၁၈.၄.၂၀၂၄
Written by TZ
ပဲခူးတိုင်းဒေသကြီး၊ တောင်ငူခရိုင်၊ ဖြူးမြို့ရှိ ဆည်ရေလှောင်တမံတွင် မိသားစုဝင်များနှင့်အတူ ရေကစားသည့် အမျိုးသားတစ်ဦး ရေနစ်၍ သေဆုံးသွားကြောင်း သိရသည်။
ဖြစ်စဥ်မှာ ယနေ့ ဧပြီလ ၁၈ ရက် နံနက် ၁၀ နာရီခွဲအချိန်တွင် ဖြူးမြို့ရှိ ဆည်ရေလှောင်တမံ၌ အမျိုးသားတစ်ဦး ရေနစ်သေဆုံးကြောင်း ဖုန်းဆက်လာသောကြောင့် ဖြစ်စဥ်နေရာသို့ ကရုဏာရင်ခွင်အရေးပေါ်ကယ်ဆယ်ရေးပရဟိတအသင်းနှင့်နန်းတော်ဦးပရဟိတအသင်းမှ ရေနစ်သည့်အမျိုးသားအား လိုက်လံရှာဖွေရာ သေဆုံးသည့် ရုပ်အလောင်းကို တွေ့ရှိခဲ့ကြောင်း သိရသည်။
“ရေနစ်ပြီး သေသွားတဲ့ ကောင်လေးရဲ့မိဘတွေရော၊ သူ့ရဲ့အမျိုးသမီးရော ရေအတူတူကစားကြတာ။ အဲ့ဒီမှာ သူက ရေကူးရင်း ရေစီးနဲ့မျောပါသွားတာ”ဟု ကရုဏာရင်ခွင် အရေးပေါ်ကယ်ဆယ်ရေးပရဟိတအသင်းမှ တာဝန်ရှိသူတစ်ဦးကဆိုသည်။
ရေနစ်သေဆုံးသည့် အမျိုးသားမှာ အသက် ၂၄ နှစ်အရွယ် ကိုရဲရင့်သွေးဖြစ်ပြီး ၎င်းမှာ ရေခဲ ( ၅) လမ်း၊ ( ၂၂) ရပ်ကွက်တွင် နေထိုင်သူဖြစ်ကြောင်း၊ ရုပ်အလောင်းကို ထိုအသင်းမှ တောင်ငူဆေးရုံရင်ခွဲရုံသို့ ပို့ဆောင်လိုက်ကြောင်း သိရသည်။
ဓာတ်ပုံ – ကရုဏာရင်ခွင်အရေးပေါ်ကယ်ဆယ်ရေးပရဟိတအသင်း
