ဘန်ကောက်တွင် ယနေ့ဖြစ်ပွားသည့် နေအိမ်မီးလောင်မှုတစ်ခုအတွင်း လူ ၂ ဦးနှင့် ကြောင်အကောင် ၃၀ ကျော် သေဆုံး

သက်တံ့
၁၈. ၇. ၂၀၂၆

ထိုင်းနိုင်ငံ၊ ဘန်ကောက်မြို့၊ သွန်ဘူရီ (Thonburi) ခရိုင်ရှိ သုံးထပ်တိုက်နေအိမ်တစ်လုံးတွင် ယနေ့ ဇူလိုင်လ ၁၈ ရက် နံနက်အစောပိုင်းက မီးလောင်မှုဖြစ်ပွားခဲ့ရာ လူနှစ်ဦး သေဆုံးလျက်တွေ့ရှိခဲ့ပြီး ကြောင်အကောင်ရေ ၃၀ ကျော် သေဆုံးခဲ့ကြောင်း အာဏာပိုင်များက ပြောကြားခဲ့သည်။

ဆမ်ရေ (Samre) ရဲစခန်းမှ ရဲတပ်ဖွဲ့ဝင်များသည် ဆမ်ရေရပ်ကွက်၊ ဆွမ်ဒက်ဖရာချောင်တက်ဆင်လမ်း (Somdet Phra Chao Taksin Road)၊ ဆွမ်ဒက်ဖရာချောင်တက်ဆင် ၁၁ လမ်းခွဲ (Soi Somdet Phra Chao Taksin 11) ရှိ နေအိမ်တစ်လုံးတွင် နံနက် ၆ နာရီ၌ မီးလောင်မှုဖြစ်ပွားကြောင်း သတင်းပို့ချက်ကို လက်ခံရရှိခဲ့သည်။

တာလတ်ဖလူး (Talat Phlu) မီးသတ်နှင့် ကယ်ဆယ်ရေးစခန်းမှ မီးသတ်သမားများနှင့် ပိုတက်တွန်းဖောင်ဒေးရှင်း (Poh Teck Tung Foundation) မှ စေတနာ့ဝန်ထမ်းများကို အခင်းဖြစ်ပွားရာနေရာသို့ စေလွှတ်ခဲ့သည်။

မီးသည် မြေညီထပ်မှ စတင်လောင်ကျွမ်းခဲ့ပြီး ဒုတိယထပ်သို့ ကူးစက်သွားခြင်းဖြစ်ကြောင်း အာဏာပိုင်များက ပြောသည်။ မီးသတ်သမားများသည် ၁၅ မိနစ်ခန့်အကြာတွင် မီးကို ထိန်းချုပ်နိုင်ခဲ့သည်။

ဒုတိယထပ်ရှိ အခန်းတစ်ခန်းအတွင်း၌ အသက် ၆၂ နှစ်အရွယ် အမျိုးသားတစ်ဦးနှင့် အသက် ၅၈ နှစ်အရွယ် အမျိုးသမီးတစ်ဦးတို့၏ ရုပ်အလောင်းများကို ကယ်ဆယ်ရေးသမားများက တွေ့ရှိခဲ့သည်။

ထို့အပြင် လှောင်အိမ်များအတွင်း သေဆုံးနေသည့် ကြောင်အကောင်ရေ ၃၀ ကျော်၏ ရုပ်အလောင်းများကိုလည်း အရာရှိများက တွေ့ရှိခဲ့သည်။ အခြားကြောင် ၁၃ ကောင်ကိုမူ နေအိမ်အတွင်းမှ အသက်ရှင်လျက် ကယ်ဆယ်နိုင်ခဲ့သည်။

မှုခင်းရဲတပ်ဖွဲ့နှင့် သီရိရာဇ်ဆေးရုံ (Siriraj Hospital) မှုခင်းဆေးပညာသိပ္ပံမှ ဆရာဝန်များသည် ရုပ်အလောင်းများကို ရင်ခွဲစစ်ဆေးရန် မပို့ဆောင်မီ အခင်းဖြစ်ပွားရာနေရာကို စစ်ဆေးပြီး သက်သေအထောက်အထားများ စုဆောင်းခဲ့ကြသည်။

မီးလောင်ရသည့် အကြောင်းရင်းအတိအကျကို စုံစမ်းစစ်ဆေးနေဆဲဖြစ်သော်လည်း လျှပ်စစ်ဝါယာရှော့ခ် (Electrical short circuit) ဖြစ်ပွားရာမှတစ်ဆင့် မီးလောင်ခဲ့ခြင်းဖြစ်နိုင်ကြောင်း အာဏာပိုင်များက ယူဆထားပြီး ရဲတပ်ဖွဲ့က ဆက်လက်စုံစမ်းစစ်ဆေးလျက်ရှိသည်။

Ref: Khaosod