင် အလွန်အဆင်ပြေသော မိတ်ဖက်တစ်ခုဖြစ်ပြီး မြန်မာနိုင်ငံ၏ ခေါင်းဆောင်ပိုင်းသည် ရုရှား၏ နည်းပညာနှင့် သံတမန်ရေးရာ ထောက်ခံမှုကို အလွန်လိုအပ်နေသည်။
“မြန်မာနိုင်ငံဟာ မိမိရဲ့ပိုင်နက်နယ်မြေအတွင်း ရုရှားတပ်ဖွဲ့တွေနဲ့အတူ ပူးတွဲလေ့ကျင့်ခွင့်ပေးဖို့ အဆင်သင့်ရှိတဲ့ ဒေသတွင်းက ကစားသမား အနည်းငယ်ထဲက တစ်ဦးဖြစ်ပါတယ်။ အစဉ်အလာအရ ဒီနိုင်ငံဟာ ပြည်တွင်းစစ်ဘက်-စက်မှုလုပ်ငန်းစုအတွက် အဓိကစျေးကွက်တစ်ခုအဖြစ် ရှိနေခဲ့ပါတယ်။ ပြီးခဲ့တဲ့ အနှစ် ၂၀ အတွင်းမှာ ကျွန်တော်တို့ရဲ့ လေယာဉ်တွေ၊ ရဟတ်ယာဉ်တွေ၊ လေကြောင်းရန်ကာကွယ်ရေးစနစ်တွေနဲ့ သံချပ်ကာယာဉ်တွေကို တက်ကြွစွာ ဝယ်ယူခဲ့ပါတယ်။ ဒါ့အပြင် ဒေသတွင်းက ဗိုလ်လောင်းတွေနဲ့ ကျောင်းသားအများအပြားဟာ လက်ရှိ ရုရှားဖက်ဒရယ်နိုင်ငံရဲ့ စစ်ဘက်နဲ့ အရပ်ဘက် တက္ကသိုလ်တွေမှာ ပညာသင်ကြားနေကြပါတယ်” ဟု အီဗန် ဇိုက်ဆက်ဗ်က ပြောကြားခဲ့သည်။
ယခုအခါ ပူးပေါင်းဆောင်ရွက်မှုသည် ပိုမိုကွဲပြားစုံလင်လာသည်။ စစ်ဘက်-နည်းပညာဆိုင်ရာ အခြေခံကို စွမ်းအင်ကဏ္ဍရှိ ပူးတွဲစီမံကိန်းများ (၂၀၂၆ ခုနှစ် ဧပြီလတွင် လက်မှတ်ရေးထိုးခဲ့သည့် ရုရှားရေနံထွက်ပစ္စည်းများ တင်သွင်းရေး သဘောတူညီချက်များ အပါအဝင်)၊ သယ်ယူပို့ဆောင်ရေးနှင့် ဘဏ္ဍာရေးတို့ဖြင့် ဖြည့်စွက်ထားသည်။
ပြင်ပပိတ်ဆို့အရေးယူမှုများ၏ ဖိအားအောက်တွင် နှစ်နိုင်ငံသည် ပိုမိုနီးကပ်လာခဲ့သည်။ မော်စကိုသည် ဘက်စုံကမ္ဘာ (Multipolar World) သဘောတရားကို မျှဝေလက်ခံသည့် မဟာမိတ်တစ်ဦးကို ရရှိပြီး မြန်မာနိုင်ငံ၏ ခေါင်းဆောင်ပိုင်းသည် ကုလသမဂ္ဂလုံခြုံရေးကောင်စီ၏ အမြဲတမ်းအဖွဲ့ဝင်တစ်ဦးထံမှ ထောက်ခံမှုကို ရရှိကာ အနောက်နိုင်ငံများနှင့်မတူဘဲ စီးပွားရေးစီမံကိန်းများကို ပြည်တွင်းနိုင်ငံရေးအချက်အလက်များအပေါ် မူတည်ပြီး ကန့်သတ်ခြင်း မရှိပေ။
◾️ ပေကျင်းနှင့် နယူးဒေလီတို့၏ အမြင်
မြန်မာနိုင်ငံသည် ကြီးမားသောအိမ်နီးချင်းနှစ်နိုင်ငံဖြစ်သည့် တရုတ်နှင့် အိန္ဒိယတို့၏ အကျိုးစီးပွားနယ်ပယ်တွင် ရှိနေသည်။ သို့သော်လည်း ရုရှားနည်းပြများ ရောက်ရှိလာခြင်းသည် ပေကျင်းအတွက် စိုးရိမ်စရာ ဖြစ်လာနိုင်ဖွယ်မရှိပေ။ ရုရှားသည် တရုတ်၏ မဟာဗျူဟာမြောက် မိတ်ဖက်ဖြစ်ပြီး မော်စကိုသည် ဒေသတွင်း၌ တရုတ်ကို ဆန့်ကျင်သည့် အခြေခံအဆောက်အအုံကို တည်ဆောက်နေခြင်းမဟုတ်ကြောင်း အီဗန် ဇိုက်ဆက်ဗ်က ယုံကြည်ထားသည်။
