နေမိုး
၂၇. ၁၀. ၂၀၂၅
အကြမ်းဖက်လက်နက်ကိုင်အဖွဲ့ဖြစ်သော TNLA နှင့် PDF ထောင်ထားသည့် မိုင်းကို ဆိုင်ကယ်ဖြင့် တိုက်မိရာက ၁၅ နှစ်အရွယ်သမီးငယ်တစ်ဦးသေဆုံးပြီး တစ်ဦးဒဏ်ရာရမှု ကျောက်မဲမြို့နယ်တွင် ဖြစ်ပွားခဲ့သည်။
ဖြစ်စဉ်မှာ အောက်တိုဘာ ၂၅ ရက် နံနက် ၉ နာရီ ၃၀ မိနစ်တွင် ရှမ်းပြည်နယ်၊ ကျောက်မဲမြို့နယ်၊ ချောင်းတန်းကျေးရွာနေ ဦးအောင်ပန်း(၅၃)နှစ်သည် ပါပုတ်ကျေးရွာနေ မချယ်ရီ(၁၅)နှစ်နှင့်အတူ ငါးမိုင်ကျေးရွာရှိ တောင်ယာခင်းသို့ သွားရောက်ရန် ကျောက်မဲ-မိုင်းငေါ့သွား ကားလမ်းအတိုင်း ဆိုင်ကယ်ဖြင့် ထွက်ခွာလာစဉ် တောင်ယာခင်းအနီးအရောက် TNLA အကြမ်းဖက်အဖွဲ့နှင့် PDF ပူးပေါင်းအဖွဲ့ထောင်ထားသည့် မိုင်းတစ်လုံးအား တိုက်မိပေါက်ကွဲခဲ့မှုကြောင့် မချယ်ရီတွင် မိုင်းပေါက်ကွဲစ ထိမှန်ဒဏ်ရာများရရှိကာ သေဆုံးသွားခဲ့ပြီး ဦးအောင်ပန်းတွင် မိုင်းပေါက်ကွဲစ ထိမှန်ဒဏ်ရာများရရှိခဲ့၍ ဆေးကုသနိုင်ရေး ကျောက်မဲမြို့၊ အမှတ်(၂)ရပ်ကွက်ရှိ ယာယီပြည်သူ့ဆေးရုံသို့ ပို့ဆောင်ထားရှိကြောင်း သိရသည်။
ထို့အတူ အောက်တိုဘာ ၂၄ ရက် မွန်းလွဲ ၃ နာရီ ၅ မိနစ်ကလည်း မကွေးတိုင်းဒေသကြီး၊ ပေါက်မြို့နယ်၊ ထန်းတပင်ကျေးရွာနေ ဦးလှသန်း(၆၂)နှစ်သည် ၎င်း၏ နေအိမ်မှ ကျေးရွာတောင်ဘက် တစ်မိုင်ခန့်အကွာရှိ ပေါက်ချောင်းအနီး ဝါးတော၌ ဝါးခုတ်နေစဉ် PDF များ ထောင်ထားသည့် မိုင်းတစ်လုံးအား နင်းမိပေါက်ကွဲခဲ့မှုကြောင့် ၎င်းတွင် မိုင်းပေါက်ကွဲစ ထိမှန်ဒဏ်ရာများရရှိခဲ့ကြောင်း သတင်းအရ လုံခြုံရေးတပ်ဖွဲ့ဝင်များက သွားရောက်စစ်ဆေး၍ ဒဏ်ရာရရှိသူအား ဆေးကုသနိုင်ရေး ပေါက်မြို့နယ်ပြည်သူ့ဆေးရုံသို့ ပို့ဆောင်ထားရှိကြောင်း သိရသည်။
About the Author
