သက်တံ့
၃၁. ၇. ၂၀၂၆
ဖူးခက်ပြည်နယ်၊ ချာလောင် (Chalong) မြို့နယ်တွင် အလုပ်လုပ်ခွင့်ကတ် (Work Permit) ၌ အထွေထွေလုပ်သား (Labourer) အဖြစ်သာ လုပ်ကိုင်ခွင့်ပြုထားသော်လည်း ဆိုင်အရောင်းဝန်ထမ်းအဖြစ် လုပ်ကိုင်နေသည်ကို တွေ့ရှိခဲ့ရသဖြင့် မြန်မာအမျိုးသမီးတစ်ဦးကို ယမန်နေ့ (ဇူလိုင် ၃၀ ရက်) တွင် ရဲတပ်ဖွဲ့က ဖမ်းဆီးထိန်းသိမ်းလိုက်သည်။
ကုန်စုံဆိုင်တစ်ဆိုင်တွင် ရွှေ့ပြောင်းလုပ်သားတစ်ဦးသည် ကုန်ပစ္စည်းများ ရောင်းချခြင်း၊ ငွေကောက်ခံခြင်းနှင့် အဝယ်တော်များကို ဝန်ဆောင်မှုပေးနေခြင်းတို့ပြုလုပ်နေပြီး အလုပ်လုပ်ခွင့်ကတ် စည်းကမ်းချက်များကို ချိုးဖောက်နေကြောင်း သတင်းပေးတိုင်ကြားချက် ရရှိခဲ့သည်ဟု ရဲတပ်ဖွဲ့က ပြောကြားသည်။
ရဲတပ်ဖွဲ့သည် ဆိုင်အတွင်းသို့ မဝင်ရောက်မီ စမ်းသပ်ဝယ်ယူမှု (Test purchase) ပြုလုပ်ခဲ့ပြီးနောက် ဆိုင်အတွင်း၌ အဆိုပါ မြန်မာအမျိုးသမီး ကုန်ပစ္စည်းများ ရောင်းချနေသည်ကို စစ်ဆေးတွေ့ရှိခဲ့သည်။
စစ်ဆေးချက်များအရ သူမတွင် တရားဝင် ပတ်စ်ပို့နှင့် အလုပ်လုပ်ခွင့်ကတ်ရှိသော်လည်း အထွေထွေလုပ်သားအဖြစ်သာ လုပ်ကိုင်ခွင့်ပြုထားကြောင်း တွေ့ရှိရသည်။ သူမ၏ အလုပ်လုပ်ခွင့်ကတ်သည် ဆိုင်ရှေ့တွင် ကုန်ပစ္စည်းရောင်းချခြင်း၊ ငွေကောက်ခံခြင်း သို့မဟုတ် ဝယ်ယူသူများကို ဝန်ဆောင်မှုပေးခြင်းတို့ ပြုလုပ်ရန် ခွင့်ပြုမထားပေ။
၎င်းက ထိုတာဝန်များကို လုပ်ကိုင်ခဲ့ကြောင်း ဝန်ခံခဲ့ပြီး ထိုင်းအမျိုးသား အလုပ်ရှင်တစ်ဦးထံတွင် အလုပ်လုပ်ကိုင်နေခြင်းဖြစ်ကြောင်း ပြောကြားခဲ့သည်။ ရဲတပ်ဖွဲ့ဝင်များ လာရောက်စစ်ဆေးချိန်တွင် အလုပ်ရှင်မှာ ဆိုင်တွင် ရှိမနေခဲ့ပေ။
ထိုအမျိုးသမီးကို အလုပ်လုပ်ခွင့်ကတ်၌ ဖော်ပြထားသည့် စည်းကမ်းချက်များအပြင်ဘက်တွင် အလုပ်လုပ်ကိုင်မှုဖြင့် တရားစွဲဆိုထားသည်။ ထို့အပြင် အလုပ်ရှင်ဘက်မှ ပြစ်မှုတစ်စုံတစ်ရာ ကျူးလွန်ထားခြင်း ရှိ မရှိ စုံစမ်းစစ်ဆေးမှု၏ အစိတ်အပိုင်းအဖြစ် အလုပ်ရှင်နှင့် သက်ဆိုင်သည့် စာရွက်စာတမ်းများကိုလည်း ရဲတပ်ဖွဲ့က သိမ်းဆည်းခဲ့သည်။
အဆိုပါ မြန်မာအမျိုးသမီးကို ဥပဒေအရ အရေးယူဆောင်ရွက်နိုင်ရန် ချာလောင်ရဲစခန်းသို့ ခေါ်ဆောင်သွားခဲ့သည်။
ထိုင်းဥပဒေအရ နိုင်ငံခြားသားလုပ်သားများသည် ၎င်းတို့၏ အလုပ်လုပ်ခွင့်ကတ်တွင် ဖော်ပြထားသော ရာထူးနှင့် စည်းကမ်းချက်များအတိုင်းသာ အလုပ်လုပ်ကိုင်ခွင့်ရှိသည်။ အလုပ်လုပ်ခွင့် စည်းကမ်းချက်များပြင်ပတွင် တာဝန်ထမ်းဆောင်ခွင့်ပြုသည့် အလုပ်ရှင်များသည်လည်း ဥပဒေအရ အရေးယူခံရနိုင်သည်။ ထို့အပြင် လုပ်သား၏ ခွင့်ပြုချက်တွင် သတ်မှတ်ထားသည့် တာဝန်များနှင့် လက်လီရောင်းချရေးလုပ်ငန်းများ ကိုက်ညီမှုရှိရန် အလုပ်သမားဝန်ကြီးဌာနက လိုအပ်ကြောင်း သတ်မှတ်ထားသည်။
Ref : Thaiger
About the Author
