သက်တံ့
၁၇. ၈. ၂၀၂၆
မြန်မာနိုင်ငံအလယ်ပိုင်းတွင် ပြီးခဲ့သည့်နှစ် မတ်လက လှုပ်ခတ်ခဲ့သည့် ရစ်ချ်တာစကေး ၇ ဒသမ ၇ အဆင့်ရှိ အင်အားပြင်း မန္တလေးငလျင်ကြောင့် ပျက်စီးသွားခဲ့ရသည့် ဒုတိယကမ္ဘာစစ်အတွင်း ကျဆုံးခဲ့ကြသော ဂျပန်စစ်သည်များအား ရည်စူးပြုလုပ်ထားသော စစ်သင်္ချိုင်းအထိမ်းအမှတ် စေတီတော်နှင့် ကျောက်စာတိုင်များကို ပြန်လည်တည်ဆောက်ခြင်းနှင့် ပြုပြင်ခြင်း လုပ်ငန်းများကို စတင်လိုက်ပြီဖြစ်သည်။
စစ်ကိုင်းတိုင်းဒေသကြီးအတွင်းရှိ အဆိုပါ နေရာ၌ ဩဂုတ် ၁၅ ရက်နေ့က ပန္နက်တင် မင်္ဂလာအခမ်းအနား ပြုလုပ်ခဲ့ပြီး လုပ်ငန်းများ လုပ်ဆောင်နေသည့် ဒေသတွင်း ပုဂ္ဂလိက အဖွဲ့အစည်းမှ တာဝန်ရှိသူများ၊ မြန်မာနိုင်ငံဆိုင်ရာ ဂျပန်သံရုံးမှ တာဝန်ရှိသူများနှင့် အခြား ဖိတ်ကြားထားသူများ တက်ရောက်ခဲ့ကြသည်။
အဆိုပါ ပြန်လည်တည်ဆောက်ရေး လုပ်ငန်းများကို ၂၀၂၇ ခုနှစ် မတ်လတွင် ပြီးစီးရန် ပစ်မှတ်ထားထားသည်။
၁၉၇၆ ခုနှစ် ဝန်းကျင်တွင် တည်ဆောက်ခဲ့သည့် အဆိုပါ စေတီတော်မှာ အင်အားပြင်း ငလျင်ကြောင့် ပြင်းထန်စွာ ထိခိုက်ပျက်စီးခဲ့သည့်အတွက် အသစ်ပြန်လည် တည်ဆောက်သွားမည်ဖြစ်သည်။
ကျဆုံးသွားသည့် ဂျပန်စစ်သည်များ၏ အမည်များကို ရေးထွင်းထားသော ကျောက်စာတိုင်များသည်လည်း ငလျင်ကြောင့် အက်ကွဲကွဲထွက်သွားပြီး အချို့နေရာများတွင် စာဖတ်၍ မရတော့သဖြင့် ပြုပြင်ခြင်းနှင့် နေရာရွှေ့ပြောင်းခြင်း လုပ်ငန်းများကို ပြုလုပ်သွားမည်ဖြစ်သည်။
ယခုနှစ် ဧပြီလတွင် အဆိုပါ ဒေသတွင်း ပုဂ္ဂလိက အဖွဲ့အစည်းသည် စေတီတော်နှင့် ကျောက်စာတိုင်များ၏ အခြေအနေကို စစ်ဆေးရန် စမ်းသပ်လေ့လာမှုများ စတင်ခဲ့သည်။ ထို့အပြင် ဂျပန်နိုင်ငံ၏ ကူညီပံ့ပိုးမှုဖြင့် ကျဆုံးခဲ့သည့် ဂျပန်စစ်သည်များ၏ အမည်များကို အတည်ပြုနိုင်ရန်လည်း ဆောင်ရွက်ခဲ့သည်။
အဆိုပါ ပြန်လည်တည်ဆောက်ရေး လုပ်ငန်းများမှတစ်ဆင့် မြန်မာ-ဂျပန် နှစ်နိုင်ငံ ဆက်ဆံရေးကို ပိုမိုခိုင်မာနက်ရှိုင်းစေရန် မျှော်လင့်ကြောင်း အဆိုပါ အဖွဲ့အစည်း၏ အကြီးအကဲက ပြောကြားခဲ့သည်။
ဒုတိယကမ္ဘာစစ်အတွင်း ၁၉၄၄ ခုနှစ်က ဂျပန်အင်ပါယာ တပ်မတော်သည် အိန္ဒိယမြောက်ပိုင်းရှိ အင်ဖာ (Imphal) မြို့ကို သိမ်းပိုက်ရန် ကြိုးပမ်းခဲ့သည့် အင်ဖာတိုက်ပွဲ (Battle of Imphal) မအောင်မြင်ခဲ့ပြီးနောက် မြန်မာနိုင်ငံသည် တိုက်ပွဲများ ပြင်းထန်စွာ ဖြစ်ပွားရာ နယ်မြေနှင့် စစ်ဆုတ်လမ်းကြောင်း ဖြစ်လာခဲ့ကာ ဂျပန်စစ်သည် ၁၃၇,၀၀၀ ခန့် ကျဆုံးခဲ့ရသည်။
Ref: The Japan Times
About the Author
