၁၃.၈.၂၀၂၆
Translated by Htwe Ko Tun.
ထိုင်းနိုင်ငံ၊ ရယောင်းပြည်နယ်ရှိ တရုတ်ပိုင်ဒေတာစင်တာစီမံကိန်းတစ်ခု၏ ဆောက်လုပ်ရေးလုပ်ငန်းခွင်တစ်ခုတွင် သြဂုတ်လ ၁၁ ရက်က ရဲနှင့်တာဝန်ရှိသူများပါဝင်သောအဖွဲ့က ဝင်ရောက်စီးနင်းခဲ့ရာ မြန်မာနှင့် တရုတ်နိုင်ငံသား တရားမဝင် ရွှေ့ပြောင်းအလုပ်သမား ၂၄ ဦး ကို ဖမ်းဆီးမိခဲ့ကြောင်း သြဂုတ်လ ၁၂ ရက် သတင်းများက ဖော်ပြခဲ့ကြသည်။
ရယောင်းလူဝင်မှုကြီးကြပ်ရေးရုံး၏ အဆိုအရ ဝင်ရောက်စီးနင်းမှုပြုလုပ်သည့်နေရာသည် ဘန်ချန်ခရိုင်၊ ဘန်ချန်မြို့၊ ရွာအမှတ် ၆ ရှိ ရိုင် ၁၀၀ ကျော် (သုည ဒသမ ၀၆၁ စတုရန်းမိုင်ခန့်) ရှိသော မြေကွက်တစ်ခုဖြစ်ကြောင်း သိရသည်။
ကနဦးစစ်ဆေးမှုအရ တရုတ်ရင်းနှီးမြှုပ်နှံသူများမှ ရန်ပုံငွေထောက်ပံ့ထားသော ဆောက်လုပ်ဆဲဒေတာစင်တာရှိ စခန်းတစ်ခုတွင် အလုပ်လုပ်ကိုင်နေထိုင်သူ ၄၀၀ ကျော်ရှိကြောင်း သတင်းများထွက်ပေါ်ခဲ့သည်။
ရဲနှင့် ပြည်နယ်အလုပ်အကိုင်ရုံးမှ အရာရှိများသည် နံနက် ၁၀ နာရီခန့်တွင် ထိုနေရာကို ဝင်ရောက်စီးနင်းခဲ့ရာ အလုပ်သမားအများအပြား ထွက်ပြေးခဲ့ကြသည်။
အချို့မှာ အနီးအနားရှိ တူးမြောင်းထဲသို့ ခုန်ချကာ ရေကူးထွက်ပြေးသွားကြကြောင်း အရာရှိများက ပြောကြားခဲ့သည်။
သို့သော် မြန်မာနိုင်ငံသား ၂၀ ဦးနှင့် တရုတ်နိုင်ငံသား လေးဦး ပါဝင်သည့် အမျိုးသားနှင့် အမျိုးသမီး ၂၄ ဦးကို အာဏာပိုင်များက ဖမ်းဆီးနိုင်ခဲ့ပြီး ၎င်းတို့၏ လူဝင်မှုကြီးကြပ်ရေးနှင့် အလုပ်စာရွက်စာတမ်းများကို စစ်ဆေးရာတွင် ၎င်းတို့တွင် သင့်လျော်သော ခွင့်ပြုချက်များ မရှိကြောင်း တွေ့ရှိခဲ့သည်။
၎င်းတို့အား ဘန်ချန်ရဲစခန်းတွင် တရားဥပဒေအရ အရေးယူမှုများ စတင်နေပြီဖြစ်ပြီး လူဝင်မှုကြီးကြပ်ရေး ရဲတပ်ဖွဲ့အား ပြည်နှင်ဒဏ်ပေးရေးလုပ်ငန်းစဉ်များ စတင်ရန် ဆက်သွယ်ခဲ့သည်။
အာဏာပိုင်များက ခွင့်ပြုချက်မရှိသည့် နိုင်ငံခြားသားအလုပ်သမားများကို ငှားရမ်းခြင်းအတွက် အမည်မဖော်လိုသော ကန်ထရိုက်တာသုံးဦးကို အမှုဖွင့်တိုင်ကြားမှုများပြုခဲ့သည်။
ဝင်ရောက်စီးနင်းမှုအပြီးတွင် စစ်ဆေးမေးမြန်းခံရသည့် ယခင်က ဂေါက်ကွင်းတစ်ခုဖြစ်ခဲ့သော ထိုနေရာ၏ ပိုင်ရှင်ဟောင်းက ၎င်းက မြေကွက်ကိုသာ ရောင်းချခဲ့ခြင်းဖြစ်ပြီး တရားမဝင်အလုပ်ခန့်ထားမှုတွင် ပါဝင်ပတ်သက်မှုမရှိကြောင်း ပြောကြားခဲ့သည်။
အလုပ်သမားများသည် စီမံကိန်း၏ တိုက်ရိုက်ကြီးကြပ်မှုနှင့် စီမံခန့်ခွဲမှုအောက်တွင် ရှိနေကြောင်း ၎င်းကပြောကြားခဲ့သည်။ စီမံကိန်းပိုင်ရှင်၏ အသေးစိတ်အချက်အလက်များကို ဖော်ထုတ်ပြောကြားခြင်း မရှိသေးပေ။
ဒေသခံမီဒီယာများ၏ အဆိုအရ ဒေသခံများ၏ စိုးရိမ်မှုများကြားတွင် ဆောက်လုပ်ရေးလုပ်ငန်းသည် လပေါင်းများစွာ လည်ပတ်နေခဲ့ပြီး ဒေသခံများက စီမံကိန်းအနေဖြင့် ဒေသခံလူ့အသိုင်းအဝိုင်းအပေါ် သက်ရောက်မှုရှိမရှိ စစ်ဆေးရန် အာဏာပိုင်များကို တောင်းဆိုခဲ့ကြသည်။
ပြီးခဲ့သည့်အပတ်က ဘန်ချန်ခရိုင်အာဏာပိုင်များသည် နေရာသို့ စစ်ဆေးခဲ့ပြီး စီမံကိန်းသည် စွပ်စွဲထားသည့်အတိုင်း အများပြည်သူသုံး တူးမြောင်းကို ကျူးကျော်ဝင်ရောက်ခဲ့သည်ဟူသော အထောက်အထား မတွေ့ရှိခဲ့ကြောင်း ပြောကြားခဲ့သည်။
သို့သော် အာဏာပိုင်များက နယ်နိမိတ်များကို အတည်ပြုရန်နှင့် တိကျသောတွေ့ရှိချက်များကို ဖော်ထုတ်ရန် တရားဝင်မြေယာစစ်တမ်းတစ်ခု ပြုလုပ်သွားမည်ဟု ပြောကြားခဲ့သည်။
Ref : Bangkok Post
About the Author
