၁၅.၅.၂၀၂၆
Written by Linn Eain
ကျန်းမာရေးဝန်ကြီးဌာနက အစိုးရသစ်၏ရက်ပေါင်း (၁၀၀) အတွင်း ဆောင်ရွက်မည့် စီမံကိန်းတစ်ခုဖြစ်သည့် “မြန်မာနိုင်ငံ နှလုံးရောဂါအန္တရာယ်အကဲဖြတ်စနစ် စီမံချက်” ဖြင့် တစ်နှစ်အတွင်း လူဦးရေတစ်သိန်းကို နှလုံးရောဂါ အန္တရာယ်စစ်ဆေးပေးမည်ဖြစ်ကြောင်း သိရသည်။
အဆိုပါ နှလုံးရောဂါအန္တရာယ်အကဲဖြတ်စနစ် စီမံချက်စတင်ကြောင်း အသိပေးခြင်းအခမ်းအနားကို မေ ၁၄ ရက် နံနက်ပိုင်းတွင် ကျန်းမာရေးဝန်ကြီးဌာန အစည်းအဝေးခန်းမ၌ ကျင်းပခဲ့ပြီး ကျန်းမာရေးဝန်ကြီးဌာန ပြည်ထောင်စုဝန်ကြီး ပါမောက္ခ ဒေါက်တာသက်ခိုင်ဝင်း၊ ဒုတိယဝန်ကြီး၊ စီမံချက်ဆောင်ရွက်မည့် ဆေးရုံများမှ ပါမောက္ခများ တက်ရောက်ခဲ့ကြောင်း သိရသည်။
“မြန်မာနိုင်ငံ နှလုံးရောဂါအန္တရာယ်အကဲဖြတ်စနစ် စီမံချက်”သည် မြန်မာ – တရုတ် ပူးပေါင်းဆောင်ရွက်မှုအစီအစဉ်တစ်ရပ်အဖြစ် ရန်ကုန်ပြည်သူ့ဆေးရုံကြီး၊ မန္တလေးပြည်သူ့ဆေးရုံကြီး၊ နေပြည်တော်ပြည်သူ့ဆေးရုံကြီး၊ မြောက်ဥက္ကလာပ ပြည်သူ့ဆေးရုံကြီးနှင့် ကန်သာယာဆေးရုံတို့တွင် လူဦးရေတစ်သိန်းကို တစ်နှစ်အတွင်း ဆောင်ရွက်မည်ဖြစ်ပြီး နိုင်ငံတစ်ဝန်း လွှမ်းခြုံဆောင်ရွက်နိုင်ရေး ဆက်လက်ဆောင်ရွက်သွားမည်ဖြစ်ကြောင်း သိရသည်။
နှလုံးရောဂါအန္တရာယ်အကဲဖြတ်စနစ် စီမံချက်တွင် နှလုံးရောဂါဖြစ်နိုင်ခြေများသူများ၊ အားကစားသမားများ၊ လေယာဉ် မောင်းနှင်သူ Pilot များ၊ အဝေးပြေးယာဉ်၊ ခရီးသည်တင်ယာဉ်မောင်းများသည် သက်သောင့်သက်သာ ဝတ်ဆင်နိုင်သော AI ECG တပ်ဆင်ထားသည့် ဝတ်စုံကိုအသုံးပြု၍ မိမိတို့၏ နေ့စဉ်လုပ်ငန်းဆောင်တာများကို မထိခိုက်စေဘဲ ၂၄ နာရီပတ်လုံး နှလုံးရောဂါ အန္တရာယ်စစ်ဆေးမှုကို ပြုလုပ်နိုင်မည်ဖြစ်ကြောင်း သိရသည်။
ယင်းစီမံချက်နှင့် ပတ်သက်၍ နေပြည်တော်တွင်ပြုလုပ်ခဲ့သည့် အခမ်းအနားတွင် ပြည်ထောင်စုဝန်ကြီးက ယခုကဲ့သို့ နှလုံးရောဂါအန္တရာယ်အကဲဖြတ်စနစ်စီမံချက်ကို ပူးပေါင်းဆောင်ရွက်ခြင်းဖြင့် မြန်မာ - တရုတ် နှစ်နိုင်ငံအကြား ပိုမိုချစ်ကြည်ရင်းနှီးမှုနှင့် ကျန်းမာရေးကဏ္ဍပူးပေါင်းဆောင်ရွက်မှုကို မြှင့်တင်ပေးနိုင်မည်ဖြစ်ကြောင်း ပြောကြားခဲ့သည်။
ထို့နောက် ရှန်ကျန်းကရုဏာဆေးပညာဆိုင်ရာ သိပ္ပံနှင့်နည်းပညာကုမ္ပဏီ (Benefm)မှ ဒုတိယဥက္ကဋ္ဌ Mr. Hu Cheng က စီမံချက်နှင့်စပ်လျဉ်း၍ ရှင်းလင်းပြောကြားပြီး ရန်ကုန်ပြည်သူ့ဆေးရုံကြီးမှ ပါမောက္ခ/ဌာနမှူး(နှလုံးဆေးကု) ပါမောက္ခ ဒေါက်တာနွယ်နွယ်က နှလုံးရောဂါအန္တရာယ် အကဲဖြတ်စနစ်စီမံချက် အကောင်အထည်ဖော်မှုကို ရှင်းလင်းတင်ပြခဲ့ကြောင်း သိရသည်။
ဆက်လက်၍ လူနာများတွင် AI ECG တပ်ဆင်ထားသည့် ဝတ်စုံများကိုဝတ်ဆင်၍ နှလုံးရောဂါအန္တရာယ်ကို ဆော့ဝဲလ်များဖြင့် အဖြေထုတ်မှုကိုပြသခဲ့ကြောင်း သိရသည်။
About the Author
