၂. ၄. ၂၀၂၃
Written by Nay Aung
မြန်မာ့နိုင်ငံရေးအခက်အခဲကို အဖြေရှာနိုင်ရန် ကြိုးပမ်းမှုများကို မြန်မာနိုင်ငံ၏လုပ်ငန်းစဉ်များမှတစ်ဆင့် မြန်မာကိုယ်တိုင် ဦးဆောင်လုပ်ကိုင်ရမည်ဖြစ်ကြောင်း အာဆီယံအထွေထွေအတွင်းရေးမှူး ချုပ် Dr. Kao Kim Hourn က ထုတ်ဖော်ပြောဆိုလိုက်သည်။
အာဆီယံအထွေထွေအတွင်းရေးမှူးချုပ်သည် ထိုင်းနိုင်ငံသို့ ရောက်ရှိနေချိန်အတွင်း မြန်မာနိုင်ငံရေး အခက်အခဲနှင့်ပတ်သက်ပြီး ယင်းကဲ့သို့ပြောဆိုလိုက်ခြင်းဖြစ်ကြောင်း သိရသည်။ မြန်မာ့နိုင်ငံရေးပဋိပက္ခများက ခက်ခဲရှုပ်ထွေးပြီး အလျင်စလို ဖြေရှင်းနိုင်မည်ဟုမမျှော်လင့်သင့်ကြောင်း အာဆီယံအထွေထွေအတွင်း ရေးမှူးချုပ်ကပြောသည်။
၎င်းက” မြန်မာပြည်သူတွေဟာ သူတို့ရဲ့အနာဂတ်ကို သူတို့ကိုယ်တိုင် ဆုံးဖြတ်ရမှာဖြစ်တယ်။ အာဆီယံအဖွဲ့ကြီးဟာ တွေ့ဆုံဆွေးနွေးမှုတွေဖြစ်လာအောင် စီစဉ်ဆောင် ရွက်ရတာတွေနဲ့ အခြားအကူအညီတွေသာလုပ်ပေးနိုင်မှာဖြစ်တယ်” ဟု ဆိုသည်။
မြန်မာ့နိုင်ငံရေးပြဿနာနှင့်ပတ်သက်ပြီး အာဆီယံအဖွဲ့ ၏ရပ်တည်ချက်မှာ ပြည်တွင်းရေးကို ကြားဝင်မစွက်ဖက်ရဆိုသော မူဝါဒအတိုင်း ရပ်တည်သော်လည်း မြေပြင်တွင် အကြမ်းဖက်မှုများ ရပ်တန့်နိုင်ရန် မြန်မာနိုင်ငံကို ကူညီပေးသွားမည်ဖြစ်ကြောင်း အင်ဒိုနီးရှားနိုင်ငံကလည်း မြန်မာ့နိုင်ငံရေး အခက်အခဲများကို ဖြေရှင်းနိုင်ရန် သတိထားပြီး သံတမန်ရေးလမ်းကြောင်းများမှတစ်ဆင့် ကြိုးပမ်းမှုများတွင် ပါဝင်လုပ်ဆောင်လျက်ရှိနေကြောင်း ၎င်းကပြောသည်။
အာဆီယံအဖွဲ့အနေဖြင့် မြန်မာ့နိုင်ငံရေးအခက်အခဲများကို ဖြေရှင်းနိုင်ရေးနှင့်ပတ်သက်ပြီး အကောင်းဘက်ကရှုမြင်ထားဆဲဖြစ်ကာ နစက တာဝန်ရှိသူများနှင့် အပြည့်အဝ စေ့စပ်ဆွေးနွေးမှုများလုပ်ဆောင်မည်ဖြစ်ကြောင်း အာဆီယံအထွေထွေအတွင်းရေးမှူးချုပ်ကပြောသည်။
အာဆီယံအဖွဲ့အနေဖြင့် မြန်မာ့နိုင်ငံရေးပြဿနာနှင့် ပတ်သက်ပြီး အာဆီယံကြေညာစာတမ်းပါ သတ်မှတ်ချက်များအတိုင်း လုပ်ဆောင်မည်ဖြစ်သလို အာဆီယံအဖွဲ့ဝင်နိုင်ငံများ၏ အများဆန္ဒအတိုင်း သဘောတူညီချက်များကို အပြောင်းအလဲလုပ်ရန် ဆန္ဒမရှိကြောင်း အာဆီယံအထွေထွေအတွင်းရေးမှူးချုပ်က ပြောသည်။
Ref—- thaipbsworld
