နေမိုး
၈. ၄. ၂၀၂၆
အမျိုးသားလေးဦး ဒလန်ဟုတံဆိပ်ကပ်ကာ ရေး PDF များက ဖမ်းဆီးသတ်ဖြတ်သဖြင့် သုံးဦး ပွဲချင်းပြီးသေဆုံးကာ တစ်ဦးဒဏ်ရာရမှု ရေးမြို့နယ်တွင် ဖြစ်ပွားခဲ့သည်ဟု သိရသည်။
NUG ဩဇာခံ PDF များ၏ ကျူးလွန်မှုဖြစ်စဥ်မှာ ၂၀၂၆ ခုနှစ်၊ ဧပြီ ၅ ရက် ည ၁၀ နာရီတွင် မွန်ပြည်နယ်၊ ရေးမြို့နယ်၊ မီးတိုင်တက်ကျေးရွာနေ ကိုမင်း(၂၆)နှစ်၊ ကိုဇင်ကိုကို(၂၆)နှစ်၊ ဦးသိန်းငွေ(၅၇)နှစ်နှင့် ဦးသန်းလှိုင်(၃၂)နှစ်တို့သည် ၎င်းတို့၏နေအိမ်အသီးသီး၌ ရှိနေစဉ် PDF ၂၀ ဦးခန့်က ဆိုင်ကယ်များဖြင့် ရောက်ရှိလာပြီး “ဒလန်များ” ဟုစွပ်စွဲပြောဆို၍ ဖမ်းဆီးခေါ်ဆောင်သွားခဲ့ကြသည်။
ထို့နောက် မီးတိုင်တက်ကျေးရွာတောင်ဘက် တစ်မိုင်ခန့်အကွာ ခေါဇာ-ကျုံညဲကားလမ်းပေါ်အရောက်၌ သေနတ်ဖြင့် ပစ်ခတ်သွားခဲ့သဖြင့် ကိုမင်း၊ ကိုဇင်ကိုကိုနှင့် ဦးသိန်းငွေတို့ သုံးဦးတွင် ကျည်ထိမှန် ဒဏ်ရာများရရှိကာ သေဆုံးသွားခဲ့ပြီး ဦးသန်းလှိုင်တွင် ကျည်ထိမှန် ဒဏ်ရာများရရှိခဲ့၍ ဆေးကုသနိုင်ရေး ရေးမြို့နယ်ပြည်သူ့ဆေးရုံသို့ ပို့ဆောင်ထားရှိကြောင်း သိရသည်။
နွေဦးတော်လှန်ရေးစတင်ချိန် ၂၀၂၁ ခုနှစ် ဖေဖော်ဝါရီလ ၁ ရက်မှ ယမန်နှစ် ဒီဇင်ဘာလ ၂၆ ရက်အထိ NUG၊ PDF နှင့် EAOs တို့က ဒလန်၊ သူလျှို၊ ပျူစောထီး၊ နစကယန္တရားလည်ပတ်စေသူဟု စွပ်စွဲကာ အကြမ်းဖက် သတ်ဖြတ်မှုများကြောင့် အပြစ်မဲ့အရပ်သားများ၊ သံဃာတော်များ၊ ကလေးသူငယ်များ၊ အုပ်ချုပ်ရေးဆိုင်ရာ တာဝန်ရှိသူများ၊ အစိုးရဝန်ထမ်းများ စုစုပေါင်း ၉၉၀၈ ဦး သေဆုံးခဲ့ကာ ၁၃၀၁၁ ဦး ဒဏ်ရာရရှိခဲ့သည်။
About the Author
