နေမိုး
၂၄. ၁. ၂၀၂၆
ရန်ကုန်တိုင်းဒေသကြီး၊ မှော်ဘီမြို့နယ်တွင် လင်မယားနှစ်ဦး ရန်ဖြစ် စကားများကြရာမှ ခင်ပွန်းဖြစ်သူက ဇနီးသည်အား ခေါင်းဖြတ်သတ်ဖြတ်မှု ယနေ့ နံနက်ပိုင်းက ဖြစ်ပွားခဲ့ကြောင်း သိရသည်။
ဖြစ်စဥ်မှာ ယနေ့ ဇန်နဝါရီ ၂၄ ရက် နံနက် ၁၀ နာရီ ဝန်းကျင်က မှော်ဘီ၊ ဆတ်သွားတော၊ ပေတစ်ရာမြောက်ပိုင်းရပ်ကွက်တွင် နေထိုင်သည့် လူငယ်လင်မယား စကားများကြရာမှ နေအိမ်အတွင်း၌ပင် ခင်ပွန်းဖြစ်သူက ဇနီးသည်အား ဓားအရှည်ဖြင့် ခေါင်းဖြတ်သတ်လိုက်ခြင်းဖြစ်သည်ဟု သိရသည်။
ထို့နောက် ခင်ပွန်းဖြစ်သူသည် ပြတ်သွားသည့် ဇနီးသည်၏ ခေါင်းပြတ်ကို လက်တစ်ဖက်ကကိုင်ကာ လက်တစ်ဖက်က ဓားကိုကိုင်၍ လမ်းမအလယ် ထွက်လာပြီး ခေတ္တ ထိုင်နေခဲ့သည်ကို CCTV မှတ်တမ်းတွင် တွေ့မြင်ရသည်။ ထို့နောက် တရားခံက လမ်းသွားလမ်းလာကားတစ်စီးကို တား၍ ဓားဖြင့် ခြိမ်းခြောက်ကာ ပြည်လမ်းအတိုင်း မှော်ဘီတိုးဂိတ်ဘက်သို့ မောင်းနှင်စေခဲ့သည်။ ယင်းနောက် တိုးဂိတ်အကျော်တွင် ခေါင်းအား ပစ်ချထားခဲ့ကြောင်းနှင့် ယင်းအားဖမ်းမိခဲ့ကြောင်း သိရသည်။
တရားခံလူငယ်နှင့် သေဆုံးသူအမျိုးသမီးငယ်တွင် ရင်သွေးနှစ်ဦးရှိပြီး ကျူးလွန်သူမှာ အလုပ်ထုတ်ခံရခြင်း၊ Slot Game များရှုံးခြင်းနှင့် မူးယစ်ဆေးနှင့်အရက်သေစာသုံးစွဲထားခြင်းများကြောင့် ဇနီးကို လည်ပင်းဖြတ်သတ်ဖြတ်လိုက်ခြင်းဖြစ်ကြောင်းနှင့် အမျိုးသမီး၏ ကြွင်းရစ်သော ရုပ်အလောင်းကို ဇာတိ သာယာဝတီမြို့နယ်သို့ မှော်ဘီဒေသခံလူမှုကူညီရေးအသင်းက ယနေ့ညနေတွင် ပြန်လည်ပို့ဆောင်ပေးခဲ့ကြောင်း သိရသည်။
About the Author
