၃၀. ၆. ၂၀၂၃
Written by Naing Thuta
ချမ်းမြသာစည်မြို့နယ်တွင် လမ်းဘေး၌ ကျူးကျော်ဆောက်လုပ်နေထိုင်သော နေအိမ် ၁၀ လုံးအား ယနေ့ (ဇွန်လ ၃၀ ရက်) နံနက်ပိုင်းက မန္တလေးမြို့တော်စည်ပင်သာယာရေးအဖွဲ့မှ ဖြိုဖျက်ရှင်းလင်းနေကြောင်း မြို့နေပြည်သူများပြောပြချက်အရ ကနဦးသိရသည်။
ယနေ့နံနက် ၉ နာရီ ၃၀ မိနစ်ခန့်မှ ၁၁ နာရီ ၃၅ မိနစ်ထိ မန္တလေးတိုင်းဒေသကြီး၊ ချမ်းမြသာစည်မြို့နယ်၊ ကန်သာယာရပ်ကွက်၊ အကွက်အမှတ် ( ဗ-၂၉)၊ ပရံတော်ချောင်းအရှေ့ဘက်၊ ၁၁၄(E) လမ်းနင့် ၁၁၅ လမ်းကြားရှိ လမ်းဘေးကျူးကျော်ဆောက်လုပ်နေထိုင်သည့် နေအိမ် ၁၀ လုံး (အခိုင်အမာ ၄လုံး၊ ယာယီ ၆လုံး)၊ အိမ်ထောင်စု ၁၀ စု၊ ကျား ၂၂ ဦး၊ မ ၂၈ ဦး၊ စုစုပေါင်း ၅၀ ဦးတို့အား ဖယ်ရှားရှင်းလင်းခဲ့ကြောင်း မန္တလေးမြို့တော်စည်ပင်သာယာရေးအဖွဲ့မှ တာဝန်ရှိသူတစ်ဦးထံမှ သိရသည်။
