သက်တံ့
၂၄. ၆. ၂၀၂၆
တရုတ်ကွန်မြူနစ်ပါတီ ဗဟိုကော်မတီ နိုင်ငံရေးဗျူရိုအဖွဲ့ဝင်နှင့် ဗဟိုနိုင်ငံခြားရေးရာကော်မရှင်ရုံး ညွှန်ကြားရေးမှူးဖြစ်သလို နိုင်ငံခြားရေးဝန်ကြီးအဖြစ်လည်း တာဝန်ယူထားသူ ဝမ်ယိသည် အင်္ဂါနေ့က နယူးဒေလီမြို့၌ ရုရှားလုံခြုံရေးကောင်စီအတွင်းရေးမှူး ဆာဂေး ရွှီဂူ (Sergei Shoigu) နှင့် တွေ့ဆုံခဲ့သည်။
၎င်းတို့နှစ်ဦးသည် (၁၆) ကြိမ်မြောက် ဘရစ်စ် (BRICS) နိုင်ငံတော်လုံခြုံရေးအကြံပေးများနှင့် လုံခြုံရေးဆိုင်ရာအဆင့်မြင့်ကိုယ်စားလှယ်များအစည်းအဝေးသို့ တက်ရောက်ရန် နယူးဒေလီမြို့သို့ ရောက်ရှိနေကြခြင်းဖြစ်သည်။
ပြီးခဲ့သည့် မေလက တရုတ် – ရုရှား နှစ်နိုင်ငံအကြား အတည်ပြုခဲ့သည့် ပူးတွဲကြေညာချက်နှစ်စောင်ကို ပြန်လည်ရည်ညွှန်းလျက် ဝမ်ယိက တရုတ်နိုင်ငံအနေဖြင့် နိုင်ငံ့ခေါင်းဆောင်နှစ်ဦး ရရှိထားသည့် အရေးကြီးသောအများသဘောတူညီချက်ကို အကောင်အထည်ဖော်ရန်၊ ဘက်စုံမဟာဗျူဟာမြောက် ညှိနှိုင်းဆောင်ရွက်မှုကို အားကောင်းစေရန်၊ နှစ်နိုင်ငံအလျင်အမြန် ဖွံ့ဖြိုးတိုးတက်ရေးနှင့် ပြန်လည်ဆန်းသစ်လာစေရေးကို မြှင့်တင်ရန်နှင့် လူသားမျိုးနွယ်စု၏ ငြိမ်းချမ်းစွာဖွံ့ဖြိုးတိုးတက်ရေးအတွက် တရုတ်-ရုရှားတို့က ကူညီပံ့ပိုးပေးနိုင်ရန် ရုရှားနှင့်အတူ လက်တွဲလုပ်ဆောင်သွားရန် အသင့်ရှိကြောင်း ပြောကြားခဲ့သည်။
ဘရစ်စ် (BRICS) သည် နိုင်ငံတကာအသိုက်အဝန်းအနေဖြင့် ဘက်စုံဝါဒကို ကျင့်သုံးရန်၊ မျှတမှုနှင့် တရားမျှတမှုကို ထိန်းသိမ်းရန်၊ ငြိမ်းချမ်းရေးနှင့် လုံခြုံရေးကို မြှင့်တင်ရန်အတွက် အရေးကြီးသော ပလက်ဖောင်းတစ်ခုဖြစ်ကြောင်း ထောက်ပြလျက် BRICS ယန္တရား ပိုမိုအားကောင်းလာစေရေးနှင့် တိုးချဲ့နိုင်ရေးအတွက် တရုတ်နှင့် ရုရှားတို့အနေဖြင့် ညှိနှိုင်းပူးပေါင်းဆောင်ရွက်မှုများကို မြှင့်တင်ကာ ကမ္ဘာ့တောင်ခြမ်းနိုင်ငံများ (Global South) ၏ ဦးဆောင်အင်အားစု ဖြစ်လာစေရန် ဝမ်ယိက တိုက်တွန်းခဲ့သည်။
ယခုအစည်းအဝေးသည် ဘရစ်စ် (BRICS) နိုင်ငံများ၏ အများသဘောတူညီချက်အပေါ် စုစည်းရန်၊ လုံခြုံရေးဆိုင်ရာ စိန်ခေါ်မှုများကို ဖြေရှင်းရန်၊ လုံခြုံရေးပတ်ဝန်းကျင်ကို ကာကွယ်စောင့်ရှောက်ရန်၊ မငြိမ်မသက်ဖြစ်နေသော ကမ္ဘာကြီးအတွင်းသို့ ပိုမိုသေချာရေရာမှုများ ထည့်သွင်းပေးရန်နှင့် “BRICS ၏ ပံ့ပိုးကူညီမှုများ” ပိုမိုပြုလုပ်နိုင်ရန် ဦးတည်သင့်ကြောင်းလည်း ဝမ်ယိက ထပ်လောင်းပြောကြားခဲ့သည်။
ဆာဂေး ရွှီဂူကလည်း ရုရှားနှင့် တရုတ်နိုင်ငံ့ခေါင်းဆောင်များအကြား စဉ်ဆက်မပြတ် နီးကပ်စွာ အပြန်အလှန်ဆက်သွယ်နေခြင်းသည် နှစ်နိုင်ငံဆက်ဆံရေး ရေရှည်တည်တံ့ခိုင်မြဲစွာ ဖွံ့ဖြိုးတိုးတက်ရေးအတွက် အခြေခံအာမခံချက်ဖြစ်ပြီး နှစ်နိုင်ငံအကြား ထူးခြားဆန်းသစ်ကာ အဆင့်မြင့်မားသော ဆက်ဆံရေးရှိနေခြင်းကို ပြသနေကြောင်း ပြောကြားခဲ့သည်။
၎င်းက လုံခြုံရေးကဏ္ဍတွင် ပြင်ပအင်အားစုများ၏ ကြားဝင်စွက်ဖက်မှုနှင့် ထိုးဖောက်ဝင်ရောက်မှုများကို တွန်းလှန်ရန်နှင့် ဂျပန်နိုင်ငံ၏ စစ်အင်အားပြန်လည်တည်ဆောက်ရန် ကြိုးပမ်းမှုကို ဆန့်ကျင်ရန်အတွက် နှစ်နိုင်ငံအကြား အပြန်အလှန်ယုံကြည်မှုနှင့် နီးကပ်သော ပူးပေါင်းဆောင်ရွက်မှုကို ပိုမိုနက်ရှိုင်းစေရေး တောင်းဆိုခဲ့သည်။
ရုရှားနိုင်ငံအနေဖြင့် ဒေသတွင်းနှင့် ကမ္ဘာ့ငြိမ်းချမ်းရေးနှင့် တည်ငြိမ်ရေးကို ပူးတွဲကာကွယ်စောင့်ရှောက်ရန်အတွက် ဘရစ်စ် (BRICS) ကဲ့သို့သော ဘက်စုံယန္တရားများတွင် တရုတ်နိုင်ငံနှင့် မဟာဗျူဟာမြောက် ညှိနှိုင်းဆောင်ရွက်မှုများကို မြှင့်တင်ရန် အသင့်ရှိကြောင်း ပြောကြားခဲ့သည်။
About the Author
