မအီရှဲန်ကျွဲ၊ နေအိမ်နှင့် သူမအိမ်မှ ဖမ်းဆီးရမိသော ကျပ် ၂၈ ဘီလျံ တန်ဖိုးရှိ မူးယစ်ဆေးများကို တွေ့ရစဥ်
MT News
ရှမ်းပြည်နယ်အရှေ့ပိုင်း တာချီလိတ်မြို့၊ ဆန်ဆိုင်း(က) ရပ်ကွက်တွင် နိုဝင်ဘာ ၂၁ ရက် နံနက် ၁၀ နာရီခွဲ အချိန်က ဒေသကာလတန်ဖိုးငွေကျပ် ၂၈ ဘီလျံကျော်တန်ဖိုးရှိ စိတ်ပြောင်းခေါင်းခါမူးယစ်ဆေးဝါး၊ စိတ်ငြိမ်ဆေးဝါးနှင့် စိတ်ပြောင်းဆေးဝါးများသိုလှောင်သူ အမျိုးသမီးအား မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့က ဖမ်းဆီးရမိခဲ့ကြောင်း သိရသည်။
ဖြစ်စဥ်မှာ တာချီလိတ်မြို့၊ ဆန်ဆိုင်း(က)ရပ်ကွက်ရှိ မအီရှဲန်ကျွဲ့ ၏ နေအိမ်ကို သတင်းအရရှာဖွေရာ နေအိမ်မှ ဒေသကာလတန်ဖိုးငွေ ကျပ် ၂၈ ဘီလျံကျော်တန်ဖိုးရှိ စိတ်ပြောင်းခေါင်းခါ Ecstasy ဆေးပြား ၆၁၆၀၀၀ ပြား၊ စိတ်ပြောင်းဆေးဝါးများရောစပ်ထားသောအမှုန့်(Happy Water) ၁၁၃ ဒသမ ၀၄ ကီလို၊ စိတ်ငြိမ်ဆေးဝါး Erimin-5 ဆေးပြား ၃၅၀၀၀ ပြားနှင့် Honda မော်တော်ယာဉ် ၁ စီးတို့ကို သိမ်းဆည်းရမိခဲ့ဟု သိရသည်။
သို့ဖြစ်၍ ဖမ်းဆီးရမိသူ မအီရှဲန်ကျွဲ့အား မူးယစ်ဆေးဝါးနှင့် စိတ်ကိုပြောင်းလဲစေသောဆေးဝါးများ ဆိုင်ရာဥပဒေအရ အရေးယူထားရှိပြီး ပြစ်မှုကျူးလွန်သူများနှင့် ဆက်စပ်ပါဝင်သူများ၏ ငွေကြေးပစ္စည်းများ၊ ပိုင်ဆိုင်မှုများအား ငွေကြေးခဝါချမှုတိုက်ဖျက်ရေးဥပဒေအရ ထပ်မံအရေးယူနိုင်ရေးနှင့် ကွင်းဆက်ပြစ်မှုကျူးလွန်သူများအား ဖော်ထုတ်ဖမ်းဆီးနိုင်ရေး စစ်ဆေးဖော်ထုတ်လျက်ရှိကြောင်း CCDAC MYANMAR မှ သတင်းထုတ်ပြန်ထားသည်။