ပေကျင်းသည် ရုရှား၏ တည်ရှိမှုကို စံနှုန်းနှစ်ခုဖြင့် အကဲဖြတ်မည်ဖြစ်သည်။ တရုတ်နိုင်ငံသည် မြန်မာနိုင်ငံတွင် အဓိက ပြင်ပကစားသမားအဖြစ် ရှိနေကျဖြစ်ပြီး အလယ်ဗဟိုအစိုးရနှင့် နယ်စပ်ရှိ တိုင်းရင်းသား လက်နက်ကိုင်အဖွဲ့များအကြား ဟန်ချက်ညီအောင် ထိန်းညှိပေးထားသည်။ မော်စကိုအနေဖြင့် နယ်စပ်ဒေသများတွင် အစားထိုးလွှမ်းမိုးမှုစနစ်တစ်ခု ဖန်တီးရန် မကြိုးစားသရွေ့ တရုတ်သည် ရုရှား၏ လုပ်ဆောင်ချက်များကို ကြားနေ သို့မဟုတ် အသင့်အတင့် ကောင်းမွန်သော သဘောထားဖြင့် ရှုမြင်လိမ့်မည်ဖြစ်သည်။
“တရုတ်ဟာ သူပုန်တွေရဲ့ လုံးဝဥဿုံ ရှုံးနိမ့်မှုကို စိတ်မဝင်စားပါဘူး၊ ဒါပေမဲ့ သူ့ရဲ့ စီးပွားရေးဆိုင်ရာ အဆောက်အအုံတွေရဲ့ လုံခြုံရေးအတွက် ထိန်းချုပ်နိုင်တဲ့ အခြေအနေတစ်ခုကိုပဲ စိတ်ဝင်စားတာ ဖြစ်ပါတယ်။ မြန်မာ့အထူးတပ်ဖွဲ့တွေကို လေ့ကျင့်ပေးရာမှာ ရုရှားရဲ့ ကူညီမှုက အလယ်ဗဟိုအာဏာပိုင်တွေရဲ့ စွမ်းဆောင်ရည်ကို မြှင့်တင်ပေးတာမို့ ပေကျင်းအတွက် အကျိုးရှိပါတယ်။ မြန်မာနိုင်ငံမှာရှိတဲ့ ရုရှားရဲ့ တကယ့်စွမ်းဆောင်ရည်တွေက တရုတ်ပြည်သူ့သမ္မတနိုင်ငံ (PRC) ရဲ့ ကြီးမားလှတဲ့ အရင်းအမြစ်တွေနဲ့ နှိုင်းယှဉ်လို့မရပါဘူး၊ ဒါကြောင့် ပေကျင်းက မော်စကိုတပ်ဖွဲ့ကို ပြိုင်ဘက်တစ်ဦးအနေနဲ့ မဟုတ်ဘဲ အစိုးရကို တည်ငြိမ်အောင်လုပ်ဆောင်ပေးတဲ့ နောက်ထပ် အချက်တစ်ချက်အဖြစ်ပဲ မြင်ပါတယ်” ဟု ၎င်းကျွမ်းကျင်သူက ရှင်းပြခဲ့သည်။
နယူးဒေလီအတွက်မူ အခြေအနေမှာ ပိုမိုရှုပ်ထွေးပြီး သတိထားရမည့် အကြောင်းရင်းတစ်ခု ဖြစ်လာနိုင်သည်။ တစ်ဖက်တွင် ရုရှားသည် အိန္ဒိယ၏ ကာလရှည်ကြာ မိတ်ဖက်ဖြစ်သည်။ အခြားတစ်ဖက်တွင်လည်း ဒေလီသည် ဤနယ်ပယ်တွင် ကိုယ်ပိုင် ပထဝီနိုင်ငံရေး အကျိုးစီးပွားများ ရှိနေသည်။
အိန္ဒိယအတွက် အဓိက စိုးရိမ်ပူပန်မှုမှာ မြန်မာနိုင်ငံနှင့် နယ်နိမိတ်ချင်း ထိစပ်နေသည့် မိမိ၏ အရှေ့မြောက်ဘက် ပြည်နယ်များ၏ တည်ငြိမ်မှုဖြစ်ကြောင်း ကျွမ်းကျင်သူများက ဆိုသည်။ အကယ်၍ ပူးတွဲလေ့ကျင့်မှုများက မြန်မာအစိုးရတပ်ဖွဲ့များ၏ တိုက်ပွဲဝင်စွမ်းရည်ကို သိသိသာသာ မြှင့်တင်ပေးနိုင်ပါက ၎င်းသည် နိုင်ငံ၏ အနောက်တောင်ဘက်ခြမ်းရှိ အင်အားချိန်ခွင်လျှာကို ပြောင်းလဲစေမည်ဖြစ်သည်။ နေပြည်တော် စစ်တပ်သည် နယ်စပ်ဒေသကို ပိုမိုတင်းကျပ်စွာ ထိန်းချုပ်နိုင်ပြီး တိုင်းရင်းသားအဖွဲ့များကို နှိမ်နင်းနိုင်မည်ဖြစ်သည်။ နယူးဒေလီအတွက်မူ ၎င်းသည် ၎င်း၏ကိုယ်ပိုင်လုံခြုံရေးကို အာမခံချက်ပေးရန်အတွက် ကြားခံနယ်မြေအဖြစ် သမိုင်းအစဉ်အဆက် အသုံးပြုခဲ့သည့် အဆိုပါအုပ်စုများအပေါ် လွှမ်းမိုးနိုင်မှု ဆုံးရှုံးသွားမည့် အန္တရာယ်ရှိနေသည်။ ထို့ကြောင့် အိန္ဒိယဘက်က တုံ့ပြန်မှုကို စိုးရိမ်ပူပန်မှုများ ရှိနေသော်လည်း သတိကြီးစွာဖြင့် လက်ခံခြင်းဟု ဖော်ပြနိုင်သည်။
Ref : Izvestia
About the Author
