၂၈. ၁၁. ၂၀၂၃
Written by Nay Aung
မြန်မာနိုင်ငံသည် အာဆီယံအဖွဲ့ဝင်နိုင်ငံများထဲ အင်္ဂလိပ်စာ ကျွမ်းကျင်မှုအရှိဆုံး အဆင့် ၆ တွင် ရပ်တည်လျက်ရှိနေပြီး ထိုင်း၊ ကမ္ဘောဒီးယားနိုင်ငံတို့အထက်တွင်ရှိနေကြောင်း ဘာသာစကားအင်စတီကျူးရှင်းအဖွဲ့ဖြစ်သော EF ၏ ထုတ်ပြန်ချက်တွင် ဖော်ပြထားသည်။
အဆိုပါအဖွဲ့သည် ကမ္ဘာတဝှမ်းရှိ နိုင်ငံဒေသပေါင်း ၁၁၃ နိုင်ငံမှ အရွယ်ရောက်ပြီးသား လူပေါင်း၂ ဒသမ ၂ သန်းကျော်ကို အင်္ဂလိပ်စာနှင့်ပတ်သက်ပြီး စမ်းသပ်စစ်ဆေးခဲ့ပြီးနောက် အမှတ်ပေးကာ ၂၀၂၃ ခုနှစ်အတွက် အင်္ဂလိပ်စာ ကျွမ်းကျင်မှုအဆင့်အညွှန်းကိန်း ကမ္ဘာ့အဆင့်သတ်မှတ်ခဲ့ရာ မြန်မာနိုင်ငံက ကမ္ဘာ့နိုင်ငံပေါင်း ၁၁၃ နိုင်ငံထဲတွင် ကာဂျစ္စတန်နိုင်ငံနှင့်အတူ အဆင့် ၉၀ နေရာရပ်တည်နေကြောင်း သိရသည်။
မြန်မာနိုင်ငံ၏ အင်္ဂလိပ်စာကျွမ်းကျင်မှုအဆင့်တန်း ရမှတ်သည် ၄၅၀ သာရှိခဲ့ပြီး အင်္ဂလိပ်စာနှင့်ပတ်သက်၍ Low proficiency နိုင်ငံအဖြစ်သာရှိနေခဲ့ကြောင်း သိရသည်။ အင်္ဂလိပ်စာကျွမ်းကျင်မှုအဆင့်အတန်းနှင့်ပတ်သက်ပြီး အာဆီယံဒေသတွင်းနိုင်ငံများအနက် စင်ကာပူနိုင်ငံသည် ကမ္ဘာအဆင့်တွင် အဆင့် ၂ နေရာ ရှိခဲ့သလို အာဆီယံနိုင်ငံများထဲတွင် အဆင့် ၁ နေရာ ရပ်တည်နေခဲ့ကြောင်း သိရသည်။ ထို့အပြင် ဖိလစ်ပိုင်နိုင်ငံသည် အာဆီယံဒေသတွင်းနိုင်ငံများထဲတွင် အဆင့် ၂ နေရာရပ်တည်နိုင်ခဲ့သလို ကမ္ဘာအဆင့် ၂၀ တွင် ရှိနေခဲ့ကြောင်း သိရသည်။ ကမ္ဘောဒီးယားနိုင်ငံက အာဆီယံဒေသတွင်း နိုင်ငံများထဲတွင် အဆင့် ၇ နေရာတွင်ရှိနေခဲ့သလို ကမ္ဘာ့အဆင့် ၉၈ နေရာ ရှိနေခဲ့ကြောင်း သိရသည်။
မြန်မာနိုင်ငံ၏အိမ်နီးချင်းနိုင်ငံဖြစ်သော ထိုင်းနိုင်ငံသည် ကမ္ဘာ့အဆင့်တွင် အဆင့် ၁၀၁ နေရာ ရှိနေခဲ့ပြီး အာဆီယံနိုင်ငံများထဲ အဆင့် ၈ နေရာတွင် ရှိနေခဲ့ကြောင်း သိရသည်။ အာဆီယံနိုင်ငံများအနက် အင်္ဂလိပ်စာ ကျွမ်းကျင်မှု အဆင့်အတန်းနှင့်ပတ်သက်ပြီး အကောင်းဆုံးနိုင်ငံများစာရင်းတွင် စင်ကာပူ၊ ဖိလစ်ပိုင်၊ မလေးရှား၊ ဗီယက်နမ်နှင့် အင်ဒိုနီးရှားနိုင်ငံတို့က အဆင့်လိုက်ရပ်တည်နေကြောင်း သိရသည်။
အဆိုပါအဖွဲ့သည် အင်္ဂလိပ်စာက မိခင်ဘာသာစကား မဟုတ်သော နိုင်ငံများ၏ အင်္ဂလိပ်စာစွမ်းရည်ကို အဆင့်လေးဆင့်ခွဲပြီး အထူးကျွမ်းကျင်အဆင့် (Very high proficiency)၊ ကျွမ်းကျင်အဆင့် (High proficiency)၊ အလယ်အလတ် ကျွမ်းကျင်အဆင့် (Moderate proficiency)၊ ကျွမ်းကျင်မှုနိမ့်ကျသောအဆင့် (Low proficiency)နှင့် ကျွမ်းကျင်မှုအလွန်နိမ့်ကျသောအဆင့် (Very low proficiency) ဆိုကာ သတ်မှတ်ထားကြောင်း သိရသည်။
Ref; EF
