၈. ၆. ၂၀၂၃
Written by Nay Moe
BPLA မှ စံပြရဲဘော်ဆုရမင်းချစ်ဦး တပ်မဟာ (၅) နယ်မြေရှိ တပ်စခန်းတစ်ခုကို ညဘက်တွင် အလစ်အငိုက် သွားရောက်တိုက်ခိုက်စဥ် ကျည်ထိမှန် သေဆုံးခဲ့သည်ဟု သိရသည်။
ကရင်အမျိုးသားလွတ်မြောက်ရေးတပ်မတော်(KNLA) နှင့် ဗမာပြည်သူ့လွတ်မြောက်ရေးတပ်တော်(BPLA)တို့ပါဝင်သော ပူးပေါင်းအဖွဲ့သည် တပ်မဟာ(၅)နယ်မြေအတွင်းရှိ လခရစခန်းတစ်ခုအား ပြီးခဲ့သော ဇွန်လ ၅ ရက်နေ့ ညပိုင်းတွင် ဝင်ရောက်တိုက်ခိုက်ခဲ့ရာ တိုက်ပွဲအတွင်း ရဲဘော် မင်းချစ်ဦး(ကိုယ်ပိုင်အမှတ် BA – 00047)သည် သေဆုံးခဲ့သည်ဟု BPLA က ကြေညာသည်။
ရဲဘော်မင်းချစ်ဦးသည် အခြေခံစစ်ပညာ၊ သင်တန်းနည်းပြဆရာတစ်ဦးဖြစ်ပြီး NCO အကြပ်သင်တန်းတက်ရောက်ရာတွင်လည်း စံပြရဲဘော်ဆု ရရှိခဲ့သူဖြစ်သည်ဟု BPLA က ဆိုသည်။
“ကျွန်တော် အဆင်မပြေပါဘူး။ ချစ်ဦးဆိုတာ ကျွန်တော် ယုံကြည်အားထားရဆုံးတပ်မှူးတစ်ဦးပါ။ ယူကြုံးမရဖြစ်ရပါတယ်”ဟု BPLA ထူထောင်သူကဗျာဆရာမောင်ဆောင်းခက မှတ်ချက်ပြုသည်။
တပ်စခန်းအား ညဘက်တွင် အလစ်ချောင်း၍ သွားပစ်သော်လည်း ကျည်ထိသေဆုံးရသူမင်းချစ်ဦး၏ အလောင်းကို တောတွင်းတစ်နေရာတွင် ဇွန်လ ၇ ရက်ကမြေမြှုပ်ခဲ့ပြီး KNLA နှင့် BPLA တို့ အလစ်တိုက်သည့် စခန်းနှင့်ပတ်သက်၍မူ စခန်းရမရ တိုက်ခိုက်သူတို့က သတင်းထုတ်ပြန်မှုမရှိချေ။
