၂၅. ၅. ၂၀၂၃
Written by Nay Moe
ရန်ကုန်တိုင်းဒေသကြီး၊ အလုံမြို့နယ်၊ ကမ်းနားလမ်းရှိ သခင်မြပန်းခြံအတွင်း၌ ယနေ့ မေလ ၂၅ ရက်တွင် ဗုံးပေါက်ကွဲမှု နှစ်ကြိမ်ဖြစ်ပွားခဲ့ကြောင်းသိရသည်။
ဖြစ်စဥ်မှာ ယနေ့နံနက် ၁၀ နာရီခွဲခန့်က သခင်မြပန်းခြံအတွင်းရှိ ရေတမာပင်၊ ပန်းခြံမြက်ခင်းပြင်နှင့် အမှိုက်ပုံးအနီးတွင် ကြွပ်ကြွပ်အိတ်အနက်သုံးလုံးကို မသင်္ကာဖွယ်တွေ့ရှိမှုအရ ပန်းခြံအတွင်းရှိ ပြည်သူများကို အသွားအလာကန့်သတ်စဥ် နံနက် ၁၁ နာရီခန့်တွင် ရေတမာပင်အောက်နှင့် မြက်ခင်းပြင်ရှိ ကြွပ်ကြွပ်အိတ်များအတွင်းမှ ပေါက်ကွဲမှုနှစ်ကြိမ် ဖြစ်ပွားခဲ့ကြောင်း သိရသည်။
“လုံခြုံရေးတပ်ဖွဲ့က စစ်ဖို့ရောက်လာချိန်မှာပဲ ဗုံးကနှစ်လုံးဆင့်ပေါက်သွားတာ။ ကံကောင်းတာက အိတ်တွေ စတွေ့ကတည်းက လူတွေက ဝေးရာပြေးကြတော့ ထိခိုက်သူတော့ မရှိလိုက်ဘူး။ ကျွန်တော်က ၅၆ (YBS-56) ပေါ်ကနေ ကြည့်နေတာ။ ပေါက်ကွဲသံကတော့ တော်တော့်ကိုကျယ်တာ။ နားပါအခုထိအူနေတုန်း” ဟု အဆိုပါဖြစ်စဥ်ကို မြင်သိခဲ့သူတစ်ဦးက MT News သို့ ပြောသည်။
ထိုဗုံးနှစ်လုံးဆင့်ပေါက်ကွဲမှုကြောင့် လူအထိအခိုက်မရှိကြောင်းသိရပြီး လက်ရှိအချိန်အထိ အနီးပတ်ဝန်းကျင်တွင် လုံခြုံရေးတပ်ဖွဲ့ဝင်များက စုံစမ်းစစ်ဆေးနေသည်ဟုလည်း သိရသည်။
