သက်တံ့
၁၆.၈. ၂၀၂၆
ထိုင်းဒုတိယဝန်ကြီးချုပ်နှင့် နိုင်ငံခြားရေးဝန်ကြီး Sihasak Phuangketkeow က ကုန်သွယ်ရေးနှင့် ရင်းနှီးမြှုပ်နှံမှုများ တိုးမြှင့်နိုင်ရန်အတွက် ယူရေးရှား စီးပွားရေးသမဂ္ဂ (EAEU) နှင့် လွတ်လပ်သော ကုန်သွယ်ရေးသဘောတူညီချက် (FTA) စတင်ဆွေးနွေးနိုင်ရေး ရုရှားနိုင်ငံအနေဖြင့် ကူညီပံ့ပိုးပေးရန် တိုက်တွန်းတောင်းဆိုလိုက်သည်။
အဆိုပါ တောင်းဆိုမှုကို သြဂုတ်လ ၁၄ ရက်နေ့က မော်စကိုမြို့၌ ကျင်းပခဲ့သည့် (၉) ကြိမ်မြောက် ထိုင်း-ရုရှား ပူးတွဲကော်မရှင် အစည်းအဝေးအပြီးတွင် ပြုလုပ်ခဲ့ခြင်းဖြစ်ပြီး၊ အစည်းအဝေးတွင် စွမ်းအင်၊ စိုက်ပျိုးရေးနှင့် ခရီးသွားလုပ်ငန်း အပါအဝင် စီးပွားရေး ပူးပေါင်းဆောင်ရွက်မှုများ တိုးမြှင့်ရန် နှစ်ဖက်စလုံးက ဆွေးနွေးခဲ့ကြသည်။
ဝန်ကြီး Sihasak သည် နောက်တစ်ကြိမ် ဘန်ကောက်မြို့တွင် ကျင်းပမည့် (၁၀) ကြိမ်မြောက် ပူးတွဲကော်မရှင် အစည်းအဝေး၌ ဤဆွေးနွေးပွဲမှ ဆွေးနွေးမှုများကို ဆက်လက်အကောင်အထည်ဖော်ရန် ရည်ရွယ်ထားပြီး၊ ပူးပေါင်းဆောင်ရွက်မှု နယ်ပယ်သစ်များကို ရှာဖွေရန်နှင့် ထိုင်းအစားအသောက်နှင့် စိုက်ပျိုးရေးထုတ်ကုန်များအတွက် ဈေးကွက်ရရှိမှု တိုးချဲ့ရန်လည်း ကြိုးပမ်းလျက်ရှိသည်။
ထိုင်းနိုင်ငံနှင့် ယူရေးရှား စီးပွားရေးသမဂ္ဂ (EAEU) အကြား လွတ်လပ်သော ကုန်သွယ်ရေးသဘောတူညီချက် (FTA) ဆွေးနွေးပွဲများကို မကြာမီ စတင်နိုင်မည်ဟု မျှော်လင့်ရပြီး၊ ယင်းသည် အဆိုပါ အဖွဲ့အစည်းနှင့် ကုန်သွယ်ရေးတိုးမြှင့်ရန် အထောက်အကူပြုမည်ဖြစ်ကြောင်းလည်း Sihasak က ပြောကြားခဲ့သည်။
မော်စကိုမြို့တွင် ကျင်းပခဲ့သည့် (၉) ကြိမ်မြောက် ထိုင်း-ရုရှား နှစ်နိုင်ငံ ပူးပေါင်းဆောင်ရွက်ရေး ပူးတွဲကော်မရှင် အစည်းအဝေးအပြီး သတင်းစာရှင်းလင်းပွဲတွင် Sihasak က ထိုင်း-EAEU လွတ်လပ်သော ကုန်သွယ်ရေး သဘောတူညီချက်ဆိုင်ရာ ဆွေးနွေးပွဲများ စတင်နိုင်ရေး ကြိုးပမ်းမှုများကို ကူညီပေးရန် ရုရှားထံ တောင်းဆိုခဲ့ကြောင်း ပြောကြားခဲ့သည်။
