သက်တံ့
၂၀. ၄. ၂၀၂၆
အိန္ဒိယနိုင်ငံ၊ မီဇိုရမ်ပြည်နယ်အတွင်းသို့ မြန်မာနိုင်ငံမှ ဒုက္ခသည်များ အသစ်ထပ်မံဝင်ရောက်လာသည့် လှိုင်းတစ်ခုနှင့် ကြုံတွေ့နေရပြီး နယ်စပ်ဖြတ်ကျော်ဝင်ရောက်လာသူ ၃၄ ဦးအနက် အနည်းဆုံး ၃၁ ဦးသည် မီဇိုရမ်ပြည်နယ်တောင်ပိုင်းရှိ ဟနာသီယယ် (Hnahthial) ခရိုင်သို့ ရောက်ရှိလာခြင်းဖြစ်ကာ ချင်းအမျိုးသားတပ်မတော် (CNA) ၏ အတင်းအဓမ္မ စစ်သားစုဆောင်းမှုကြောင့် ထွက်ပြေးလာကြခြင်းဖြစ်သည်ဟု သတင်းများက ဖော်ပြသည်။
နောက်ဆုံးရောက်ရှိလာသည့် ဒုက္ခသည်များ၏ ပြောကြားချက်အရ ချင်းပြည်နယ်အနောက်ပိုင်း၊ အထူးသဖြင့် ဒေါင်း (Dawn) ကျေးရွာနှင့် အနီးတစ်ဝိုက်မှ လူလားမမြောက်သေးသည့် အသက် ၁၃ နှစ်မှ ၁၈ နှစ်ကြား လူငယ်များသည် CNA အဖွဲ့ဝင်များက ပြုလုပ်သော စစ်သားစုဆောင်းရေး အစည်းအဝေးများသို့ တက်ရောက်ရန် ဖိအားပေးခံနေရကြောင်း သိရသည်။
မီဇိုရမ်သို့ အောင်မြင်စွာ ရောက်ရှိလာသည့် ဒုက္ခသည်အချို့က ပြောကြားရာတွင် အသက်မပြည့်သေးသည့် လူငယ်အမြောက်အမြားမှာ မြန်မာအစိုးရကို ဆန့်ကျင်တိုက်ခိုက်နေသည့် ချင်းလက်နက်ကိုင်အဖွဲ့များတွင် ပါဝင်တိုက်ခိုက်ရန် ကလေးစစ်သားအဖြစ် စုဆောင်းခြင်းခံနေရပြီးဖြစ်သည်ဟု ဆိုသည်။
“ကျွန်တော်တို့လည်း အဲဒီလို ကံကြမ္မာမျိုးနဲ့ မကြုံရအောင် အိမ်တွေကို စွန့်ခွာထွက်ပြေးခဲ့ကြတာပါ။ နယ်စပ်ကို ဖြတ်ကျော်ပြီး ဘေးကင်းရာကို လာရောက်ခိုလှုံခဲ့တာဖြစ်ပါတယ်” ဟု ၎င်းတို့က ပြောပြသည်။
ယခုအသစ်ဝင်ရောက်လာသူများနှင့်ဆိုလျှင် မြန်မာနိုင်ငံတွင် ၂၀၂၁ ဖြစ်စဉ် စတင်ကတည်းက မီဇိုရမ်ပြည်နယ်အတွင်း လာရောက်ခိုလှုံသည့် မြန်မာနိုင်ငံသား စုစုပေါင်းအရေအတွက်မှာ ဧပြီလ ဒုတိယပတ်ကရှိခဲ့သော ၂၉,၆၅၇ ဦးမှ ၂၉,၆၉၁ ဦး အထိ တိုးလာခဲ့သည်။ ၎င်းမှာ မြန်မာနိုင်ငံအတွင်းမှ နေရပ်စွန့်ခွာတိမ်းရှောင်မှုများ အဆက်မပြတ် ရှိနေသေးသည်ကို ဖော်ပြနေသည်။
