သက်တံ့
၂၉. ၁၀. ၂၀၂၆
မြန်မာနိုင်ငံဘက်ခြမ်းမှ တိုက်ပွဲများကြောင့် လက်နက်ကြီးကျည်များနှင့် သေနတ်ကျည်များ ထိုင်းနိုင်ငံ မဲဆောက်မြို့နယ်ဘက်သို့ ကျရောက်ပေါက်ကွဲခဲ့ပြီး နေအိမ် ၂၀ ကျော် ပျက်စီးကာ ထိုင်းအမျိုးသမီးတစ်ဦး ထိခိုက်ဒဏ်ရာရရှိခဲ့ပြီးနောက် ယနေ့ (အောက်တိုဘာ ၂၉ ရက်) နံနက်ပိုင်းတွင် ထိုင်းစစ်တပ်က မြန်မာနယ်စပ်တစ်လျှောက် သတိပေးကျည် ၂ ချက် ပစ်ခတ်ခဲ့သည်။
အဆိုပါ တိုက်ပွဲမှာ မဲဆောက်ခရိုင်၊ မဟာဝမ် (Maha Wan) ခရိုင်ခွဲ၏ ဆန့်ကျင်ဘက် မြန်မာနိုင်ငံ မြဝတီမြို့နယ်၊ မင်းလက်ပံ (Min La Pan) ကျေးရွာအနီးတွင် ဖြစ်ပွားခဲ့ခြင်း ဖြစ်သည်။ မြန်မာအစိုးရတပ်များနှင့် လက်နက်ကိုင်များအကြား အပြန်အလှန် ပစ်ခတ်မှုများ ဆက်လက်ဖြစ်ပွားနေပြီး လက်နက်ကြီးများကိုလည်း အလှည့်ကျ အသုံးပြုနေကြသည်။
မဟာဝမ်ရှိ နေအိမ်အတွင်း ခိုလှုံနေစဉ် မော်တာကျည်တစ်လုံး ကျရောက်ပေါက်ကွဲခဲ့မှုကြောင့် အသက် ၅၅ နှစ်အရွယ် ထိုင်းနိုင်ငံသူ လမ်ယောင်း (Lamyong) မှာ ဒဏ်ရာရရှိခဲ့သည်။ ယင်းပေါက်ကွဲမှုကြောင့် မီးလောင်ကျွမ်းမှုဖြစ်ပွားပြီး နေအိမ်လည်း ထိခိုက်ပျက်စီးခဲ့ကာ သူမ၏ လက်နှင့် ကျောဘက်တို့တွင်လည်း ကျည်စထိမှန် ဒဏ်ရာများ ရရှိခဲ့သည်။
သူမကို ဆေးကုသမှုခံယူရန် မဲဆောက်ဆေးရုံသို့ ပို့ဆောင်ခဲ့ပြီး နောက်ပိုင်းတွင် ဘေးကင်းသည့် အခြေအနေတွင် ရှိနေကြောင်း သတင်းရရှိခဲ့သည်။
အလားတူ အသက် ၁၄ နှစ်အရွယ် ကလေးငယ်တစ်ဦးမှာလည်း အိပ်ပျော်နေစဉ် နေအိမ်အမိုးပြားပေါ်သို့ ကျည်ဆန်ကျရောက် ထိမှန်ခဲ့သဖြင့် ထိခိုက်ဒဏ်ရာရရှိခဲ့သည်။ သို့သော် ၎င်းမှာ ပြင်းထန်သော ဒဏ်ရာရရှိခြင်းမှ လွတ်မြောက်ခဲ့ကြောင်း သိရသည်။
မဟာဝမ်အတွင်း ထိခိုက်ခံစားရသည့် ဒေသများကို သွားရောက်စစ်ဆေးခဲ့ကြသည့် တာဝန်ရှိသူများက ကျေးရွာသုံးရွာရှိ နေအိမ် ၂၀ ကျော် ထိခိုက်ပျက်စီးခဲ့ကြောင်း တွေ့ရှိခဲ့ကြသည်။ နေအိမ်တစ်လုံးမှာ မော်တာကျည် ထိမှန်ခဲ့ပြီး အခြားနေအိမ်တစ်လုံးမှာလည်း မပေါက်ကွဲသေးသည့် ဒုံးကျည် (RPG) တစ်လုံး ထိမှန်ခဲ့သည်။ ကျန်ပျက်စီးမှု အများစုမှာ အမိုးများကို သေးငယ်သော လက်နက်ငယ်ကျည်များ ထိမှန်ခဲ့ခြင်း ဖြစ်သည်။
ယနေ့ နံနက် ၆ နာရီခန့်တွင် ရတ်ချမနူ (Ratchamanu) တပ်ဖွဲ့သည် စစ်ရေးစည်းမျဉ်း (ROE) နှင့်အညီ မီးခိုးထုတ်ကျည်တစ်လုံးနှင့် အလင်းပြကျည်တစ်လုံး အပါအဝင် သတိပေးကျည် ၂ ချက်ကို ပစ်ခတ်ခဲ့သည်။
နယ်စပ်ဖြတ်ကျော်လာသည့် ကျည်ဆံများ ထပ်မံမရောက်ရှိစေရန်နှင့် လက်နက်အသုံးပြုရာတွင် ပိုမိုဂရုစိုက်ကြရန် နယ်စပ်တစ်ဖက်ခြမ်းရှိ တပ်ဖွဲ့များကို သတိပေးရန် ရည်ရွယ်ခြင်း ဖြစ်သည်။
မင်းလက်ပံအနီးတစ်ဝိုက် တိုက်ပွဲများမှာ ဆက်လက်ဖြစ်ပွားနေဆဲဖြစ်ပြီး ခြေလျင်တပ်ရင်းအများအပြားမှ မြန်မာတပ်ဖွဲ့များက ရွာကို ဝိုင်းရံထားကြောင်း သတင်းများ ထွက်ပေါ်နေသည်။ အနီးအနားတွင် ပေါက်ကွဲသံများ ကြားရသဖြင့် ထိုင်းဘက်ခြမ်းရှိ ဒေသခံအချို့မှာ ဘေးလွတ်ရာသို့ ထွက်ပြေးတိမ်းရှောင်ခဲ့ကြသည်။
နောက်ပိုင်းတွင် ရတ်ချမနူ တပ်ဖွဲ့မှူးက လမ်ယောင်းထံ သွားရောက်တွေ့ဆုံခဲ့ပြီး ဆေးကုသမှုအတွက် ထောက်ပံ့ငွေများ ပံ့ပိုးပေးခဲ့သည်။ ပျက်စီးသွားသော သူမ၏ နေအိမ် ပြန်လည်ပြုပြင်ရေးအတွက် ကူညီဆောင်ရွက်ပေးမည့် ကိစ္စရပ်များကိုလည်း တာဝန်ရှိသူများက ဆွေးနွေးခဲ့ကြသည်။
မဲဆောက်မြို့နယ် တာဝန်ရှိသူများက ထိခိုက်ခံစားရသည့် ဒေသခံများအား ဆက်လက်ကူညီပေးခြင်းနှင့် ပျက်စီးဆုံးရှုံးမှုများကို ဆက်လက်ဆန်းစစ်နေကြပြီး ထိုင်းစစ်သားများ၊ နယ်ခြားစောင့်ရဲတပ်ဖွဲ့ဝင်များနှင့် ဒေသန္တရ လုံခြုံရေးအဖွဲ့များကလည်း နယ်စပ်တစ်လျှောက် ဆက်လက် တပ်စွဲထားဆဲ ဖြစ်သည်။
Ref: Khaosod
About the Author