ထိုင်းနိုင်ငံအနေဖြင့် ယခုသဘောတူညီချက် ရရှိရေးအတွက် ကြိုးပမ်းရန် ဆန္ဒရှိသည်မှာ ကြာပြီဖြစ်ကြောင်းနှင့် ယခုဆွေးနွေးပွဲများသည် EAEU အဖွဲ့ဝင်နိုင်ငံများနှင့် ကုန်သွယ်မှု တိုးတက်စေရန် အထောက်အကူပြုမည်ဟု မျှော်လင့်ကြောင်း ၎င်းက ဆိုသည်။
ထို့အပြင် Sihasak က အစည်းအဝေး ရလဒ်များအပေါ် ကျေနပ်မှုရှိကြောင်းနှင့် နောက်နှစ် ဘန်ကောက်မြို့တွင် ကျင်းပမည့် (၁၀) ကြိမ်မြောက် ပူးတွဲကော်မရှင် အစည်းအဝေးကို မျှော်လင့်လျက်ရှိကြောင်း ပြောကြားခဲ့သည်။
ယခု (၉) ကြိမ်မြောက် အစည်းအဝေးကို ရုရှား အရှေ့ဖျားဒေသနှင့် အာတိတ်ဒေသ ဖွံ့ဖြိုးတိုးတက်ရေးဆိုင်ရာ ဝန်ကြီး Alexey Chekunkov က ပူးတွဲသဘာပတိအဖြစ် ဆောင်ရွက်ခဲ့သည်။
နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ Jaithi Upakarnitikaset က Sihasak၏ ခရီးစဉ်သည် ခေါင်းဆောင်နှစ်ဦးအကြား ဆွေးနွေးခဲ့သည်များကိုအကောင်အထည်ဖော်ရန်နှင့် စီးပွားရေး ပူးပေါင်းဆောင်ရွက်မှု (အထူးသဖြင့် EAEU နှင့် FTA ဆွေးနွေးပွဲများ စတင်နိုင်ရေး ကြိုးပမ်းမှု) အပေါ် ထိုင်းနိုင်ငံ၏ နိုင်ငံရေးအရ ကတိကဝတ်ပြုမှုကို ပြသခြင်းဖြစ်ကြောင်း ပြောကြားခဲ့သည်။
ဆွေးနွေးပွဲများ စတင်နိုင်ရေးအတွက် နှစ်ဖက်အကြား ဆက်လက်ဆွေးနွေးရန်နှင့် အကောင်အထည်ဖော်ရန် လိုအပ်ဦးမည်ဖြစ်ပြီး ထိုင်းနိုင်ငံအနေဖြင့်လည်း ယခုကိစ္စရပ် တိုးတက်မှုရှိစေရန် ဆက်လက် တွန်းအားပေးသွားမည်ဖြစ်ကြောင်း ၎င်းက ဆိုသည်။
Jaithi ၏ ပြောကြားချက်အရ အစည်းအဝေး၏ အဓိက အာရုံစိုက်မှုမှာ နယ်ပယ်သစ်များသို့ ကုန်သွယ်ရေးနှင့် ရင်းနှီးမြှုပ်နှံမှုများ တိုးချဲ့ရေး အပါအဝင် စီးပွားရေး ပူးပေါင်းဆောင်ရွက်မှုများ ဖြစ်သည်။
