ဓာတ်ပုံ - MFSD နှင့် အားမာန်လူငယ်ပရဟိတအသင်း
၁၈. ၈. ၂၀၂၃
Written by Nyein Kyaw
ယနေ့ ညနေပိုင်းတွင် ရန်ကုန်တိုင်းဒေသကြီး၊ ကမာရွတ်မြို့နယ်တွင် အလူမီနီယံဆာလဖိတ် ယိုစိမ့်မှုဖြစ်ပွားခဲ့ကြောင်း သိရသည်။
ဖြစ်စဉ်မှာ ဩဂုတ်လ ၁၈ ရက် ညနေ ၆ နာရီ ၂၀ မိနစ်တွင် ရန်ကုန်တိုင်းဒေသကြီး၊ ကမာရွတ်မြို့နယ်၊ အမှတ် (၉) ရပ်ကွက်၊ တက္ကသိုလ်ရိပ်သာလမ်းတွင် အလူမီနီယံဆာလဖိတ် ယိုစိမ့်မှုဖြစ်ပွားကြောင်း သတင်းရရှိသဖြင့် မီးသတ်တပ်ဖွဲ့များနှင့် ပရဟိတအသင်းများက ကူညီရှင်းလင်းရေးလုပ်ငန်းများ ဆောင်ရွက်ပေးခဲ့ရခြင်းဖြစ်သည်။
“သူတို့က ဓာတ်ခွဲခန်းလိုပုံစံမျိုး ကျောင်းဖြစ်မယ်နဲ့တူတယ်။ အဲဒီအထဲမှာ ပုံးတွေ၊ ပီပါတွေပေါ့ အဲဒီကနေ ယိုစိမ့်တာ။ ဒါကိုသိလို့ မီးသတ်တပ်ဖွဲ့ကို အနားကလူတွေက အကြောင်းကြားတာပါ” ဟု ဖြစ်စဉ်သို့ သွားရောက်ကူညီပေးခဲ့သည့် အားမာန်လူငယ်ပရဟိတအသင်းမှ တာဝန်ရှိသူက ပြောသည်။
ကမာရွတ်မြို့နယ် မီးသတ်စခန်းမှ မီးငြှိမ်းသတ်ယာဉ်(၁)စီး၊ ကျောက်တံတားမြို့နယ် မီးသတ်စခန်းမှ မီးငြှိမ်းသတ်ယာဉ်(၁)စီး၊ စမ်းချောင်းမြို့နယ် မီးသတ်စခန်းမှ မီးငြှိမ်းသတ်ယာဉ်(၁)စီး၊ မြန်မာနိုင်ငံမီးသတ်တပ်ဖွဲဌာနချုပ်မှ ရှာဖွေကယ်ဆယ်ရေးယာဉ်(၁)စီး၊ Ventilator မီးသတ်ယာဉ် (၁)စီး၊ သန္ဓေမီးသတ်တပ်ဖွဲ့ဝင်များဖြင့် ရှင်းလင်းရေးလုပ်ငန်းများ ဆောင်ရွက်ခဲ့ခြင်းကြောင့် ည ၈ နာရီတွင် ရှင်းလင်းရေးလုပ်ငန်းများ ပြီးစီးခဲ့ကြောင်း သိရသည်။
ဓာတ်ပုံ – MFSD နှင့် အားမာန်လူငယ်ပရဟိတအသင်း
