မြန်မာ- တရုတ် ရေနံစိမ်းပိုက်လိုင်းမှ ကိုးနှစ်ကျော်ကာလအတွင်း တန်ချိန် သန်း ၁၀၀ ကျော် ပို့လွှတ်နိုင်ခဲ့ပြီး တရုတ်စွမ်းအင်လုံခြုံရေးကို အထောက်အကူပြုပေးခဲ့

သက်တံ့
၂၆. ၁၀. ၂၀၂၆

မြန်မာ – တရုတ် ရေနံစိမ်းပိုက်လိုင်းသည် ၂၀၁၇ ခုနှစ်တွင် စတင်လည်ပတ်ခဲ့ပြီးနောက်ပိုင်း ရေနံတန်ချိန် သန်း ၁၀၀ ကျော် ပို့လွှတ်ဖြန့်ဖြူးပေးနိုင်ခဲ့ကြောင်း တရုတ် အမျိုးသား ရေနံနှင့် သဘာဝဓာတ်ငွေ့ ပိုက်လိုင်းကွန်ရက် ကော်ပိုရေးရှင်း (PipeChina) အရ သိရသည်။ ယင်းသည် တရုတ်နိုင်ငံ အနောက်တောင်ပိုင်းအတွက် စွမ်းအင်ထောက်ပံ့မှုကို ပိုမိုခိုင်မာစေပြီး စွမ်းအင်ဖြန့်ဖြူးမှုကို မြှင့်တင်ပေးနိုင်ခဲ့သည့် အဓိက စွမ်းအင်တင်သွင်းမှု စင်္ကြံကြီး၏ မှတ်တိုင်တစ်ခု ဖြစ်ခဲ့သည်။

တရုတ်နိုင်ငံ၏ ၄ ခုမြောက် အဓိက စွမ်းအင်တင်သွင်းမှု စင်္ကြံဖြစ်သော အဆိုပါ ပိုက်လိုင်းသည် မြန်မာနိုင်ငံမှ စတင်ကာ တရုတ်နိုင်ငံ အနောက်တောင်ပိုင်း ယူနန်ပြည်နယ်၊ ရွှေလီမြို့မှတစ်ဆင့် တရုတ်နိုင်ငံအတွင်းသို့ ဝင်ရောက်သည်။ တရုတ်ပြည်တွင်းအပိုင်း ၆၁၈ ကီလိုမီတာအရှည်ရှိသော ပိုက်လိုင်းသည် ယူနန်ပြည်နယ်၊ အန်းနင်း (Anning) ရှိ ယူနန် ရေနံဓာတုဗေဒ ရေနံချက်စက်ရုံ (Yunnan Petrochemical refinery) အထိ သွယ်တန်းထားခြင်းဖြစ်သည်။ ပိုက်လိုင်းကို ၂၀၁၇ ခုနှစ် ဇွန်လတွင် စတင်လည်ပတ်ခဲ့ခြင်းဖြစ်ကြောင်း PipeChina ၏ ပြောကြားချက်ကို ကိုးကား၍ CCTV သတင်းက တနင်္လာနေ့တွင် ဖော်ပြခဲ့သည်။

အဆိုပါ ပိုက်လိုင်း စတင်မလည်ပတ်မီက ယူနန်ပြည်နယ်သည် တရုတ်နိုင်ငံ အရှေ့ဘက် ကမ်းရိုးတန်းဒေသများမှ ကုန်းလမ်းအတိုင်း အဝေးပြေး သယ်ယူပို့ဆောင်ရေးနည်းလမ်းဖြင့် တင်သွင်းရသော သန့်စင်ပြီး ရေနံထွက်ပစ္စည်းများအပေါ် များစွာ မှီခိုခဲ့ရကြောင်း PipeChina ယူနန်ဌာနခွဲ၊ ဈေးကွက်မြှင့်တင်ရေးဌာန ဒုတိယမန်နေဂျာ ချန်ယုထောင်း (Cheng Yutao) က ပြောကြားခဲ့သည်။

