၂၂.၁၀.၂၀၂၅
Written by Hey Mar
ကျောက်ကပ်ရောဂါအပါအဝင် နှလုံးရောဂါ၊ ဆီးချိုရောဂါတွေ ခံစားနေရတဲ့ အသက် ၆၃ နှစ်အရွယ် အမျိုးသမီးကြီးတစ်ဦးကို ဆေးစာအုပ်တွေ သောက်သုံးဆဲ ဆေးဝါးတွေနဲ့အတူ စွန့်ပစ်တဲ့ဖြစ်စဉ် မနေ့က အောက်တိုဘာ ၂၁ ရက်နေ့ ည ၉ နာရီဝန်းကျင်က ရန်ကုန်မြို့ရှိ မဟာဗန္ဓုလ တံတားအောက်မှာဖြစ်ပွားခဲ့တယ်လို့ လူမှုကူညီရေး အသင်းထံကနေ သိရပါတယ်။
အဆိုပါ အမျိုးသမီးကြီးဟာ အိမ်ခြေယာမဲ့ပုံစံမျိုးထဲက မဟုတ်ဘဲ သင့်တင့်တဲ့ အသုံးအဆောင်ပစ္စည်းတချို့နဲ့အတူ မွတ်စလင်မ်ကုသိုလ်ဖြစ် ကျောက်ကပ်ဆေးတဲ့ ဆေးရုံအနားမှာ လာစွန့်ပစ်တာမို့ ဆက်လက် ဆေးကုသပြုစုဖို့ အဆင်မပြေတော့တဲ့အတွက် အခုလို လာပစ်တယ်လို့ ယူဆကြောင်း ရှင်သန်ခြင်း လူမှုကူညီရေးအသင်းတာဝန်ရှိသူက MT News ကို ပြောပါတယ်။
အဆိုပါ နာမကျန်းတဲ့ အမျိုးသမီးကြီးက အမောဖောက်နေပြီး စကားလည်းမပြောနိုင်တဲ့အတွက် လူမှုကူညီရေးအသင်းအဖွဲ့တွေက ဆွေမျိုးသားချင်းတွေကို ဝိုင်းဝန်းရှာဖွေပေးခဲ့ပြီး ညတွင်းချင်း ရန်ကုန်ဆေးရုံကြီးအရေးပေါ်ကို ကူညီပို့ဆောင်ပေးခဲ့တယ်လို့ သိရပါတယ်။
“အခက်အခဲကတော့ လူတိုင်းရှိကြမှာပါ။ ဒါပေမယ့် အခုလို လမ်းဘေး ပလက်ဖောင်းမှာ စွန့်ပစ်တာကတော့ ရောဂါရှိသူမို့ အချိန်မရွေး သေသွားနိုင်တာပေါ့။ နေဒဏ် မိုးဒဏ်နဲ့။ ဆေးစာအုပ်မှာပါတဲ့ လိပ်စာတွေ တယ်လီဖုန်းနံပါတ်တွေ ကျွန်တော်တို့ လိုက်တော့ ပထမ တစ်ကြိမ်ဖုန်းကိုင်တယ်ဗျ။ အကျိုးအကြောင်းပြောပြီး ပြန်ပို့ဖို့ပြောတာပေါ့… ကျွန်တော်တို့လည်း။ စွန့်ပစ်ခံရသူအမျိုးသမီးကြီးရဲ့ ညီမဝမ်းကွဲတွေလို့တော့ ပြောပါတယ်။ နောက်တစ်ကြိမ် လာပို့နေပြီ။ လမ်းမှာမို့ နေရာအတည်ပြုဖို့ ထပ်ဆက်တော့ မကိုင်တော့ဘူး။ အဲ့ဒါနဲ့ နေရာ အတော်ရှာလိုက်ရတယ်။ တွေ့တဲ့အခါရပ်မိရပ်ဖနဲ့ ပြန်အပ်ခဲ့ပြီး သူတို့ကို မှာခဲ့ပါတယ်။ ရန်ကုန်ဆေးကြီးမှာ ကုသချင်တဲ့အတွက် လူနာရှင်အဖြစ် တစ်ရက် နှစ်ရက် နေပေးပါ။ ကျန်တာ ကျွန်တော်တို့ ဆက်လုပ်ပါ့မယ်။ ဆေးရုံက လူနာရှင်၊ လူနာစောင့်ပါမှ လက်ခံပေးတာမို့ပါလို့ ပြောပြရတယ်။ အတော်အတန်နေကောင်းသွားလို့ ဆက်ပြီး လက်ခံမထားချင်ဘူးဆိုရင်လည်း ကျွန်တော်တို့ စီစဉ်ပေးမယ့် အစီအစဉ်တွေကိုပါ ပြောပြခဲ့ပါတယ်” လို့ ရှင်သန်ခြင်း လူမှုကူညီရေးအသင်းတာဝန်ရှိသူက ပြောပါတယ်။
မိသားစုဝင်တွေရှိလျက်နဲ့ နာမကျန်းသူတွေကို အခုလို စွန့်ပစ်တာမျိုး မပြုလုပ်ဘဲ ကိုယ်နဲ့ အနီးဆုံးမှာရှိတဲ့ ပရဟိတအသင်းတွေဆီကနေ အကြံဥာဏ်ရယူ အကူအညီတောင်းခံပေးကြဖို့လည်း ရန်ကုန် လူမှုကယ်ဆယ်ရေး အဖွဲ့ (YRO ) က အကြံပြုထားပါတယ်။
About the Author
