
၃.၂.၂၀၂၅
Written By Thandar
ညကျောင်း ရုပ်ရှင်ထုတ်လုပ်ရေးက ထိတ်လန့်ခြောက်ခြားဖွယ် ဇာတ်လမ်းပုံစံ “ဆရာမ The Teacher 2” ရုပ်ရှင်ဇာတ်ကားကြီး Premiere Show အခမ်းအနားကို ယနေ့ ဖေဖော်ဝါရီ ၃ ရက် ညနေပိုင်းက ရန်ကုန်မြို့ သမ္မတအဆင့်မြင့် ရုပ်ရှင်ရုံမှာ ကျင်းပခဲ့ပါတယ်။

“မြယာက ပထမရိုက်ခဲ့တဲ့ The Teacher 1 ထက် 2 က ပိုကြောက်ဖို့ကောင်းတယ်။ အထက ၆ မင်းခေါင် ကျောင်းမှာ ဖြစ်နေကြတဲ့ ပြဿနာရဲ့ အဖြေကို သူတို့ ဘယ်လို ဆက်ပြီးရှာကြမလဲဆိုတာက စိတ်ဝင်စားဖို့ ကောင်းပါတယ်။ ကိုယ်တိုင်ကလည်း စပ်စုတဲ့ ဆရာမတစ်ယောက်အနေနဲ့ မြင်ရမှာပါ။ ဒီဇာတ်ကားကို သရဲကားဆိုတာထက် စုံထောက်ကားတစ်ကားလို့ ကြည့်ရှုရမယ့်လို့ ပြောလို့ရပါတယ်”လို့ သရုပ်ဆောင်မြယာက ပြောပါတယ်။

အဆိုပါ ဇာတ်ကားကို ဇာတ်လမ်း ၊ ဇာတ်ညွှန်း ဒါရိုက်တာ ညိုမင်းလွင်က သရုပ်ဆောင်တွေဖြစ်တဲ့ မြယာ၊ မြတ်၊ ဝင်းလဲ့ရွှေရည်၊ လင်းထည်ဝါ၊ သန်းဓနစိုး၊ ဂျွန်နိုင်းအောင်၊ ပိုင်သစ်၊ မိုးယံ၊ နှင်းဝတ်ရည် ၊ အိမ်ဂျူရီမွန်၊ မှုနံ့သာ စတဲ့ သူတွေနဲ့ ရိုက်ကူး ပါဝင် သရုပ်ဆောင်ထားကြပါတယ်။
အဖြူအစိမ်းဝတ် “ဆရာမ The Teacher 2″ရုပ်ရှင်ဇာတ်ကားကြီးကို လာမယ့် ဖေဖော်ဝါရီ ၇ ရက်နေ့မှာ ရုံတင်ပြသမှာလည်း ဖြစ်ပါတယ်။