ထိုင်းနိုင်ငံ၊ လမ်ပန်းမြို့ရှိ နေအိမ်တွင် ဇနီးမောင်နှံနှစ်ဦး သေဆုံးနေသည်ကို တွေ့ရှိ၊ မယားကို သတ်ပြီး ကိုယ့်ကိုယ်ကိုယ် သေကြောင်းကြံစည်မှု ဟုတ်၊ မဟုတ် ရဲတပ်ဖွဲ့ စုံစမ်းစစ်ဆေးနေ

သက်တံ့

၁၅. ၈. ၂၀၂၆

ထိုင်းနိုင်ငံ၊ လမ်ပန်းမြို့ (Lampang) အလယ်ပိုင်းရှိ နှစ်ထပ် နေအိမ်/ဆိုင်ခန်းတစ်ခုအတွင်း၌ ဇနီးမောင်နှံနှစ်ဦး သေဆုံးနေသည်ကို ကြာသပတေးနေ့ ညပိုင်းတွင် တွေ့ရှိခဲ့ရပြီး ၎င်းတို့ထံ ဖုန်းဆက်သွယ်၍ မရသဖြင့် ရင်သွေးဖြစ်သူက စိုးရိမ်ကာ သွားရောက်ကြည့်ရှုရာမှ တွေ့ရှိခဲ့ခြင်းဖြစ်ကြောင်း သိရသည်။

မူအန်းလမ်ပန်း (Mueang Lampang) ရဲစခန်းမှ ရဲတပ်ဖွဲ့ဝင်များသည် ဟူးဝိုင်အုပ်စု (Hua Wiang)၊ ရော့ဗ်ဝင်းလမ်း (Rob Wiang) ပေါ်ရှိ ဝပ်ဆရီကတ်ကျောင်းတိုက် (Wat Si Koet) မျက်နှာချင်းဆိုင် အဆိုပါ နေအိမ်/ဆိုင်ခန်း၌ လူသေဆုံးမှု ဖြစ်ပွားကြောင်း ဩဂုတ် ၁၄ ရက် ည ၈ နာရီခွဲခန့်တွင် သတင်းရရှိခဲ့ခြင်း ဖြစ်သည်။

အခင်းဖြစ်ပွားရာနေရာသို့ စုံစမ်းစစ်ဆေးသူများ၊ လမ်ပန်းဆေးရုံမှ ဆရာဝန်တစ်ဦး၊ ပြည်နယ် မှုခင်းဆရာဝန်များနှင့် စဝါးနခွန်လမ်ပန်း ကယ်ဆယ်ရေးအဖွဲ့တို့ ရောက်ရှိလာခဲ့ကြသည်။

နံနက်ပိုင်းကတည်းက ၎င်းတို့ ဇနီးမောင်နှံနှစ်ဦးထံ ဆက်သွယ်၍ မရတော့သဖြင့် သွေးသားတော်စပ်သူများကပါ သက်ဆိုင်ရာသို့ အကြောင်းကြားခဲ့ခြင်း ဖြစ်သည်။ ကယ်ဆယ်ရေးဝန်ထမ်းများက သော့ခတ်ထားသည့် ရှေ့တံခါးကို ရိုက်ဖွင့်၍ အဆောက်အအုံအတွင်းသို့ ဝင်ရောက်ခဲ့ကြသည်။

အဆောက်အအုံအတွင်း ဒုတိယထပ် လှေကားလက်ရန်းအနီးတွင် အသက် ၅၈ နှစ်အရွယ် “လက်ခ်” (Lek) ဟု အမည်ရသည့် အမျိုးသား၏ ရုပ်အလောင်းကို တွေ့ရှိခဲ့ရပြီး ၎င်းနှင့် အသက်ရွယ်တူ ဇနီးဖြစ်သူ၏ ရုပ်အလောင်းကိုမူ အိပ်ခန်းအတွင်းရှိ အိပ်ရာပေါ်တွင် သေဆုံးလျက် တွေ့ရှိခဲ့ရသည်။

အမျိုးသမီး၏ လည်ပင်းတွင် ဒဏ်ရာအမှတ်အသားများ တွေ့ရှိရပြီး အခန်းအတွင်း ကြိုးတစ်ချောင်းကိုလည်း တွေ့ရှိခဲ့ရကြောင်း ရဲတပ်ဖွဲ့က ပြောကြားသည်။

စုံစမ်းစစ်ဆေးသူများ၏ ပဏာမ ယူဆချက်အရ အဆိုပါ အမျိုးသားသည် ဇနီးဖြစ်သူကို သတ်ဖြတ်ခဲ့ပြီးမှ ကိုယ့်ကိုယ်ကိုယ် သေကြောင်းကြံစည်ခဲ့ခြင်း ဖြစ်နိုင်ကြောင်း သံသယရှိထားသည်။

