၂၀.၆.၂၀၂၄
Written by KL

ကချင်ပြည်နယ်၊ ချီဖွေမြို့နယ်၊ ပန်ဝါဒေသ ပါထိုင်ဟော့်အနီးတွင် ဇွန်လ ၁၉ ရက် ည ၁၂ နာရီခန့်က မြေရှားသတ္တုတွင်း၌ မြေပြိုကျမှုဖြစ်ပွားခဲ့ရာ အလုပ်သမား ၃၀ ကျော် ပျောက်ဆုံးနေကြောင်း ဒေသခံတစ်ဦးက ပြောသည်။

“၃၀ ကျော် ပါသွားတယ်တဲ့။ ကျွန်တော်တို့သွားကြည့်တာတော့ ကျနော်တို့ရှေ့မှာတင် ၃ ယောက်တွေ့ပါတယ်။ ကျား၂ ၊မ ၁ ပါ။ အများစုကအလုပ်သမားတွေပါ။ အရမ်းသနားစရာကောင်းပါတယ်၊”ဟု မျက်မြင်တွေ့ရှိသူတစ်ဦးက ပြောသည်။

ပန်ဝါဒေသခံတချို့၏ ပြောကြားချက်အရ ညနက်ချိန်တွင် မြေပြိုကျသဖြင့် တောင်အောက်ရှိ အလုပ်သမားများ​နေထိုင်သော အိမ်များပေါ် ပိမိကာ ​မြေကြီးများ ဖုံးလွှမ်းသွားပြီး လူ ၅၀ ခန့် နစ်မြုပ်ပျောက်ဆုံးနေသည်ဟုလည်း ပြောဆိုမှုများ ရှိ​နေသည်။

မြေပြိုမှုဖြစ်ပွားသဖြင့် သတ္တုဆိုက်မှ အလုပ်သမားများ၊ ထင်းခွဲသူများ၊​​​ မြေသြဇာအတင်အချလုပ်သော အလုပ်သမားများ ပျောက်ဆုံးနေကြောင်း မြေပြိုကျသောနေရာသို့ ရောက်ရှိနေသူ တစ်ဦးက ပြောသည်။

အလားတူ ဇွန်လ ၄ ရက်က ပန်ဝါမြို့ရှိ မြေရှားသတ္တုလုပ်ကွက်တစ်ခုတွင် မြေပြိုကျမှုဖြစ်ပွားသဖြင့် အလုပ်သမား ၁၂ ဦးပျောက်ဆုံးခဲ့ပြီး ၅ ဦး၏ ရုပ်အလောင်းကိုသာ ပြန်လည်တွေ့ရှိခဲ့သည်။

ပုံစာ။ မြေပြိုမှုဖြစ်ပွားသည့်နေရာနှင့် သေဆုံးသူတစ်ဦးပုံရိပ်။

Leave a Reply

Your email address will not be published. Required fields are marked *