သတိုး
၁၇. ၉. ၂၀၂၆
ထိုင်းနိုင်ငံ၊ ဆူရတ်ဌာနီ (Surat Thani) ပြည်နယ်တွင် ဖြစ်ပွားခဲ့သည့် သန်းခေါင်စာရင်း တရားမဝင် ပြုလုပ်ပေးသည့် ကွန်ရက်တစ်ခုကို ဖမ်းဆီးရမိခဲ့ကြောင်းနှင့် တရားရုံးက လူ ၃၃ ဦးကို ဝရမ်းထုတ်ပေးခဲ့ပြီးနောက် ၂၇ ဦးကို ဖမ်းဆီးထိန်းသိမ်းနိုင်ခဲ့ကြောင်း ထိုင်းတော်ဝင်ရဲတပ်ဖွဲ့က ၂၀၂၆ ခုနှစ်၊ စက်တင်ဘာ ၁၇ ရက်တွင် သတင်းထုတ်ပြန်ခဲ့သည်။
ပွဲစားများနှင့် မှတ်ပုံတင်ရုံး အရာရှိများသည် သန်းခေါင်စာရင်း လုံးဝမရှိသူများအတွက် ထုတ်ပေးသည့် ပန်းရောင်ကတ်ပြား ဟုခေါ်သော “သန်းခေါင်စာရင်း မရှိသူများအတွက် ထုတ်ပေးသည့် (သုညအစ) ကတ်ပြားများ” ကို ရပိုင်ခွင့်မရှိသည့် မြန်မာနိုင်ငံသားများ ရရှိနိုင်ရေး တရားမဝင် ပူးပေါင်းဆောင်ရွက်ပေးခဲ့ကြကြောင်း ရဲတပ်ဖွဲ့က စွပ်စွဲထားသည်။
အမျိုးသားရဲတပ်ဖွဲ့ ဒုတိယကာကွယ်ရေးဦးစီးချုပ် ရဲဗိုလ်ချုပ်ကြီး ဆမ်ရန်နူအာမာက “Pit Chak Rang Ngao 2” စစ်ဆင်ရေး ရလဒ်များကို ယနေ့နံနက် ၁၀ နာရီ သတင်းစာရှင်းလင်းပွဲတွင် အသေးစိတ် ရှင်းလင်းပြောကြားခဲ့သည်။ ရဲဗိုလ်ချုပ်ကြီး ဆမ်ရန်သည် နယ်စပ်ဖြတ်ကျော် ရာဇဝတ်မှုများနှင့် တရားမဝင် လူဝင်မှုကြီးကြပ်ရေး တိုက်ဖျက်ရေးဆိုင်ရာ ထိုင်းတော်ဝင်ရဲတပ်ဖွဲ့ ဗဟိုဌာနကိုလည်း ဦးဆောင်နေသူ ဖြစ်သည်။
အဆိုပါ သတင်းစာရှင်းလင်းပွဲသို့ အမျိုးသားရဲတပ်ဖွဲ့ ကူညီရေးအရာရှိချုပ် ရဲဗိုလ်ချုပ်ကြီး ဆူရာဖုန်း သနွန်ဂျစ်နှင့် ဆူရတ်ဌာနီ ပြည်နယ်အုပ်ချုပ်ရေးမှူး ဂျွန်ဖော့ ဝမ်နာချက်ဆီရီတို့လည်း တက်ရောက်ခဲ့ကြသည်။
ပူးပေါင်းပါဝင်သည့် အဖွဲ့အစည်းများတွင် သန်းခေါင်စာရင်းဆိုင်ရာ လုံခြုံရေးခြိမ်းခြောက်မှုများကို တိုက်ဖျက်သည့် ပြည်ထဲရေး အုပ်ချုပ်ရေးဌာန၏ DOPA N.I.C.E. အထူးတပ်ဖွဲ့၊ အထူးစုံစမ်းစစ်ဆေးရေးဌာန (DSI)၊ ငွေကြေးခဝါချမှု တိုက်ဖျက်ရေးရုံး (AMLO) နှင့် အစိုးရဝန်ထမ်းများ လာဘ်ပေးလာဘ်ယူမှု တိုက်ဖျက်ရေးကော်မရှင် ရုံးတို့ ပါဝင်ကြသည်။
