‘ဒေါ်နယ်ဒ် ထရမ့်ပ်’ အမည်ဖြင့် နာမည်ကျော် ရေပန်းစားလာမှုကြောင့် ယနေ့ကျရောက်သည့် အီးဒ်နေ့တွင် ယဇ်ပူဇော်ခံရမည့်ဘေးမှ အစိုးရ ဝင်ရောက်ကယ်တင်မှုဖြင့် ရှင်သန် လွတ်မြောက်လာသည့် ဘင်္ဂလားဒေ့ရှ်က ကျွဲဖြူ

သက်တံ့
၂၈. ၅. ၂၀၂၆

အမေရိကန်သမ္မတ ဒေါ်နယ်ဒ် ထရမ့်ပ် ဆံပင်ပုံစံ ထူးခြားသည့် ရွှေရောင်ဦးခေါင်းမွှေးကြောင့် “ဒေါ်နယ်ဒ် ထရမ့်ပ်” ဟု အမည်ပြောင်ပေးထားသည့် ဘင်္ဂလားဒေ့ရှ်နိုင်ငံရှိ ရှားပါးကျွဲဖြူတစ်ကောင်သည် အစိုးရ၏ နောက်ဆုံးအချိန် ဝင်ရောက်စွက်ဖက်ကယ်တင်မှုကြောင့် ယနေ့ကျရောက်သည့် အစ္စလာမ်ဘာသာဝင်တို့၏ အီးဒ်အလ်အာဒ်ဟာ (Eid al-Adha) ဘာသာရေးပွဲတော်တွင် ယဇ်ပူဇော်ခံရမည့်ဘေးမှ ကံကောင်းစွာ လွတ်မြောက်သွားခဲ့ကြောင်း ပြည်ထဲရေးဝန်ကြီးဌာန အရာရှိတစ်ဦးက ပြောကြားခဲ့သည်။

အလေးချိန် ကီလိုဂရမ် ၇၀၀ (၁,၅၄၃ ပေါင်) နီးပါးရှိသည့် အဆိုပါသတ္တဝါအား ဘာသာရေးထုံးတမ်းစဉ်လာအရ မွေးမြူရေးခြံတစ်ခုတွင် ရောင်းချပြီးဖြစ်သော်လည်း ကြာသပတေးနေ့ (မေ ၂၈ ရက်) တွင် ကျရောက်မည့် ပွဲတော်မတိုင်မီ လူထုစိတ်ဝင်စားမှု အလွန်မြင့်တက်လာခဲ့ပြီးနောက် လုံခြုံရေးဆိုင်ရာ စိုးရိမ်မကင်းဖြစ်မှုများ ရှိလာသောကြောင့် အာဏာပိုင်များက မသတ်ဖြတ်မီ ဝင်ရောက်တားမြစ်ခဲ့ခြင်းဖြစ်သည်။

ပြည်ထဲရေးဝန်ကြီး ဆာလာဟူဒင် အာမက် (Salahuddin Ahmed) က ၎င်းကျွဲအား ဘာသာရေးအရ ယဇ်ပူဇော်ခြင်းမပြုရန်၊ ဝယ်ယူသူအား ငွေပြန်အမ်းပေးရန်နှင့် ဒါကာမြို့ရှိ အမျိုးသားတိရစ္ဆာန်ရုံသို့ ပြောင်းရွှေ့ရန် အမိန့်ပေးခဲ့သည်။

ဝန်ကြီးဌာနအရာရှိတစ်ဦးက “လုံခြုံရေးဆိုင်ရာ စိုးရိမ်ရမှုတွေနဲ့ အများပြည်သူရဲ့ ထူးထူးခြားခြား စိတ်ဝင်စားမှုတွေကြောင့် နောက်ဆုံးမိနစ်ကျမှပဲ ဒီကျွဲကို ယဇ်ပူဇော်ခြင်းကနေ ကင်းလွတ်ခွင့်ပေးဖို့ ဆုံးဖြတ်ခဲ့တာဖြစ်ပါတယ်” ဟု ပြောကြားခဲ့သည်။

သာမန်ပွဲတော်တွင်း အရောင်းအဝယ်တစ်ခုအဖြစ် စတင်ခဲ့သော်လည်း ၎င်းကျွဲ၏ ဗီဒီယိုဖိုင်များ အွန်လိုင်းတွင် ပျံ့နှံ့သွားခဲ့ပြီးနောက် တစ်နိုင်ငံလုံးအတိုင်းအတာဖြင့် စိတ်ဝင်စားစရာ ဖြစ်လာခဲ့သည်။ ၎င်း၏ ဦးခေါင်းပေါ်ရှိ ရွှေဝါရောင်အမွှေးအစုအဆုံနှင့် တည်ငြိမ်လှသည့် အပြုအမူတို့ကို ကိုယ်တိုင်မြင်တွေ့နိုင်ရန် ဝေးလံသောဒေသအသီးသီးမှ လာရောက်ကြသူများနှင့် မွေးမြူရေးခြံဝင်းအတွင်း စည်ကားခဲ့သည်။

ခြံပိုင်ရှင် ဇီယာဥဒင် မရစ်ဒါ အဆိုအရ ကျွဲမှာ ဒေါ်နယ်ဒ် ထရမ့်ပ်နှင့် ရုပ်ချင်းဆင်တူသည်ကို သတိပြုမိရာမှ ၎င်း၏ညီဖြစ်သူက ထိုအမည်ကို ပေးခဲ့ခြင်းဖြစ်ကြောင်း ပြောကြားခဲ့သည်။ ထို့အပြင် အဆိုပါသတ္တဝါသည် ထူးထူးခြားခြား ယဉ်ပါးပြီး အစာမပြတ်ကျွေးမွေးခြင်းနှင့် ပုံမှန်ရေချိုးပေးခြင်းအပါအဝင် အထူးဂရုစိုက် စောင့်ရှောက်မှုများ လိုအပ်ကြောင်းလည်း မရစ်ဒါက ဖြည့်စွက်ပြောကြားခဲ့သည်။

အမည်းရောင်ရှိသည့် တိရစ္ဆာန်များသာ အများစုရှိသော ဘင်္ဂလားဒေ့ရှ်နိုင်ငံတွင် ယခုကဲ့သို့ ကျွဲဖြူ (Albino) မျိုးမှာ အလွန်ရှားပါးလှသဖြင့် အိဒ်ပွဲတော်ကာလ တိရစ္ဆာန်စျေးကွက်အတွင်း ထင်ရှားပေါ်လွင်နေခဲ့ခြင်းဖြစ်ပြီး၊ အမှန်တကယ်တွင်မူ ၎င်း၏ အမည်ပြောင်နှင့် ရုပ်သွင်ကြောင့်ပင် အသက်ဘေးမှ လွတ်မြောက်ခဲ့ရခြင်း ဖြစ်ဟန်ရှိသည်။

Ref: Reuters