ထိုင်းပင်လယ်ပြင်တွင် ပျောက်ဆုံးနေသော လောင်စာဆီတင်သင်္ဘော အမှုထမ်း ၆ ဦးအနက် ၁ ဦးကို ဒေသခံငါးဖမ်းလှေက ကယ်ဆယ်နိုင်ခဲ့

သက်တံ့

၁၃. ၁၁. ၂၀၂၆

ပြီးခဲ့သည့် နိုဝင်ဘာလ ၁၁ ရက် (ဗုဒ္ဓဟူးနေ့) က ချွန်ဘူရီခရိုင်၊ ဆတ်တာဟိ (Sattahip) ကမ်းလွန်တွင် Venus 14 လောင်စာဆီတင်သင်္ဘော နစ်မြုပ်သွားခဲ့ပြီးနောက် ပျောက်ဆုံးနေသည့် သင်္ဘောအမှုထမ်း ၆ ဦးအနက် ၁ ဦးကို ဒေသခံငါးဖမ်းလှေတစ်စင်းက ကယ်ဆယ်နိုင်ခဲ့သည်။

အဆိုပါ ဆီတင်သင်္ဘောသည် ဗုဒ္ဓဟူးနေ့ နံနက် ၉ နာရီခန့်က ဆတ်တာဟိ ရေတပ်အခြေစိုက်စခန်း ဝင်ပေါက်၏ အနောက်တောင်ဘက် ရေမိုင် ၂၇ မိုင်ခန့်အကွာတွင် နစ်မြုပ်သွားခဲ့ခြင်းဖြစ်သည်။ နစ်မြုပ်သွားသည့် သင်္ဘောပျက်သည် မြောက်လတ္တီတွဒ် ၁၂ ဒီဂရီ ၂၀ မိနစ်နှင့် အရှေ့လောင်ဂျီတွဒ် ၁၀၀ ဒီဂရီ ၂၉ မိနစ် ကိုသြဒိနိတ်နေရာ၊ ပရာကျွတ်ခီရီခန် (Prachuap Khiri Khan) ကမ်းရိုးတန်းမှ ရေမိုင် ၂၈ မိုင်ခန့်အကွာတွင် တည်ရှိသည်။

သင်္ဘောနစ်မြုပ်ချိန်တွင် ဒီဇယ်ဆီ လီတာပေါင်း ၂၈၀,၀၀၀ ခန့် တင်ဆောင်ထားပြီး သင်္ဘောပေါ်၌ အမှုထမ်း ၆ ဦး လိုက်ပါသွားခဲ့သည်။ ၎င်းတို့ မည်သူမည်ဝါဖြစ်ကြောင်းကိုမူ သတင်းများတွင် ထုတ်ဖော်ပြောကြားခြင်း မရှိသေးပေ။

အဆိုပါ ဖြစ်စဉ်ဖြစ်ပွားပြီးနောက် ထိုင်းတော်ဝင်ရေတပ် (RTN) သည် ကင်းလှည့်ရေယာဉ် Tor 113၊ အထူးစစ်ဆင်ရေးအဖွဲ့နှင့် ကင်းထောက်လေယာဉ်တစ်စင်းတို့ ပါဝင်သော ရှာဖွေကယ်ဆယ်ရေး လုပ်ငန်းများကို စတင်လုပ်ဆောင်ခဲ့သည်။ ရေကြောင်းပို့ဆောင်ရေးဦးစီးဌာနမှ ရေယာဉ်များနှင့် အခြားသက်ဆိုင်ရာအဖွဲ့အစည်းများလည်း ရှာဖွေရေးလုပ်ငန်းတွင် ပူးပေါင်းပါဝင်ခဲ့ကြသည်။

ယနေ့ (နိုဝင်ဘာလ ၁၃ ရက်) မွန်းလွဲပိုင်းတွင် ပျောက်ဆုံးနေသော သင်္ဘောအမှုထမ်းတစ်ဦးကို ဒေသခံရေလုပ်သားများက ကယ်ဆယ်နိုင်ခဲ့ကြောင်း ထိုင်းတော်ဝင်ရေတပ်က အတည်ပြုထုတ်ပြန်ခဲ့သည်။ ကယ်ဆယ်ခံရသည့် အမှုထမ်းကို ကျန်းမာရေးစစ်ဆေးမှုနှင့် ဆေးကုသမှုများ ပြုလုပ်ပေးရန်အတွက် ကယ်ဆယ်ခဲ့သည့် ငါးဖမ်းလှေထံသို့ Tor 113 ရေယာဉ်ကို စေလွှတ်သွားမည်ဖြစ်ကြောင်း ရေတပ်က ပြောကြားခဲ့သည်။