ဒုက္ခသည်အသစ်များ ထပ်မံရောက်ရှိလာခြင်းကြောင့် ပြည်နယ်အတွင်း လုပ်ဆောင်နေသည့် ဒုက္ခသည်များ၏ ဇီဝဆိုင်ရာ အချက်အလက်စာရင်းသွင်းခြင်း (Biometric Enrollment) လုပ်ငန်းစဉ်အပေါ် အနည်းငယ် သက်ရောက်မှုရှိခဲ့သည်။ ယခင်က လုပ်ငန်းစဉ်ပြီးစီးမှုနှုန်း ၉၆ ဒသမ ၁၇ ရာခိုင်နှုန်းရှိရာမှ ယခုအခါ ၉၆ ဒသမ ၀၉ ရာခိုင်နှုန်းသို့ အနည်းငယ် ကျဆင်းသွားခဲ့သည်။ စာရင်းသွင်းမှု ၁၀၀ ရာခိုင်နှုန်းအပြည့်အဝ ပြီးစီးထားသည့် ဆာချစ် (Serchhip) ခရိုင်တွင်လည်း ဒုက္ခသည်အသစ်များ ထပ်တိုးလာခြင်းကြောင့် ပြီးစီးမှုနှုန်းမှာ ၉၉ ဒသမ ၅၈ ရာခိုင်နှုန်းသို့ ပြန်လည်ကျဆင်းသွားသည်။
တာဝန်ရှိသူများ၏ ပြောကြားချက်အရ ဇန်နဝါရီလကတည်းက ဇီဝဆိုင်ရာ အချက်အလက်စာရင်းသွင်းခြင်း လုပ်ငန်းမှာ နှေးကွေးနေခဲ့ပြီး ခရိုင်အများစုတွင် တိုးတက်မှု အနည်းငယ်သာ ရှိခဲ့သည်။ သို့သော်လည်း အိုင်ဇောလ် (Aizawl)၊ ချမ်ဖိုင်း (Champhai) နှင့် လုံလေ (Lunglei) ခရိုင်များသည် ၂၀၂၅ ခုနှစ်ကုန်တွင် စာရင်းသွင်းခြင်း လုပ်ငန်းကို ၁၀၀ ရာခိုင်နှုန်း အပြီးသတ်နိုင်ခဲ့ကြသည်။
ထို့အပြင် ပြည်နယ်အစိုးရသည် ဘင်္ဂလားဒေ့ရှ်နှင့် မြန်မာ နှစ်နိုင်ငံစလုံးနှင့် နယ်စပ်ချင်း ထိစပ်နေသည့် လောင်တလိုင် (Lawngtlai) ခရိုင်ရှိ ဘင်္ဂလားဒေ့ရှ်ဒုက္ခသည်များအတွက်လည်း ဇီဝဆိုင်ရာ အချက်အလက် မှတ်ပုံတင်ခြင်းကို အရှိန်မြှင့် ဆောင်ရွက်နေသည်။
လတ်တလောတွင် အဆိုပါခရိုင်၌ ခိုလှုံနေသော စစ်တကောင်းတောင်တန်းဒေသ (Chittagong Hill Tracts) မှ ဒုက္ခသည် ၂,၁၁၈ ဦးအနက် ၆၀၃ ဦး (၂၈.၄၇%) ၏ အချက်အလက်များကို ကောက်ယူပြီးစီးပြီဖြစ်သည်။
ဘင်္ဂလားဒေ့ရှ် ဒုက္ခသည် အရေအတွက် အနည်းငယ်သာရှိသော ဆာချစ်၊ လုံလေ နှင့် အိုင်ဇောလ် ခရိုင်များတွင်မူ စာရင်းသွင်းခြင်း လုပ်ငန်းစဉ်များကို ပြီးခဲ့သည့်နှစ်တွင် အပြီးသတ်ခဲ့ကြောင်း တာဝန်ရှိသူများက ပြောသည်။
Ref : Newspoint
About the Author