သုံးနှစ်အကြာမှ ပြန်လည်ကျင်းပနိုင်ခဲ့သည့် ယခုအစည်းအဝေးသည် နှစ်နိုင်ငံအကြား မဖြေရှင်းရသေးသည့် ကိစ္စရပ်များကို ဖြေရှင်းရန်နှင့် ပူးပေါင်းဆောင်ရွက်မှု နယ်ပယ်သစ်များကို ရှာဖွေရန် အခွင့်အလမ်းတစ်ခု ဖြစ်စေခဲ့သည်။ ထို့အပြင် ထိုင်းလုပ်ငန်းရှင်များအတွက် အခွင့်အလမ်းသစ်များ ဖန်တီးပေးရန်၊ ကုန်သွယ်ရေး၊ ရင်းနှီးမြှုပ်နှံမှုနှင့် ဆက်သွယ်ရေးတို့ကို မြှင့်တင်ရန် ထိုင်းနိုင်ငံ၏ စီးပွားရေးသံတမန်ရေးရာ ကြိုးပမ်းမှု အစိတ်အပိုင်းတစ်ခုလည်း ဖြစ်သည်။
အဆိုပါ ကိုယ်စားလှယ်အဖွဲ့တွင် ထိုင်းကုန်သည်ကြီးများအသင်း၊ ထိုင်းစက်မှုလက်မှုလုပ်ငန်းရှင်များအသင်း၊ ထိုင်း-ရုရှား စီးပွားရေးကောင်စီတို့မှ အမှုဆောင်များနှင့် စိုက်ပျိုးရေး၊ အစားအသောက်၊ စွမ်းအင်၊ ကျန်းမာရေးထုတ်ကုန်၊ သတင်းအချက်အလက်နှင့် ဆက်သွယ်ရေးနည်းပညာ (ICT)၊ မော်တော်ယာဉ်နှင့် မော်တော်ယာဉ်အပိုပစ္စည်း ကဏ္ဍများမှ ထိပ်တန်း ထိုင်းကုမ္ပဏီများ ပါဝင်ခဲ့ကြသည်။
၎င်းတို့သည် နောက်ထပ် စီးပွားရေး ပူးပေါင်းဆောင်ရွက်မှု အခွင့်အလမ်းများကို ရှာဖွေရန် ရုရှားနိုင်ငံမှ စီးပွားရေးလုပ်ငန်းရှင်များနှင့် ဆွေးနွေးမှုများ ပြုလုပ်ခဲ့ကြသည်။
ထိုင်းနိုင်ငံအနေဖြင့် ထိုင်းစိုက်ပျိုးရေးနှင့် အစားအသောက် ထုတ်ကုန်များအတွက် ဈေးကွက်ပိုမိုရရှိရန် ကြိုးပမ်းခဲ့သလို နှစ်ဖက်စလုံးက ပို့ဆောင်ဆက်သွယ်ရေး၊ သယ်ယူပို့ဆောင်ရေး (Logistics)၊ ခရီးသွားလုပ်ငန်းနှင့် စီးပွားရေး ချိတ်ဆက်မှုများကိုလည်း ဆွေးနွေးခဲ့ကြသည်။
ရုရှားသည် ထိုင်းနိုင်ငံအတွက် အရေးပါသော ခရီးသွားဈေးကွက်တစ်ခုဖြစ်ပြီး နှစ်စဉ် ရုရှားခရီးသွား ၂ သန်းခန့် လာရောက်လည်ပတ်လျက်ရှိကြောင်း Jaithi က ပြောသည်။
ထို့အပြင် နှစ်နိုင်ငံအကြား သန့်ရှင်းသောစွမ်းအင် အပါအဝင် စွမ်းအင်ဆိုင်ရာ ပူးပေါင်းဆောင်ရွက်နိုင်ခြေများနှင့် စွမ်းအင်လုံခြုံရေးဆိုင်ရာ ကိစ္စရပ်များကိုလည်း ဆွေးနွေးခဲ့ကြသည်။
ရုရှားနိုင်ငံဘက်ကလည်း ယခုနှစ်တွင် ကျင်းပမည့် Eastern Economic Forum (Vladivostok) နှင့် ၂၀၂၇ ခုနှစ်တွင် ကျင်းပမည့် St. Petersburg International Economic Forum တို့သို့ တက်ရောက်ရန် ထိုင်းကိုယ်စားလှယ်များကို ဖိတ်ကြားခဲ့သည်။
Ref: Bangkok Post
About the Author