ယနေ့တွင်မူ ပိုက်လိုင်းမှတစ်ဆင့် တင်သွင်းလာသော ရေနံစိမ်းများကို ယူနန် ရေနံဓာတုဗေဒစက်ရုံတွင် ပြည်တွင်း၌ပင် သန့်စင်ချက်လုပ်ပြီး ထွက်ရှိလာသော ရေနံထွက်ပစ္စည်းများကို တရုတ်နိုင်ငံ အနောက်တောင်ပိုင်း သန့်စင်ပြီး ရေနံထွက်ပစ္စည်း ပိုက်လိုင်းမှတစ်ဆင့် ဆက်လက်ဖြန့်ဖြူးပေးကာ ရေနံတင်သွင်းခြင်း၊ ရေနံချက်လုပ်ခြင်းနှင့် ရေနံထွက်ပစ္စည်းများကို ပြင်ပသို့ ပို့ဆောင်ခြင်း စသည့် ပေါင်းစပ် စက်မှုကွင်းဆက်တစ်ခုကို ရရှိစေခဲ့ကြောင်း ၎င်းက ဆိုသည်။

ယူနန်ပြည်နယ်၏ တောင်ကုန်းတောင်တန်း ထူထပ်သော ပထဝီဝင်အနေအထားကြောင့် ကြုံတွေ့ရသည့် လုပ်ငန်းခွင် အခက်အခဲများကို ဖြေရှင်းရန်အတွက် ပိုက်လိုင်းတာဝန်ရှိသူများအနေဖြင့် လူမလိုဘဲ စက်ယန္တရားများဖြင့် မောင်းနှင်သည့် စနစ်၊ ဝန်ထမ်း အမြဲတမ်းထားရှိရန် မလိုသည့် စခန်းများနှင့် အရေးပေါ်တုံ့ပြန်ဆောင်ရွက်သူ သီးသန့်ထားရှိသည့် စမတ်ကျကျ စီမံခန့်ခွဲမှု နည်းလမ်းများကို ကျင့်သုံးခဲ့သည်။ စမတ်စခန်း ၅ ခုကို တည်ဆောက်ခဲ့ပြီး လက်ရှိတွင် အဆိုပါ ပိုက်လိုင်းသည် တစ်နေ့လျှင် ပျမ်းမျှ ရေနံစိမ်း တန်ချိန် ၃၅,၀၀၀ နီးပါး သယ်ယူပို့ဆောင်ပေးလျက်ရှိကြောင်း CCTV သတင်းတွင် ဖော်ပြထားသည်။

ထို့အပြင် ယင်းပိုက်လိုင်းသည် တရုတ်နိုင်ငံအတွက် မလက္ကာရေလက်ကြားကို ရှောင်ကွင်း၍ ရေနံစိမ်း တင်သွင်းနိုင်သည့် အခြားရွေးချယ်စရာ လမ်းကြောင်းတစ်ခုကိုလည်း ရရှိစေသည်။ ၂၀၁၇ ခုနှစ် ဇွန်လ ၇ ရက်နေ့တွင် တရုတ်-မြန်မာ ပိုက်လိုင်းမှတစ်ဆင့် ပို့ဆောင်ခဲ့သော ရေနံစိမ်းများသည် တရုတ်ပြည်တွင်း၌ ၁၉ ရက်ကြာ သယ်ယူပြီးနောက် ယူနန် ရေနံဓာတုဗေဒစက်ရုံသို့ ရောက်ရှိခဲ့ရာ ပိုက်လိုင်း၏ ပြည်တွင်းအပိုင်းကို အောင်မြင်စွာ စတင်လည်ပတ်နိုင်ခဲ့သည့် မှတ်တိုင်ဖြစ်ခဲ့သည်။

မလက္ကာရေလက်ကြားမှတစ်ဆင့် ပို့ဆောင်သည့် လမ်းကြောင်းနှင့် နှိုင်းယှဉ်ပါက သယ်ယူပို့ဆောင်ရေး အကွာအဝေးကို ရေမိုင် ၁,၈၂၀ နီးပါး လျှော့ချပေးနိုင်သဖြင့် သယ်ယူပို့ဆောင်ရေးဆိုင်ရာ စွန့်စားရမှုများနှင့် ကုန်ကျစရိတ်များကို လျှော့ချရာတွင် အထောက်အကူပြုကြောင်း China Energy News ၏ အစီရင်ခံစာတစ်ခုအရ သိရသည်။