ဝန်ကြီးချုပ်နှင့် ပြည်ထဲရေးဝန်ကြီး အနုတင် ချာဝီရကွန်၏ သန်းခေါင်စာရင်း အဂတိလိုက်စားမှုကို စနစ်တကျ တိုက်ဖျက်ရန် အရေးပေါ် ညွှန်ကြားချက်အရ ယခုစစ်ဆင်ရေးကို ဆောင်ရွက်ခဲ့ခြင်းဖြစ်ပြီး အမျိုးသားရဲတပ်ဖွဲ့ချုပ် ရဲဗိုလ်ချုပ်ကြီး ကစ်ထရတ် ဖန်ဖတ်က တိုက်ရိုက်ကြီးကြပ်ခဲ့သည်။
◾️ဒွန်ဆက်မှသည် ကန်ချာနာဒစ်နှင့် ကော့စမွီအထိ စုံစမ်းစစ်ဆေးမှုများ ချဲ့ထွင်
စုံစမ်းစစ်ဆေးမှုများသည် ၂၀၂၆ ခုနှစ်၊ ဇူလိုင် ၄ ရက်က ဆူရတ်ဌာနီပြည်နယ်၊ ဒွန်ဆက် (Don Sak) မြို့နယ်တွင် ပြုလုပ်ခဲ့သည့် ပထမအကြိမ် “Pit Chak Rang Ngao” စစ်ဆင်ရေးမှတစ်ဆင့် စတင်ခဲ့ခြင်းဖြစ်သည်။
နောက်ဆက်တွဲ သဲလွန်စများကြောင့် စုံစမ်းစစ်ဆေးသူများသည် ကန်ချာနာဒစ်နှင့် ကော့စမွီမြို့နယ်များရှိ သန်းခေါင်စာရင်း မှတ်တမ်းများကို ဆက်လက် စစ်ဆေးခဲ့ကြသည်။
စုံစမ်းစစ်ဆေးသူများသည် ပတ်စပို့စာအုပ် ကိုင်ဆောင်ထားပြီးသူ သို့မဟုတ် ရွှေ့ပြောင်းလုပ်သားအဖြစ် မှတ်ပုံတင်ထားပြီးသား မြန်မာနိုင်ငံသားများကို ဖော်ထုတ်နိုင်ခဲ့သည်။ အဆိုပါ ပုဂ္ဂိုလ်များသည် သန်းခေါင်စာရင်း မရှိသူများအတွက် ထုတ်ပေးသည့် ကတ်ပြားများကို လုံးဝ လျှောက်ထားပိုင်ခွင့် မရှိသော်လည်း ပွဲစားများက မှတ်ပုံတင်အရာရှိများနှင့် ပူးပေါင်း၍ တရားမဝင် ထုတ်ပေးနိုင်ရေး စီစဉ်ခဲ့ကြခြင်းဖြစ်ကြောင်း ရဲတပ်ဖွဲ့က ပြောကြားခဲ့သည်။
◾️ အုပ်စုသုံးခုမှ လူ ၃၃ ဦးအား ဝရမ်းထုတ်
ကန်ချာနာဒစ်နှင့် ကော့စမွီ ရဲစခန်းတို့မှ စုံစမ်းစစ်ဆေးသူများသည် သက်သေအထောက်အထားများ စုဆောင်းကာ လူ ၃၃ ဦးအား ဖမ်းဆီးမိန့် ရရှိရန် တရားရုံးထံ လျှောက်ထားခဲ့သည်။ ရဲတပ်ဖွဲ့က သံသယရှိသူများကို အုပ်စု ၃ စု ခွဲခြားထားသည်။ ထိုအုပ်စုများတွင်
၁။ အစိုးရဝန်ထမ်း ၄ ဦး – ရာဇသတ်ကြီး ဥပဒေပုဒ်မ ၁၅၇ အရ တာဝန်ကို အလွဲသုံးစားပြုမှု/ပျက်ကွက်မှု၊ ပုဒ်မ ၁၆၂ အရ စာရွက်စာတမ်း မဟုတ်မမှန် သက်သေခံမှုနှင့် သန်းခေါင်စာရင်း အက်ဥပဒေ ပုဒ်မ ၅၀ တို့ဖြင့် စွပ်စွဲထားသည်။
၂။ အိမ်ထောင်ဦးစီးနှင့် အာမခံထွက်ဆိုပေးသူ ၁၀ ဦး – ဝန်ထမ်းများ၏ အဂတိလိုက်စားမှုကို အားပေးကူညီမှု၊ မဟုတ်မမှန် ထွက်ဆိုမှုနှင့် ရာဇဝတ်ဝန်ထမ်းများအား တရားဝင် စာရွက်စာတမ်းများတွင် မဟုတ်မမှန် ဖော်ပြစေမှုတို့ဖြင့် ရာဇသတ်ကြီး ဥပဒေပုဒ်မ ၈၆၊ ၁၅၇၊ ၁၃၇၊ ၂၆၇ နှင့် သန်းခေါင်စာရင်း အက်ဥပဒေ ပုဒ်မ ၅၀ တို့ဖြင့် အရေးယူထားသည်။
