ပြည်သူကိုကူညီနေသော ရင်ခုန်သံသွေးလှူရှင်နှင့် အရေးပေါ်ကယ်ဆယ်ရေးအသင်း(ထားဝယ်) မှ အသင်းဝင်တစ်ဦးကို PDF ဖမ်းဆီး၊ ကျန်အသင်းဝင်များ၏ လုံခြုံရေးပါစိုးရိမ်ရသဖြင့် ကူညီရေးအလုပ်များ ယာယီရပ်နားထားရပြီး ဖမ်းဆီးထားသူ ပြန်လွှတ်ပေးရန် တောင်းဆို

နေမိုး
၁. ၁၂. ၂၀၂၅

ထားဝယ်မြို့တွင် အခြေစိုက်ပြီး ပြည်သူများ၏ နာမကျန်းမှုနှင့် အခက်အခဲများကိုကူညီနေသော ရင်ခုန်သံသွေးလှူရှင်နှင့် အရေးပေါ်ကယ်ဆယ်ရေးအသင်း(ထားဝယ်) မှ အသင်းဝင်တစ်ဦးကို PDF များက ဖမ်းဆီးလိုက်သဖြင့် ကျန်အသင်းဝင်များ၏ လုံခြုံရေးပါစိုးရိမ်ရသည့်နောက် ရင်ခုန်သံသွေးလှူရှင်နှင့် အရေးပေါ်ကယ်ဆယ်ရေးအသင်း(ထားဝယ်) ၏ ကူညီကယ်ဆယ်ရေးအလုပ်များကို ယာယီရပ်နားထားရသလို ဖမ်းဆီးထားသူကို ပြန်လွှတ်ပေးရန်လည်း ရင်ခုန်သံသွေးလှူရှင်နှင့် အရေးပေါ်ကယ်ဆယ်ရေးအသင်း(ထားဝယ်) က တောင်းဆိုထားသည်။

ဖြစ်စဥ်မှာ ၂၀၂၅ ခုနှစ်၊ နိုဝင်ဘာ ၂၉ ရက် မွန်းလွဲ ၁ နာရီတွင် တနင်္သာရီတိုင်းဒေသကြီး၊ ထားဝယ်မြို့ရှိ “ရင်ခုန်သံသွေးလှူရှင်နှင့် အရေးပေါ်ကယ်ဆယ်ရေးအသင်း(ထားဝယ်)” မှ အသင်းဝင်များဖြစ်ကြသည့် ထားဝယ်မြို့နေ ဦးတင်မောင်နိုင်(၅၃)နှစ်၊ ဦးဟိုသန်း(၄၇)နှစ်နှင့် မောင်ဘုန်းမြတ်ကိုကို(၁၉)နှစ်တို့သည် ရေဖြူမြို့နယ်၊ ကံပေါက်ကျေးရွာသို့ 5Q/XXXX VOXY အမျိုးအစား မော်တော်ယာဉ်ဖြင့် နာရေးသွားရောက်ပို့ဆောင်ပေးခဲ့ပြီး အဆိုပါကျေးရွာမှ ထားဝယ်မြို့သို့ ထားဝယ်- မြိတ်ကားလမ်းအတိုင်း ပြန်လည်ထွက်ခွာလာစဉ် ရေဖြူမြို့နယ်၊ ကျောက်ကညာကျေးရွာနှင့် ညင်းထွေး ကျေးရွာကြား ရော်ဘာခြံအနီးရောက် PDF နှစ်ဦးက မော်တော်ယာဉ်အားတားဆီးကာ ယာဉ်ပေါ်ပါလာသူများအနက် မောင်ဘုန်းမြတ်ကိုကိုအား အကြမ်းဖက် ခြိမ်းခြောက်၍ ဖမ်းဆီးခေါ်ဆောင်သွားခဲ့ကြောင်း ပြည်ထဲရေးဝန်ကြီးဌာနမှ သိရသည်။

ပြည်သူကို ကူညီပေးနေသည့် သာမန်ပရဟိတအဖွဲ့မှ အဖွဲ့ဝင်တစ်ဦးအား PDF များက ထိုသို့ဖမ်းဆီးလိုက်သဖြင့် ရင်ခုန်သံသွေးလှူရှင်နှင့် အရေးပေါ်ကယ်ဆယ်ရေးအသင်း(ထားဝယ်) ၏ ကူညီမှုများလည်း နိုဝင်ဘာ ၃၀ ရက်နေ့မှစတင်ကာ ရပ်ဆိုင်းလိုက်ရသလို မောင်ဘုန်းမြတ်ကိုကိုအား ပြန်လွှတ်ပေးရန်လည်း တောင်းဆိုထားသည်။

တောင်းဆိုချက်တွင် “မိဘပြည်သူများ ထံအသိပေး ပန်ကြားခြင်း” ခေါင်းစဥ်ဖြင့် ဖော်ပြထားပြီး ထားဝယ်မြို့၊အိမ်ရှေ့ပြင်ရပ်ကွက်၊ မီးပွိုင့်လမ်းဆုံတွင်ဖွင့်လှစ်ထားသော ရင်ခုန်သံသွေးလှူရှင်နှင့် အရေးပေါ်လူနာကူညီသယ်ဆောင်ရေးအဖွဲ့တွင် အသင်းဝင်အဖြစ် ပါဝင်ကူညီဆောင်ရွက်နေသူ မောင်ဘုန်းမြတ်ကိုကို သည် လူနာတင်ယာဥ်ဖြင့် ကံဘောက်၊ ဘောက်ချောင်းရွာသို့ လူနာပို့ဆောင်ပြီးအပြန်လမ်း ရေး-ထားဝယ်လမ်း၊ ရေဖြူမြို့နယ်အလွန် ညင်းထွေးရွာအဝင်အနီးအရောက်တွင် အဖွဲ့စည်းတစ်ခုမှဖမ်းဆီးခေါ်ဆောင်သွားပါသည်။ ပရဟိတအဖွဲ့စည်းများတွင်ပါဝင်ကူညီဆောင်ရွက်ပေးနေသော မောင်ဘုန်းမြတ်ကိုကိုအား အမြန်ဆုံးပြန်လွှတ်ပေးပါရန် ရင်ခုန်သံသွေးလှူရှင်နှင့်အရေးပေါ်လူနာတင်ယာဥ်အသင်း အသင်းသူ/ အသင်းသားများ၊ ပရဟိတညီအစ်ကိုမောင်နှစ်မများမှ မေတ္တာရပ်ခံ တောင်းဆိုလိုက်ပါသည်။ အဆိုပါဖြစ်စဥ်နှင့်ပတ်သက်၍ လက်ရှိကူညီဆောင်ရွက်ပေးနေကြသော ပရဟိတအသင်းသူ/အသင်းသားများအနေဖြင့်ဆက်လက်ကူညီဆောင်ရွက်ပေးရန်အခက်ခဲများရှိလာနေသည့်အတွက်ကြောင့် မိဘများမှလည်းစိုးရိမ်ပူပင်မှုရှိနေကြသဖြင့် ရင်ခုန်သံ သွေးလှူရှင် နှင့်အရေးပေါ်လူနာတင်ယာဥ်အသင်းမှာယနေ့ (၃၀.၁၁..၂၀၂၅ ) မှစ၍ရက် ကန့်သတ်မရှိရပ်နားထားမည်ဖြစ်ကြောင်းမိဘပြည်သူများထံအသိပေးကြောင်းကြားအပ်ပါသည်။”ဟု ဖော်ပြထားသည်။