၂၄.၅.၂၀၂၆
Written by KL
ပျဥ်းမနားမြို့နယ်၊ ရန်ကုန်-မန္တလေးလမ်းဟောင်း၊ ညောင်ပင်သာမီးပွိုင့်အနီးတွင် ညာဘက်ယာဥ်ကြောမှ ဂငယ်ကွေ့ကွေ့လာသော ၁၂ ဘီးကားကို ဆေးရုံဆင်းလူနာလာရောက်ခေါ်ဆောင်သည့် ကိုယ်ပိုင်ယာဥ်တိုက်မိရာမှ အမျိုးသမီးတစ်ဦးသေဆုံးပြီး ရဟန်းတစ်ပါး အပါအဝင် လေးဦးဒဏ်ရာရမှု မေလ ၂၂ ရက် ညနေ ၃ နာရီခွဲက ဖြစ်ပွားခဲ့ကြောင်း ကယ်ဆယ်ရေးဆောင်ရွက်ခဲ့သည့် မိုးစေတနာပရဟိတအသင်းထံမှ သိရသည်။
ယာဥ်တိုက်မှုကြောင့် ကိုယ်ပိုင်ယာဥ်ပေါ်မှ သံဃာ ၁ ပါး၊ အမျိုးသား ၂ ဦး၊ အမျိုးသမီး ၂ ဦး ထိခိုက်ဒဏ်ရာရရှိခဲ့သဖြင့် ခုတင် (၂၀၀) ပြည်သူ့ဆေးရုံနှင့် ခုတင် (၁၀၀၀) ပြည်သူ့ဆေးရုံတို့သို့ ပို့ဆောင်ခဲ့သော်လည်း ဒဏ်ရာရ အမျိုးသမီးတစ်ဦးမှာ သေဆုံးခဲ့ခြင်းဖြစ်ကြောင်း သိရသည်။
“လူနာတွေက ရေတာရှည်မြို့ကပါ။ ဆေးရုံဆင်းလူနာကို လာခေါ်ပေးရင်း လမ်းမှာဖြစ်တာ”ဟု ကယ်ဆယ်ရေးဆောင်ရွက်သူတစ်ဦးက ပြောသည်။
ဒဏ်ရာရလူနာများကို မွန်မြတ်သူပရဟိတအသင်း၊ ဗြဟ္မစိုရ်ပရဟိအသင်း၊ ကရုဏာမြင့်မိုရ်ပရဟိတအသင်း၊ မိုးစေတနာပရဟိတအသင်းနှင့် သက်ဆိုင်ရာအဖွဲ့အစည်းများက ဝိုင်းဝန်းပူးပေါင်း ကယ်ဆယ်ခဲ့ကြောင်း သိရသည်။
About the Author
