သက်တံ့
၁၆. ၉. ၂၀၂၆
ထိုင်းနိုင်ငံ၊ ဥဒုံဌာနီပြည်နယ်၊ မောင်း (Mueang) ခရိုင်ရှိ အိပ်ခန်းတစ်ခုအတွင်း စက်တင်ဘာ ၁၅ ရက်နေ့က အသက် ၂၄ နှစ်အရွယ် ထိုင်းအမျိုးသမီးတစ်ဦး လည်ပင်း၌ လျှပ်စစ်ဝါယာကြိုးပတ်ကာ ဗလာကျင်းလျက်သား သေဆုံးနေမှုကို ရဲတပ်ဖွဲ့က စုံစမ်းစစ်ဆေးလျက်ရှိသည်။
ဘန်လွန် (Ban Luean) တိုက်နယ်ရှိ နှစ်ထပ်အဆောက်အအုံ၏ ငှားရမ်းထားသော ပထမထပ် အခန်းအမှတ် (၁) အတွင်း အသက် ၂၄ နှစ်အရွယ် ဖတ်ထရာဝရင် (Phattarawarin) သေဆုံးနေကြောင်း သတင်းရရှိသဖြင့် မောင်းဥဒုံဌာနီ ရဲစခန်းမှ အရာရှိများသည် မဲသာဓမ္မဖောင်ဒေးရှင်းမှ ကယ်ဆယ်ရေးဝန်ထမ်းများ၊ ဥဒုံဌာနီဆေးရုံမှ ဆေးအဖွဲ့တို့နှင့်အတူ အခင်းဖြစ်ပွားရာနေရာသို့ သွားရောက်စစ်ဆေးခဲ့ရာ ဖတ်ထရာဝရင်ကို ကြမ်းပြင်ပေါ်တွင် မှောက်ခုံအနေအထား၊ စောင်တစ်ထည် ခြုံပေးထားလျက်သား တွေ့ရှိခဲ့ရသည်။
သူမသည် အဝတ်အစားမရှိဘဲ ဗလာကျင်းနေပြီး လျှပ်စစ်ပလပ်ပေါက်နှင့် ဆက်သွယ်ထားသည့် အနက်ရောင် ဝါယာကြိုးဖြင့် လည်ပင်းကို တင်းကျပ်စွာ ပတ်ထားသည်ကို တွေ့ရသည်။ တင်ပါးတွင် ပွန်းရာအချို့ တွေ့ရှိရသော်လည်း အခြားပြင်ပဒဏ်ရာ လက္ခဏာများ မတွေ့ရှိရပေ။
မာတီချွန် (Matichon) သတင်း၏ ဖော်ပြချက်အရ အခန်းအတွင်း ပစ္စည်းများ ဖရိုဖရဲ ပြန့်ကျဲနေပြီး မွှေနှောက်ခံထားရသည့် လက္ခဏာများ တွေ့ရသည်။ အိမ်သာအတွင်း၌လည်း ရေဆွဲမချရသေးသည့် ဝမ်းသွားထားသည်များကို တွေ့ရှိခဲ့ရသည်။
သို့သော် ဖတ်ထရာဝရင်၏ တန်ဖိုးကြီးပစ္စည်းများနှင့် လက်ကိုင်ဖုန်းနှစ်လုံးမှာ အခန်းအတွင်း မပျောက်မပျက် ကျန်ရှိနေသေးသည်။
ရက်စက်စွာ သတ်ဖြတ်ခံရမှုဆိုင်ရာ ပဏာမ ရေခွဲစစ်ဆေးချက်များအရ ဖတ်ထရာဝရင်သည် အလောင်းမတွေ့ရှိမီ အချိန် ၂၀ နာရီခန့်ကပင် လည်ပင်းညှစ်ခံရပြီး သေဆုံးသွားခဲ့ခြင်းဖြစ်ကြောင်း သိရသည်။
