၂၅. ၇. ၂၀၂၅
Translated by Thettant
အာသံရိုင်ဖယ်တပ်ဖွဲ့သည် မီဇိုရမ်ပြည်နယ်တွင် စိတ်ကြွရူးသွပ်ဆေးပြား Methamphetamine ဆေးပြားများကို ရူပီး သိန်း ၃၀၀ (၃ ဒသမ ၀၃ ကုဋေ) ကျော်ဖိုး ဖမ်းဆီးရမိခဲ့သလို မြန်မာနိုင်ငံသားတစ်ဦးဖြစ်သည့် မူးယစ်ဆေးဝါးရောင်းဝယ်ဖြန့်ဖြူးသူတစ်ဦးကိုပါ ဖမ်းဆီးရမိခဲ့ကြောင်း တာဝန်ရှိသူများက ကြာသပတေးနေ့တွင် ပြောကြားခဲ့သည်။
အာသံရိုင်ဖယ်တပ်ဖွဲ့ဝင်များသည် အတိအကျရရှိလာသော သတင်းအချက်အလက်များအပေါ် အခြေခံ၍ ဗုဒ္ဓဟူးနေ့ညက အရှေ့မီဇိုရမ်ပြည်နယ်၊ ချမ်ဖိုင်းခရိုင်၊ ဇိုတီဒေသများတွင် စစ်ဆင်ရေးတစ်ခု စတင်ခဲ့ကြောင်း ကာကွယ်ရေးဌာနပြောရေး ဆိုခွင့်ရှိသူတစ်ဦးက ပြောကြားခဲ့သည်။
ရှာဖွေရေးစစ်ဆင်ရေးအတွင်း အာသံရိုင်ဖယ်တပ်ဖွဲ့ဝင်များသည် တားမြစ်ထားသော စိတ်ကြွရူးသွပ်ဆေးပြား Methamphetamine (Yaba သို့မဟုတ် ပါတီဆေးပြားများဟုလည်း ခေါ်သည်) ၁ ဒသမ ၁၁ ကီလိုဂရမ် (ရူပီး ၃ ဒသမ ၀၃ ကုဋေကျော်ဖိုး) ကို မြန်မာနိုင်ငံသား လယ်လ်ဖကောမာ (Lalfakawma) ဟုဆိုသူ ချင်းလူမျိုးတစ်ဦးထံမှ သိမ်းဆည်းရမိခဲ့သည်။
အဆိုပါ မူးယစ်ဆေးဝါးများနှင့် ပုဂ္ဂိုလ်ကို မူးယစ်ဆေးဝါး မှောင်ခိုမှုအတွက် အဓိကနေရာတစ်ခုဖြစ်သည့် ချမ်ဖိုင်ရှိ အခွန်နှင့် မူးယစ်ဆေးဝါးဌာန တာဝန်ရှိသူများထံ လွှဲပြောင်းပေးခဲ့သည်။ ထိုအတောအတွင်း အာသံရိုင်ဖယ်တပ်ဖွဲ့သည် ကြာသပတေးနေ့က ဆိုင်ဟားခရိုင်တွင် “မူးယစ်ဆေးဝါးသုံးစွဲခြင်းနှင့် ရောင်းဝယ်ခြင်း – ပြစ်မှုထင်ရှားသောပြစ်မှု” ခေါင်းစဉ်ဖြင့် အသိပညာပေးဟောပြောပွဲတစ်ခု ပြုလုပ်ခဲ့သည်။
ဟောပြောပွဲ၏ ရည်ရွယ်ချက်မှာ ဒေသခံလူထု၊ အထူးသဖြင့် လူငယ်များအား မူးယစ်ဆေးဝါးအလွဲသုံးမှု၏ ဆိုးကျိုးများနှင့် မူးယစ်ဆေးဝါး ရောင်းဝယ်ဖောက်ကားမှုနှင့် ဆက်နွှယ်နေသော ကြီးလေးသည့် ဥပဒေရေးရာ အကျိုးဆက်များအကြောင်း ပညာပေးရန်ဖြစ်ကြောင်း ကာကွယ်ရေးဌာနပြောရေးဆိုခွင့်ရှိသူက ပြောကြားခဲ့သည်။
ဟောပြောသူများက လူ့အဖွဲ့အစည်းနှင့် အထူးသဖြင့် မီဇိုရမ်ပြည်နယ် နယ်စပ်ဒေသများတွင် မူးယစ်ဆေးဝါးခြိမ်းခြောက်မှု မြင့်တက်လာနေပုံကို မီးမောင်းထိုးပြခဲ့ပြီး ပါဝင်သူများအား သတိရှိရန်နှင့် ထောင်ချောက်အတွင်း မကျရောက်စေရန် တိုက်တွန်းခဲ့သည်။
ဤအစီအစဉ်ကို တက်ရောက်လာသူများက ကောင်းစွာလက်ခံရရှိခဲ့ပြီး အာသံရိုင်ဖယ်တပ်ဖွဲ့၏ အသိပညာပေးမှုနှင့် မူးယစ်ဆေးဝါးကင်းစင်သော လူ့အဖွဲ့အစည်းကို မြှင့်တင်ရန် ကြိုးပမ်းမှုများကို ကျေးဇူးတင်ကြောင်း ပြောကြားခဲ့သည်။ အာသံရိုင်ဖယ်တပ်ဖွဲ့သည် ထိုသို့သော ပြင်ပဆက်သွယ်ရေး အစီအစဉ်များမှတစ်ဆင့် ဒေသခံလူထု၏ သာယာဝပြောရေးနှင့် ဘေးကင်းလုံခြုံရေးအတွက် ဆက်လက်ဆောင်ရွက်သွားရန် ကတိပြုထားကြောင်း ပြောရေးဆိုခွင့်ရှိသူက ပြောကြားခဲ့သည်။
မြန်မာနိုင်ငံ ချင်းပြည်နယ်သည် အိန္ဒိယနိုင်ငံသို့ တရားမဝင်တင်ပို့နေသည့် မူးယစ်ဆေးဝါး မှောင်ခိုမှု၊ တောရိုင်းတိရစ္ဆာန် မှောင်ခိုမှုနှင့် လက်နက်မှောင်ခိုမှုအပါအဝင် အခြားတရားမဝင် လုပ်ဆောင်မှုများအတွက် အဓိကဗဟိုချက်တစ်ခု ဖြစ်လာခဲ့သည်။ မှောင်ခိုပစ္စည်းများကို မီဇိုရမ်ပြည်နယ်ရှိ ခရိုင်ခြောက်ခုဖြစ်သော ချမ်ဖိုင်း၊ ဆီယာဟား၊ လောင်တီလိုင်၊ ဟနားသီယယ်၊ ဆိုက်တူအယ်လ်နှင့် ဆာချစ်ပ်တို့မှတစ်ဆင့် မကြာခဏ ပို့ဆောင်လေ့ရှိပြီး ယင်းခရိုင်များသည် မြန်မာနိုင်ငံနှင့် ၅၁၀ ကီလိုမီတာ၊ ဘင်္ဂလားဒေ့ရှ်နိုင်ငံနှင့် ၃၁၈ ကီလိုမီတာ ရှည်လျားသော ခြံစည်းရိုးမရှိသည့် နယ်နိမိတ်များကို မျှဝေထားသည်။
Ref, Zee News
About the Author
