၈. ၆. ၂၀၂၃
Written by Peya
အောင်မင်္ဂလာအဝေးပြေးကားဝင်းသို့ ခရီးသည် သွားကြိုမည်ဟုဆိုကာ ပျောက်ဆုံးသွားသည့် တက္ကစီယာဉ်နှင့် ယာဉ်မောင်းကို တစ်ရက်ကျော်ကြာသည့်အထိ အဆက်အသွယ် မရသေး၍ ရှာဖွေနေဆဲဖြစ်ကြောင်း ပျောက်ဆုံးယာဉ်မောင်းနှင့် နီးစပ်သူတစ်ဦးက MT News သတင်းဌာနသို့ ပြောသည်။
ပျောက်ဆုံး တက္ကစီယာဉ်မှာ တက္ကစီ ယာဉ်အမှတ် (YGN) 5F/9019 ဖြစ်ပြီး ဦးဝင်းဆိုင်က မောင်းနှင်ခြင်း ဖြစ်ကာ ဇွန်လ ၇ ရက် နံနက် ၅ နာရီခွဲတွင် အောင်မင်္ဂလာအဝေးပြေးဝင်းသို့ ခရီးသည်ကြိုမည်ဟုဆိုကာ ထွက်သွားပြီးနောက် အဆက်အသွယ် ပြတ်တောက်သွားခဲ့ခြင်း ဖြစ်ကြောင်း သိရသည်။
“ကျွန်တော်တို့လည်း စုံစမ်းနေတယ်။ မသိသေးဘူး ခင်ဗျ။ စုံစမ်းနေဆဲ ကာလပါ။ မနက် ၅ နာရီခွဲတည်းက အိမ်က ထွက်သွားတာ။ ဖုန်းကို လုံးဝ ဆက်မရတာ။ သူဘယ်သွားလဲလို့ ဖုန်းကို လှမ်းဆက်တဲ့အချိန် ဖုန်းကို ဆက်လို့ မရတော့တာ” ဟု နီးစပ်သူတစ်ဦးက ဆိုသည်။
အဆိုပါ ယာဉ်မောင်း၏ တယ်လီဖုန်းသို့ ဇွန်လ ၇ ရက် နံနက်ပိုင်း ၇ နာရီခွဲ အချိန်ခန့်တွင် မည်သည့်နေရာသို့သွားနေကြောင်း သိလိုသည့်အတွက် ဖုန်းဆက်မရရာက စတင်ကာ ပျောက်ဆုံးကြောင်းကို သိရခြင်းဖြစ်ပြီး ဖုန်း GPS က နံနက် ၆ နာရီအချိန်တွင် မြောက်ဥက္ကာလာပမြို့နယ်၊ ဓမ္မာရုံမှတ်တိုင်အနီး စကားဝါလမ်းထိပ်တွင် ရှိခဲ့သည်ဟု ပြသည့်အတွက် အဆိုပါ နေရာသို့လည်း သွားရောက်ခဲ့သေးကြောင်း ၎င်းက ဆိုသည်။
“ရဲစခန်းမှာတော့ အမှုဖွင့်ထားပါတယ်။ ကားပျောက်၊ လူပျောက်ပေါ့။ ရပ်ကွက်ရုံးမှာလည်း အကြောင်းကြားထားပါတယ်” ဟု ၎င်းက ရှင်းပြသည်။
အဆိုပါ ကိစ္စနှင့် ပတ်သက်ပါက သိရှိရလျှင် ဖုန်းနံပတ် 09795293098/ 09266153100/ 09772929112 တို့ကို ဆက်သွယ်အကြောင်းကြားစေလိုကြောင်းလည်း မိသားစုက အသိပေးထားသည်။
