သက်တံ့
၁၇. ၉. ၂၀၂၆
ထိုင်းနိုင်ငံသား မဟုတ်သူများ သို့မဟုတ် မြို့နယ်လူဦးရေစာရင်း မှတ်ပုံတင်မရှိသေးသူများအတွက် ရည်ရွယ်သည့် ထိုင်းအမှတ်အသား ကတ်ပြားများကို မြန်မာနိုင်ငံမှလာသူများ ရရှိသွားအောင် ဆောင်ရွက်ပေးခဲ့သည်ဟု ဆိုသည့် ကော့စမွီမြို့နယ်မှ ပန်းရောင်ကတ် တရားမဝင် ပြုလုပ်ပေးမှု သံသယဖြစ်စဉ်တွင် ထိုင်းအရာရှိများ ပါဝင်ပတ်သက်နေ၍ စုံစမ်းစစ်ဆေးသူများက သံသယရှိသူ ၁၃ ဦးကို ပစ်မှတ်ထား အရေးယူဆောင်ရွက်လျက်ရှိသည်။
ပြည်ထဲရေးဝန်ကြီးဌာန ပြည်နယ်အုပ်ချုပ်ရေးဦးစီးဌာန၏ DOPA N.I.C.E. အဖွဲ့သည် ဆူရတ်ဌာနီ ရဲတပ်ဖွဲ့၊ ကော့စမွီအရာရှိများနှင့် ပူးပေါင်း၍ စက်တင်ဘာ ၁၆ ရက်နေ့တွင် ဝင်ရောက်စီးနင်းမှုများ ပြုလုပ်ခဲ့သည်။ စစ်ဆင်ရေးအပြီးတွင် သံသယရှိသူ ၁၂ ဦးကို ဖမ်းဆီးရမိခြင်း သို့မဟုတ် လာရောက်အပြစ်ခံယူခြင်းတို့ ပြုလုပ်ခဲ့ပြီး ကော့စမွီ စည်ပင်သာယာရေးအဖွဲ့၏ အကြီးတန်းအရာရှိဟောင်း တစ်ဦးကလည်း စက်တင်ဘာ ၁၇ ရက်နေ့တွင် လာရောက်အပြစ်ခံယူမည်ဟု စုံစမ်းစစ်ဆေးသူများကို ပြောကြားခဲ့သည်။
ဖမ်းဆီးထိန်းသိမ်းနိုင်ခဲ့သူများတွင် ကော့စမွီမြို့နယ် စည်ပင်သာယာရေးအဖွဲ့မှ မှတ်ပုံတင်နှင့် ကတ်ပြားထုတ်ပေးရေး အရာရှိတစ်ဦး၊ ယခုအစီအစဉ်ကို အားပေးကူညီခဲ့သည်ဟု စွပ်စွဲခံထားရသူ ထိုင်းနိုင်ငံသား သံသယရှိသူ လေးဦးနှင့် အာဏာပိုင်များက ဘင်္ဂါလီများအဖြစ် အတည်ပြုထားသည့် မြန်မာနိုင်ငံမှလာသူ ခုနစ်ဦးတို့ ပါဝင်သည်။ အဆိုပါ နိုင်ငံခြားသား သံသယရှိသူ ခုနစ်ဦးကို ဘော့ဖွတ် (Bo Phut) ရှိ နေအိမ်များတွင် ဖမ်းဆီးရမိခဲ့ခြင်းဖြစ်သည်။
မြန်မာနိုင်ငံမှလာသူများသည် မည်သည့်နည်းဖြင့် ရယူထားမှန်း မသိရှိရသေးသည့် ပတ်စပို့များ ကိုင်ဆောင်ထားပြီးဖြစ်သော်လည်း ထိုင်းနိုင်ငံ၏ မြို့နယ်လူဦးရေစာရင်း မှတ်ပုံတင်စနစ်အတွင်း ထည့်သွင်းခံရစေရန်အတွက် မည်သူမည်ဝါဖြစ်ကြောင်း သက်သေခံ စာရွက်စာတမ်းမျှ မရှိပါဟု လိမ်လည်တင်ပြခဲ့ကြသည်ဟု စုံစမ်းစစ်ဆေးသူများက စွပ်စွဲထားသည်။
စည်ပင်သာယာရေးအဖွဲ့က လျှောက်လွှာများကို စိစစ်ဆောင်ရွက်ပေးပြီးနောက် လျှောက်ထားသူများကို သုညဖြင့်စသည့် ပန်းရောင်ကတ်များအတွက် ဓာတ်ပုံရိုက်ရန် ခရိုင်ရုံးသို့ စေလွှတ်ခဲ့သည်ဟု စုံစမ်းစစ်ဆေးသူများက ဆိုသည်။ စည်ပင်သာယာရေးအဖွဲ့က ထောက်ပံ့သည့် စာရွက်စာတမ်း မှတ်တမ်းများကို အတည်ပြုပြီးနောက် ခရိုင်ရုံးက အဆိုပါကတ်များကို ထုတ်ပေးခဲ့ခြင်းဖြစ်သည်။
ပန်းရောင်ကတ်များသည် ထိုင်းနိုင်ငံသား မဟုတ်သည့် အချို့သော လူပုဂ္ဂိုလ်များအတွက် ထုတ်ပေးသည့် မည်သူမည်ဝါဖြစ်ကြောင်း သက်သေခံ စာရွက်စာတမ်းများ ဖြစ်ကြသည်။ အဆိုပါ ကတ်များတွင် သုည (0) သို့မဟုတ် သုညနှစ်လုံး (00) ဖြင့် စတင်သည့် ၁၃ ဂဏန်းပါ မည်သူမည်ဝါဖြစ်ကြောင်း အမှတ်စဉ် ပါဝင်ပြီး ဆေးရုံများ၊ အစိုးရရုံးများနှင့် ဘဏ်များတွင် ဆက်သွယ်ဆောင်ရွက်ခြင်း၊ SIM ကတ်များ ဝယ်ယူခြင်းနှင့် သက်ဆိုင်ရာ စည်းမျဉ်းများအောက်တွင် နိုင်ငံအတွင်း ခရီးသွားလာခြင်း အပါအဝင် နေ့စဉ် မည်သူမည်ဝါဖြစ်ကြောင်း သက်သေပြရာတွင် သုံးစွဲနိုင်၏။
သို့သော် အဆိုပါ ကတ်များသည် ထိုင်းနိုင်ငံသားအခွင့်အရေး၊ မဲပေးပိုင်ခွင့် သို့မဟုတ် ထိုင်းနိုင်ငံသားတစ်ဦး၏ ဥပဒေကြောင်းအရ ရရှိသည့် အခွင့်အရေးများနှင့် တူညီသည့် အနေအထားကို မပေးအပ်ပေ။ ထို့အပြင် ယင်းကတ်ကို ကိုင်ဆောင်ထားရုံဖြင့် ဗီဇာ သို့မဟုတ် ရက် ၉၀ တိုင်း သတင်းပို့ရသည့် လူဝင်မှုကြီးကြပ်ရေးဆိုင်ရာ လိုအပ်ချက်များကို အလိုအလျောက် အစားထိုးနိုင်မည် မဟုတ်ပေ။
Ref: The Thaiger
About the Author