တစ်ချိန်တည်းမှာပင် နစ်မြုပ်သွားသော ဆီတင်သင်္ဘောမှ လောင်စာဆီယိုစိမ့်မှု မရှိသေးကြောင်း သိရသည်။ သို့သော် ဆီယိုဖိတ်မှု ဖြစ်ပေါ်လာပါက အရေးပေါ်တုံ့ပြန်နိုင်ရန်အတွက် ကယ်ဆယ်ရေးအဖွဲ့များ၊ ရေယာဉ်များ၊ ရဟတ်ယာဉ်တစ်စင်းနှင့် ဆီပျံ့နှံ့မှုထိန်းချုပ်ရေး ပစ္စည်းကိရိယာများကို အသင့်အနေအထားဖြင့် ထားရှိထားသည်။

ပင်လယ်ရေကြောင်းနှင့် ကမ်းရိုးတန်းသယံဇာတဦးစီးဌာနသည် ညစ်ညမ်းမှုအန္တရာယ် ကျရောက်နိုင်ခြေရှိသော နေရာများကို မြေပုံရေးဆွဲထုတ်ပြန်ခဲ့ရာ ပရာကျွတ်ခီရီခန်ခရိုင်၊ ဆမ်ရွိုင်ယော့ (Sam Roi Yot) မြို့နယ်အနီးရှိ ရေပြင်ကို အထူးဂရုပြုရမည့် နေရာအဖြစ် သတ်မှတ်ထားသည်။

နစ်မြုပ်နေသည့် သင်္ဘောပျက်မှ ဒီဇယ်ဆီများ ယိုစိမ့်ထွက်လာပါက ရေစီးကြောင်းကြောင့် ကနဦးတွင် တောင်ဘက်သို့ မျောပါသွားနိုင်ပြီး ထို့နောက် အနောက်ဘက် သို့မဟုတ် အနောက်တောင်ဘက်သို့ ဦးတည်ပြောင်းလဲသွားနိုင်ကြောင်း ဘူမိသတင်းအချက်အလက်နှင့် အာကာသနည်းပညာ ဖွံ့ဖြိုးတိုးတက်ရေးအေဂျင်စီ (GISTDA) က ပြောကြားခဲ့သည်။ ဆီယိုစိမ့်မှု ဦးတည်ရာလမ်းကြောင်းမှာ လက်ရှိဖြစ်ပေါ်နေသော ပင်လယ်ပြင်အခြေအနေပေါ်တွင် မူတည်မည်ဖြစ်သည်။

လောင်စာဆီများသည် ပရာကျွတ်ခီရီခန် ပင်လယ်အော်သို့ ရောက်ရှိသွားပါက သန္တာကျောက်တန်း ၆၁ ရိုင် (၂၄ ဒသမ ၁၁ ဧက) ခန့် ထိခိုက်ပျက်စီးနိုင်ကြောင်း GISTDA က သတိပေးထားသည်။

မနေ့က (နိုဝင်ဘာလ ၁၂ ရက်) တွင်လည်း တာဝန်ရှိသူများသည် SOLAS-XT1800B1*0525/2022 အမှတ်အသားပါ အသက်ကယ်အင်္ကျီတစ်ထည်ကို ဆယ်ယူရရှိခဲ့သည်။ အဆိုပါ အသက်ကယ်အင်္ကျီမှာ အသစ်နီးပါးပုံစံရှိနေပြီး ပျောက်ဆုံးနေသော Venus 14 သင်္ဘောအမှုထမ်းများနှင့် ဆက်စပ်မှု ရှိ၊ မရှိ သိရှိနိုင်ရန် စစ်ဆေးမှုများ ပြုလုပ်နေသည်။

ကျန်ရှိနေသည့် သင်္ဘောအမှုထမ်း ၅ ဦးကို ဆက်လက်ရှာဖွေသွားမည်ဖြစ်ကြောင်း ထိုင်းတော်ဝင်ရေတပ်က ကတိပြုပြောကြားထားသည်။ ပင်လယ်ရေကြောင်း အရေးပေါ်အခြေအနေများကို တွေ့ရှိသူ မည်သူမဆို ရေကြောင်းဗဟိုဌာန ဖုန်းနံပါတ် ၁၄၆၅ သို့ ဆက်သွယ်အကြောင်းကြားနိုင်သည်ဟု သိရသည်။

Ref: The Thaiger