၃. ၄. ၂၀၂၄
Written by Nay Moe
ပဲခူးတိုင်း၊ ပေါက်ခေါင်းမြို့နယ်၊ ညောင်ပင်အင်းကျေးရွာအုပ်စု အုပ်ချုပ်ရေးမှူး ဦးတင်ထွေးနဲ့ သားဖြစ်သူ စစ်မှူထမ်းဟောင်း တပ်ကြပ်ကြီး(ငြိမ်း)ကျော်သူစိုးတို့ ၂ ဦးကို ဖမ်းဆီးပြီး သတ်ဖြတ်လိုက်တယ်လို့ ပြည်ခရိုင် ပြည်သူ့ကာကွယ်ရေးတပ်မတော်၊ တပ်ရင်း ၃၆၀၁ PPDF က ထုတ်ပြန်ထားပါတယ်။
ဒီလက်နက်မဲ့သားအဖနှစ်ဦးဖြစ်တဲ့ ဦးတင်ထွေးနဲ့သားဖြစ်သူကိုကျော်သူစိုးတို့ကို ဧပြီလ ၂ ရက်နေ့ ည ၈ နာရီအချိန် ပဲခူးတိုင်း၊ ပြည်ခရိုင်၊ ပေါက်ခေါင်းမြို့နယ်၊ ညောင်ပင်အင်းအုပ်စု၊ ညောင်ပင်အင်းရွာကနေ ပြည်ခရိုင်ပြည်သူ့ကာကွယ်ရေးတပ်မတော် တပ်ရင်း ၃၆၀၁ PPDFတပ်ရင်း၊တပ်ခွဲ ၄ ပြည်တော်ဝင်အဖွဲ့နဲ့ တပ်ခွဲ ၅ နွေဦးအဖွဲ့တို့က ဖမ်းဆီးလာခဲ့ပြီး သဖန်းကိုင်းရွာ ဆည်ကြီးကုန်းအရှေ့ ဘက် သရက်ချောင်းလမ်းအရောက်မှာ ပစ်သတ်လိုက်ကြတာဖြစ်ပါတယ်။
PDF တွေပစ်သတ်လို့ သေဆုံးသွားရရှာတဲ့ သားအဖနှစ်ဦးထံက မှတ်ပုံတင်တစ်ခု၊ စစ်မှုထမ်းဟောင်းအဖွဲ့ဝင်ကတ်ပြားတစ်ခု သိမ်းယူလိုက်တဲ့အပြင် ဆိုင်ကယ်တစ်စီးနဲ့ လက်ကိုင်ဖုန်း ၂ လုံးတို့ကို လုယက်သိမ်းယူခဲ့တယ်လို့လည်း ပြောပါတယ်။
ပဲခူးတိုင်းဟာ အုပ်ချုပ်ရေးမှူးနဲ့ ပြည်သူတွေ အများအပြား သတ်ဖြတ်ခံရတဲ့တိုင်းတစ်ခုဖြစ်သလို နွေဦးတော်လှန်ရေးစတင်တဲ့အချိန်ကနေ ၂၀၂၄ ခုနှစ် မတ်လ ၅ ရက်အထိ ကလေးသူငယ် ၂၃၀ ကျော်၊ သံဃာတော် အပါး ၉၀ ကျော်၊ ရပ်ကျေးအုပ်ချုပ်ရေးမှူးနဲ့ဆရာဆရာမ အပါအဝင် နိုင်ငံ့ဝန်ထမ်း ၁၁၂၄ ဦးနဲ့ ကျောင်းသားကျောင်းသူတွေစတဲ့ ပြည်သူ ၇၀၀၀ ကျော်ဟာ “ဒလန်၊ သူလျှို၊ နစကယန္တရားလည်ပတ်အောင်ပြုလုပ်ပေးသူ” ဆိုတဲ့ စွပ်စွဲချက်တွေနဲ့ NLD, NUG, PDF နဲ့ EAOs တို့ရဲ့ သတ်ဖြတ်မှု ခံထားရပါတယ်။