ယင်းစီမံကိန်းသည် တရုတ်နိုင်ငံ၏ ပြည်တွင်းဈေးကွက်ကို ဝန်ဆောင်မှုပေးရုံသာမက ဒေသတွင်း စွမ်းအင်ကုန်သွယ်မှုကိုလည်း အထောက်အကူပြုခဲ့သည်။ ယူနန် ရေနံဓာတုဗေဒလုပ်ငန်းမှ ထုတ်လုပ်သော ချောမွေ့ပြီး ရေနံထွက်ပစ္စည်းများကို ယူနန်၊ စိချွမ်း၊ ချုန်းကျင်း (Chongqing) နှင့် ဂွိုင်ကျိုး (Guizhou) ပြည်နယ်များသို့ ဖြန့်ဖြူးပေးခဲ့ကြောင်းနှင့် အဆိုပါ ရေနံချက်စက်ရုံသည် ၂၀၁၈ ခုနှစ်တွင် အရှေ့တောင်အာရှ ဈေးကွက်များသို့ ဓာတ်ဆီနှင့် ဒီဇယ်များကို စတင်တင်ပို့ခဲ့ကြောင်း ဆင်ဟွာသတင်းဌာနက ၂၀၁၉ ခုနှစ် ဇွန်လတွင် သတင်းဖော်ပြခဲ့သည်။

၂၀၁၉ ခုနှစ် ဧပြီလတွင် အဆိုပါစက်ရုံသည် မြန်မာနိုင်ငံသို့ ရေနံဓာတ်ငွေ့ရည် (LPG) တန်ချိန် ၅၀ နီးပါး တင်ပို့ခဲ့ပြီး ယင်းသည် တရုတ် အမျိုးသား ရေနံကော်ပိုရေးရှင်း (CNPC) ၏ အရှေ့တောင်အာရှသို့ ပထမဆုံး LPG တင်ပို့မှုလည်း ဖြစ်ခဲ့သည်။ ၂၀၁၉ ခုနှစ် ဇွန်လအရောက်တွင် အဆိုပါ ရေနံချက်စက်ရုံသည် အကောက်ခွန်ရှင်းလင်းရေး စခန်း ၁၄ ခုနှင့် တင်ပို့ရေးလမ်းကြောင်းများကို အသုံးပြု၍ တစ်လလျှင် ပျမ်းမျှ ရေနံထွက်ပစ္စည်း တန်ချိန် ၁၀,၀၀၀ ကျော် တင်ပို့လျက်ရှိသည်။

နောက်ဆုံး ရရှိခဲ့သော ဤမှတ်တိုင်သည် တရုတ်နိုင်ငံ၏ ရေနံနှင့် သဘာဝဓာတ်ငွေ့ ပိုက်လိုင်း တည်ဆောက်ရေး တိုးချဲ့ဆောင်ရွက်နေမှုများအကြား ထွက်ပေါ်လာခြင်းဖြစ်သည်။ ၂၀၂၆ ခုနှစ် စတင်ချိန်မှစ၍ တိုင်းပြည်တစ်ဝန်းတွင် ပင်မ ရေနံနှင့် သဘာဝဓာတ်ငွေ့ ပိုက်လိုင်းသစ် ကီလိုမီတာ ၂,၅၀၀ ကျော်ကို ထပ်မံတည်ဆောက်ခဲ့ရာ နိုင်ငံ၏ ပင်မပိုက်လိုင်းကွန်ရက် စုစုပေါင်းအလျားသည် ကီလိုမီတာ ၁၁၂,၉၀၀ သို့ ရောက်ရှိလာခဲ့ပြီး ပြည်နယ်အဆင့် ဒေသ ၃၀ နှင့် ဟောင်ကောင် အထူးအုပ်ချုပ်ခွင့်ရဒေသတို့အထိ လွှမ်းမိုးထားနိုင်ပြီဖြစ်ကြောင်း CCTV News က သတင်းဖော်ပြခဲ့သည်။

Ref: Global Times