သို့သော် သေမှုသေခင်းစစ်ဆေးမှု ရလဒ်များ၊ မှုခင်းဆေးပညာဆိုင်ရာ စစ်ဆေးချက်များနှင့် သက်သေများကို ထပ်မံစစ်ဆေးမေးမြန်းမှုများ မပြုလုပ်ရသေးမီ ဖြစ်စဉ်အသေးစိတ်ကို ဆက်လက်စုံစမ်းစစ်ဆေးနေဆဲဖြစ်ကြောင်း ရဲတပ်ဖွဲ့က ပြောသည်။

ထိုနေ့နံနက်ပိုင်းက မစ္စတာလက်ခ်သည် ၎င်း၏ ရင်သွေးဖြစ်သူထံ “နှုတ်ဆက်ပါတယ်” ဟု မက်ဆေ့ဂျ် ပို့ခဲ့ကြောင်း ရဲတပ်ဖွဲ့က သိရှိခဲ့ရသည်။ ထို့နောက်ပိုင်းတွင် မိသားစုက ၎င်းထံ ဆက်သွယ်၍ မရတော့သဖြင့် ညနေပိုင်းတွင် သက်ဆိုင်ရာသို့ သွားရောက်စစ်ဆေးပေးရန် အကူအညီတောင်းခံခဲ့ခြင်း ဖြစ်သည်။

အနီးအနားရှိ ဝပ်ဆရီကတ်ကျောင်းတိုက်မှ သံဃာတော်များ၏ မိန့်ကြားချက်အရ အဆိုပါ ဇနီးမောင်နှံသည် ကျောင်းတိုက်ရှိ သံဃာတော်များထံမှ တစ်ခါတစ်ရံ ဘတ် ၃၀၀ မှ ၅၀၀ အထိ နည်းပါးသော ငွေပမာဏများကို ခေတ္တခဏ ချေးငှားလေ့ရှိကြောင်း သိရသည်။ ဆရာတော်ကလည်း ၎င်းတို့၏ သစ်သီးဖျော်ရည်လုပ်ငန်းအတွက် အကူအညီဖြစ်စေရန် ဘတ် ၁,၀၀၀ ခန့် ယခင်က ထောက်ပံ့ပေးဖူးကြောင်း မိန့်ကြားသည်။

၎င်းတို့ ဇနီးမောင်နှံသည် ငွေကြေးများကို ပြန်လည်ပေးဆပ်လေ့ရှိပြီး နောက်ပိုင်းတွင် ထပ်မံချေးငှားလေ့ရှိကြောင်း သံဃာတော်များက မိန့်ကြားခဲ့သည်။

၎င်းတို့၏ ဖောက်သည်များနှင့် ပစ္စည်းပို့ဆောင်သူများ (Delivery Riders) ကမူ ဇနီးမောင်နှံနှစ်ဦးစလုံးသည် ဖော်ရွေပြီး ယဉ်ကျေးသူများဖြစ်ကြောင်း ပြောကြသည်။ ၎င်းတို့သည် သစ်သီးဖျော်ရည်များကို တစ်ခွက်လျှင် ဘတ် ၂၀ မှစ၍ ဈေးနှုန်းချိုသာစွာ ရောင်းချပေးသူများဖြစ်ပြီး ၎င်းတို့ကို သိရှိသူများက အခုလို ဖြစ်ရပ်မျိုး ဖြစ်လာလိမ့်မည်ဟု မျှော်လင့်မထားခဲ့ကြပေ။

ထို့ပြင် အဆိုပါ ဇနီးမောင်နှံသည် ကြောင် ၄ ကောင်၊ ၅ ကောင်ခန့် မွေးမြူထားကြောင်း သိရသည်။ ကယ်ဆယ်ရေးဝန်ထမ်းများက နေအိမ်အတွင်း လိုက်လံရှာဖွေခဲ့သော်လည်း ကြောင်များကို မတွေ့ရှိခဲ့ရသဖြင့် အဆိုပါ တိရစ္ဆာန်များ ပြန်လာပါက စားနိုင်ရန် နေအိမ်အတွင်း ကြောင်စာများ ထားရှိပေးခဲ့သည်။

သေဆုံးမှု၏ အကြောင်းရင်းများကို ရဲတပ်ဖွဲ့က ဆက်လက်စုံစမ်းစစ်ဆေးနေပြီး ငွေကြေးအခက်အခဲနှင့် အကြွေးနွံနစ်မှုတို့သည်လည်း ထည့်သွင်းစစ်ဆေးနေသည့် ဖြစ်နိုင်ခြေ အချက်အလက်များတွင် ပါဝင်ကြောင်း သိရသည်။

Ref : Khaosod