မူးယစ်ဆေးဝါး မှောင်ခိုကူးမှုနှိမ်နင်းရန် ထိုင်းက ဟွေ့ဖန်နယ်စပ်ဂိတ်ကို ယနေ့တွင် စစ်ဆေးမှုတင်းကျပ်ပြီး ကုန်တင်ပို့မှု ဆိုင်းငံ့လိုက်သဖြင့် မယ်ဟောင်ဆောင် နယ်စပ်ဂိတ်မှ မြန်မာနိုင်ငံသို့ ကုန်စည်စီးဆင်းမှု ရပ်ဆိုင်းသွား

သက်တံ့
၂၂. ၅. ၂၀၂၆

မူးယစ်ဆေးဝါး မှောင်ခိုကူးမှုနှင့် မူးယစ်ဆေးဝါးချက်လုပ်ရာတွင် အသုံးပြုသည့် ရှေ့ပြေးဓာတုပစ္စည်းများ သယ်ဆောင်မှုကို တားဆီးနှိမ်နင်းရန် ကြိုးပမ်းသည့်အနေဖြင့် ထိုင်းလုံခြုံရေးတပ်ဖွဲ့ဝင်များသည် မယ်ဟောင်ဆောင်ခရိုင်၊ ဟွေ့ဖန် (Huai Phueng) နယ်စပ်ဂိတ်တွင် ကန့်သတ်ချက်များကို ယနေ့ တင်းကျပ်လိုက်ပြီးနောက် လူအသွားအလာကိုသာ ခွင့်ပြုကာ ကုန်စည်တင်ပို့မှုနှင့် နယ်စပ်ဖြတ်ကျော် မော်တော်ယာဉ် သွားလာမှုများကို ဆိုင်းငံ့ထားသည်။

အဆိုပါ ကန့်သတ်ပိတ်ဆို့မှုများကြောင့် မယ်ဟောင်ဆောင်ခရိုင်၊ ဟွေ့ဖာ (Huay Pha) တိုက်နယ်၊ ဘန်ဟွေ့ဖန် (Ban Huai Phueng) ရွာမှ နယ်စပ်ကုန်သည် ၂၀ ကျော်သည် ကန့်သတ်ချက်များကို ဆန္ဒပြရန်အတွက် သောကြာနေ့ (မေလ ၂၂ ရက်) တွင် ဟွေ့ဖာတိုက်နယ် စီမံခန့်ခွဲရေးအဖွဲ့ရုံးတွင် စုဝေးခဲ့ကြသည်။ ကုန်သည်များက မြန်မာနိုင်ငံသို့ ကုန်စည်ပို့ဆောင်ရေး ဆိုင်းငံ့ထားမှုကြောင့် ဒေသတွင်း စီးပွားရေးလုပ်ငန်းများကို ပြင်းထန်စွာ ထိခိုက်စေပြီး နေ့စဉ်ကုန်စည် ပို့ဆောင်မှုများ ရပ်ဆိုင်းသွားကြောင်း ပြောကြားကာ မယ်ဟောင်ဆောင်ခရိုင်အုပ်ချုပ်ရေးမှူးနှင့် လုံခြုံရေးအေဂျင်စီများထံ ညှိနှိုင်းပေးပါရန် တရားဝင်အသနားခံစာတစ်စောင် တင်သွင်းခဲ့သည်။

ကုန်သေတ္တာနှင့် ကုန်စည်ပို့ဆောင်ရေး လုပ်ငန်းရှင်များက နယ်စပ်ကုန်သွယ်ရေးအပေါ် မှီခိုနေရသော နယ်စပ်ဒေသ လူထုအတွက် အဆိုပါကန့်သတ်ချက်များကြောင့် ကြီးမားသော စီးပွားရေးအခက်အခဲများ ကြုံတွေ့နေရသည်ဟု ထောက်ပြကာ ပုံမှန်ကုန်စည်ပို့ဆောင်ရေးအတွက် ယာယီစစ်ဆေးရေးဂိတ်ကို ပြန်လည်ဖွင့်လှစ်ပေးရန် အာဏာပိုင်များအား တောင်းဆိုခဲ့ကြသည်။

ယင်းကို တုံ့ပြန်သည့်အနေဖြင့် လုံခြုံရေးတာဝန်ရှိသူများက ဟွေ့ဖန်နယ်စပ်ဂိတ်သည် လမ်းလျှောက်ဖြတ်သန်းသူများအတွက် ဆက်လက်ပွင့်နေဆဲဖြစ်ကြောင်း ပြောကြားပြီး ဂိတ်တစ်ခုလုံးအား လုံးဝပိတ်ပစ်လိုက်သည်ဆိုသည့် ပြောဆိုချက်များကို ငြင်းဆိုခဲ့သည်။ သို့သော်လည်း လုံခြုံရေးစိုးရိမ်ရမှုများနှင့် တရားမဝင်မူးယစ်ဆေးဝါး ထုတ်လုပ်မှုတွင် အသုံးပြုသည်ဟု ယူဆရသော မှောင်ခိုပစ္စည်းများနှင့် ရှေ့ပြေးဓာတုပစ္စည်းများကို ဖမ်းဆီးရန် ရည်ရွယ်သည့် ပြင်ဆင်မွမ်းမံထားသော စစ်ဆေးရေးအစီအမံများကြောင့် မြန်မာနိုင်ငံအတွင်းသို့ ကုန်စည်ထွက်ခွာမှုနှင့် မော်တော်ယာဉ်ဖြတ်သန်းမှု အားလုံးကို ယာယီဆိုင်းငံ့ထားခြင်း ဖြစ်သည်။

