သက်တံ့
၁၃.၈.၂၀၂၆
ထိုင်းနိုင်ငံ၊ ချင်းမိုင်ခရိုင်၊ ဒွိုင်ဆာကတ် (Doi Saket) မြို့နယ်တွင် ဩဂုတ်လ ၁၀ ရက်နေ့က မြန်မာအမျိုးသားတစ်ဦးနှင့် ကိုရီးယားအမျိုးသမီးတစ်ဦး စီးနင်းလာသည့် မော်တော်ယာဉ် အင်ဂျင်ခန်းမှ မီးစတင်လောင်ကျွမ်းခဲ့ရာမှ ၎င်းတို့နှစ်ဦးစလုံး အလွန်ကံကောင်းစွာ ရှင်သန် လွတ်မြောက်သွားခဲ့ကြသည်။
အဆိုပါ မီးလောင်မှုသည် ညနေ ၆ နာရီ ၅၂ မိနစ်ခန့်တွင် မယ်ကူး (Mae Kue) ကျေးရွာအုပ်စုရှိ သနပီရိယ (Thanapiriya) စူပါမားကတ်ရှေ့၌ ဖြစ်ပွားခဲ့ခြင်းဖြစ်သည်။ ဒွိုင်ဆာကတ် ရဲစခန်းမှ ရဲတပ်ဖွဲ့ဝင်များနှင့် ချင်းမိုင် ကာတာညူသမ်ကုသိုလ် ကယ်ဆယ်ရေးအဖွဲ့တို့ အခင်းဖြစ်ပွားရာသို့ အမြန်ဆုံး ရောက်ရှိလာပြီး မီးသတ်ရေကားများနှင့် ဓာတုမီးသတ်ဆေးဘူးများ အသုံးပြုကာ မီးကို ထိန်းချုပ်ငြှိမ်းသတ်ခဲ့ကြသည်။
ကနဦးရရှိသော သတင်းများအရ မြန်မာအမျိုးသားက မော်တော်ယာဉ်ကို မောင်းနှင်ပြီး ကိုရီးယားအမျိုးသမီးက လိုက်ပါလာခြင်းဖြစ်ကြောင်း သိရသည်။ ၎င်းတို့သည် ဆန်ကမ်ဖဲင်း (San Kamphaeng) မြို့နယ်ဘက်မှ အဆိုပါဧရိယာသို့ မောင်းနှင်လာစဉ် ရှေ့အင်ဂျင်ခန်းအတွင်းမှ မီးလျှံများ ရုတ်တရက် ထွက်ပေါ်လာခဲ့ခြင်းဖြစ်သည်။
ယာဉ်မောင်းက မော်တော်ယာဉ်ကို ချက်ချင်း ရပ်တန့်လိုက်သဖြင့် မီးသည် ယာဉ်တစ်စီးလုံးသို့ လျင်မြန်စွာ ကူးစက်မသွားမီ နှစ်ဦးစလုံး တံခါးဖွင့်၍ ဘေးကင်းစွာ ထွက်ပြေးလွတ်မြောက်နိုင်ခဲ့ကြသည်။
မီးသတ်တပ်ဖွဲ့ဝင်များက မီးကို နောက်ဆုံးတွင် ငြှိမ်းသတ်နိုင်ခဲ့သော်လည်း မော်တော်ယာဉ်မှာ ပြင်းထန်စွာ ပျက်စီးသွားခဲ့ပြီး အရိုးမျှသာ ကျန်ရှိတော့သည်။
ယင်းဖြစ်စဉ်တွင် လိုက်ပါလာသူ နှစ်ဦးစလုံး ဒဏ်ရာရရှိခြင်း မရှိကြောင်းနှင့် မီးလောင်ရသည့် အကြောင်းအရင်းကို အာဏာပိုင်များက စုံစမ်းစစ်ဆေးလျက်ရှိကြောင်း သိရသည်။
Ref: Pattaya Mail
About the Author