ဖတ်ထရာဝရင်၏ အလောင်းကို စတင်တွေ့ရှိခဲ့သူမှာ သူမ၏ လုပ်ဖော်ကိုင်ဖက် အသက် ၃၀ အရွယ် ဂျိရပွန် (Jiraporn) ဖြစ်သည်။ ဖတ်ထရာဝရင်သည် ကုန်စုံဆိုင်တစ်ဆိုင်တွင် အလုပ်လုပ်ကိုင်သူဖြစ်ပြီး စက်တင်ဘာ ၁၄ ရက် (တနင်္လာနေ့) က ခွင့်တောင်းခဲ့ကြောင်း ဂျိရပွန်က ပြောကြားခဲ့သည်။
ဖတ်ထရာဝရင်သည် ထိုနေ့ နံနက် ၅ နာရီခန့်တွင် ဖျားနေသဖြင့် ခွင့်ယူကြောင်း အကြောင်းကြားခဲ့ပြီး နံနက် ၆ နာရီ ၄၅ မိနစ်အချိန်အထိ ဖုန်းဆက်သွယ်၍ ရသေးကြောင်း ဂျိရပွန်က ဆိုသည်။ နောက်တစ်နေ့တွင် အလုပ်ပြန်ဝင်ရန် မျှော်လင့်ထားသော်လည်း ရောက်ရှိမလာဘဲ မည်သူ့ကိုမျှ ဆက်သွယ်ခြင်း မရှိသဖြင့် ဂျိရပွန်က အခန်းသို့ သွားရောက်ကြည့်ရှုရာမှ သေဆုံးနေသည်ကို တွေ့ရှိခဲ့ခြင်းဖြစ်သည်။ ဖတ်ထရာဝရင်သည် အပျိုတစ်ဦးဖြစ်ပြီး မည်သူနှင့်မျှ ပြဿနာ သို့မဟုတ် ပဋိပက္ခရှိကြောင်း ပြောဆိုဖူးခြင်း မရှိဘဲ၊ အလုပ်ပင်ပန်းသည့်အကြောင်းသာ ပြောဆိုလေ့ရှိကြောင်း သိရသည်။
ဖတ်ထရာဝရင်၏ အသက် ၂၅ နှစ်အရွယ် သူငယ်ချင်းဖြစ်သူ တောင် (Tong) ကမူ သူမသည် အပြင်ထွက်ချိန် သို့မဟုတ် အိပ်ပျော်နေချိန်များတွင်ပင် အခန်းတံခါးကို သော့မခတ်ဘဲ ထားလေ့ရှိကြောင်း မာတီချွန်သတင်းသို့ ပြောကြားခဲ့သည်။ ဤသို့ပြုလုပ်ခြင်းသည် အန္တရာယ်ရှိနိုင်ကြောင်း သူက သတိပေးခဲ့သော်လည်း သူမက အကျင့်ကို ပြောင်းလဲခဲ့ခြင်းမရှိပေ။
ရဲတပ်ဖွဲ့၏ ပဏာမ သံသယအရ ဖတ်ထရာဝရင်သည် လည်ပင်းညှစ် မသတ်ဖြတ်ခံရမီ ကျူးလွန်သူအတွက် တံခါးဖွင့်ပေးခဲ့ခြင်း ဖြစ်နိုင်သည်ဟု ယူဆထားသည်။ စုံစမ်းစစ်ဆေးသူများသည် ကျူးလွန်သူကို ဖော်ထုတ်နိုင်ရန် အဆောက်အအုံနှင့် အနီးဝန်းကျင်ရှိ CCTV မှတ်တမ်းများကို စိစစ်ကြည့်ရှုလျက်ရှိသည်။
သတင်းထုတ်ပြန်ချိန်အထိ စုံစမ်းစစ်ဆေးမှုနှင့် ပတ်သက်သည့် အသေးစိတ် အချက်အလက်သစ်များကို ထပ်မံထုတ်ပြန်ခြင်း မရှိသေးပေ။
Ref: Thaiger
About the Author