အဆိုပါ စစ်ဆေးမှုများ တင်းကျပ်လိုက်ခြင်းမှာ မကြာသေးမီက နယ်စပ်တစ်ဖက်ခြမ်းရှိ တရားမဝင် မူးယစ်ဆေးဝါးချက်စက်ရုံများသို့ ပို့ဆောင်မည့် သင်္ကာမကင်းဖွယ် ဓာတုပစ္စည်းများကို ဖမ်းဆီးရမိခဲ့ပြီးနောက် ဖြစ်ပေါ်လာခြင်းဖြစ်ကြောင်း တာဝန်ရှိသူများက ပြောသည်။ ထို့အပြင် လုပ်ငန်းရှင်အချို့သည် အကောက်ခွန်ကြေညာလွှာများကို မှန်ကန်စွာ တင်သွင်းခြင်းမရှိကြောင်း အာဏာပိုင်များက စွပ်စွဲထားပြီး စစ်ဆေးရေးနှင့် စာရွက်စာတမ်းလုပ်ထုံးလုပ်နည်းများကို ပြန်လည်သုံးသပ်နေစဉ်အတွင်း ကုန်စည်စီးဆင်းမှုကို ယာယီဆိုင်းငံ့ထားရခြင်းဖြစ်သည်ဟု ဆိုသည်။

လုံခြုံရေးတာဝန်ရှိသူများက ဤအစီအမံများသည် နယ်စပ်ဖြတ်ကျော်ကုန်သွယ်မှုကို ပိုမိုကြီးကြပ်ရန်နှင့် တရားမဝင်ပစ္စည်းများ စစ်ဆေးရေးဂိတ်မှတစ်ဆင့် သယ်ဆောင်ခြင်းကို ကာကွယ်ရန် ရည်ရွယ်ကြောင်း ပြောကြားခဲ့သည်။

တစ်ချိန်တည်းမှာပင် မယ်ဟောင်ဆောင်ခရိုင်အုပ်ချုပ်ရေးမှူးသည် ဆင်ဟာနတ် (Singhanat) အထူးစစ်ဆင်ရေးတပ်ဖွဲ့၊ ခရိုင်စီးပွားရေးနှင့် ကူးသန်းရောင်းဝယ်ရေးရုံး၊ အကောက်ခွန်ရုံးနှင့် အခြားသက်ဆိုင်ရာ အေဂျင်စီများမှ တာဝန်ရှိသူများနှင့်အတူ မေလ ၂၅ ရက်နေ့တွင် ဟွေ့ဖာတိုက်နယ်ရှိ ဘန်ဟွေ့ဖန် ယာယီနယ်စပ်စစ်ဆေးရေးဂိတ်သို့ သွားရောက်ကာ အခြေအနေများကို စစ်ဆေးပြီး ဒေသခံစီးပွားရေးသမားများနှင့် တွေ့ဆုံရန် စီစဉ်ထားသည်။

အာဏာပိုင်များအနေဖြင့် စီးပွားရေးလှုပ်ရှားမှုနှင့် နယ်စပ်လုံခြုံရေးအစီအမံများကို မျှတအောင် ဆောင်ရွက်နိုင်ရန် ကြိုးပမ်းနေစဉ် ၎င်းတို့၏ ကွင်းဆင်းလေ့လာမှုသည် သယ်ယူပို့ဆောင်ရေး အနှောင့်အယှက်များကို ဆန်းစစ်ရန်နှင့် ဒေသတွင်းစီးပွားရေးလုပ်ငန်းများ၏ စိုးရိမ်ပူပန်မှုများကို နားထောင်ရန် အဓိကထားမည်ဟု မျှော်လင့်ရသည်။

ထို့အပြင် ခရိုင်အာဏာပိုင်များသည် ပိုမိုတင်းကျပ်သော ထိန်းချုပ်မှုအောက်တွင် တရားဝင်ကုန်သွယ်မှုများ ပြန်လည်စတင်နိုင်ရေးအတွက် စစ်ဆေးရေးလုပ်ထုံးလုပ်နည်းများကို ပြင်ဆင်ရန်နှင့် စစ်ဆေးရေးဂိတ်၏ ရေရှည်စီမံခန့်ခွဲမှုကို ဆွေးနွေးရန် မေလ ၂၇ ရက်နေ့တွင် ပူးတွဲကော်မတီအစည်းအဝေးတစ်ရပ် ပြုလုပ်ရန် စီစဉ်ထားသည်။