၃။ မြန်မာ ရွှေ့ပြောင်းလုပ်သား ၁၉ ဦး – ဝန်ထမ်းများ၏ အဂတိလိုက်စားမှုကို အားပေးကူညီမှု၊ မဟုတ်မမှန် ထွက်ဆိုမှုနှင့် ထိုင်းနိုင်ငံသား မဟုတ်ဘဲ အတုပြုလုပ်ထားသည့် သက်သေအထောက်အထားများ သုံးစွဲ၍ သန်းခေါင်စာရင်း တရားမဝင် လျှောက်ထားမှုတို့ဖြင့် ရာဇသတ်ကြီး ဥပဒေပုဒ်မ ၈၆၊ ၁၅၇၊ ၁၃၇၊ ၂၆၇ နှင့် သန်းခေါင်စာရင်း အက်ဥပဒေ ပုဒ်မ ၅၀ ဒုတိယပိုဒ်ခွဲတို့ဖြင့် စွပ်စွဲထားသည်။
◾️ ကျူးလွန်သူ ၂၇ ဦး ဖမ်းဆီးရမိမှုနှင့် ကွန်ရက်ကျယ်ပြန့်မှုကို ဆက်လက်စုံစမ်း
သတင်းစာရှင်းလင်းပွဲ ပြုလုပ်ချိန်အထိ ဖမ်းဝရမ်းထုတ်ထားသူ ၃၃ ဦးအနက် ၂၇ ဦးကို ထိန်းသိမ်းနိုင်ခဲ့ပြီး ဖြစ်ကြောင်း ရဲတပ်ဖွဲ့က ပြောကြားခဲ့သည်။
စုံစမ်းစစ်ဆေးသူများ၏ ပြောကြားချက်အရ ကန်ချာနာဒစ်နှင့် ကော့စမွီ မှတ်ပုံတင်ရုံးများအကြား ခိုင်မာသော အချိတ်အဆက်များ တွေ့ရှိရသဖြင့် ဆူရတ်ဌာနီနှင့် အိမ်နီးချင်း ပြည်နယ်များတွင် ရွှေ့ပြောင်းလုပ်သားများ၏ အဆင့်အတန်းကို တရားမဝင် ပြောင်းလဲပေးနေသည့် ပိုမိုကြီးမားသော ကွန်ရက်တစ်ခု ရှိနေကြောင်း ညွှန်ပြနေသည်။
သန်းခေါင်စာရင်း လုထုံးလုပ်နည်းများကို အလွဲသုံးစားပြုလုပ်၍ နိုင်ငံတော်လုံခြုံရေးကို ခြိမ်းခြောက်နေသည့် ကွန်ရက်များကို ဆက်လက် စုံစမ်းစစ်ဆေးရန် မဟာမိတ်အဖွဲ့အစည်းများနှင့် ပူးပေါင်းဆောင်ရွက်သွားမည်ဟု ထိုင်းတော်ဝင်ရဲတပ်ဖွဲ့က ပြောကြားခဲ့သည်။
ထိုင်းနိုင်ငံတွင် နိုင်ငံခြားသားများ လာရောက်နေထိုင်ရန်၊ အလုပ်လုပ်ကိုင်ရန်၊ စီးပွားရေးလုပ်ဆောင်ရန်နှင့် နိုင်ငံသားလျှောက်ထားရန်အတွက် တရားဝင် လမ်းကြောင်းများ ထားရှိပေးထားပြီး ဖြစ်ကြောင်း ရဲတပ်ဖွဲ့က အသိပေးထားသည်။
သန်းခေါင်စာရင်းဆိုင်ရာ အဂတိလိုက်စားမှုများ၊ နာမည်ငှားရမ်းဆောင်ရွက်မှုများ သို့မဟုတ် နိုင်ငံသားစိစစ်ရေးကတ်ပြားများကို တရားမဝင် ရရှိရေး အခကြေးငွေ ရယူဆောင်ရွက်မှုများနှင့် ပတ်သက်သည့် သတင်းအချက်အလက်များ ရှိပါက နီးစပ်ရာ ရဲစခန်း သို့မဟုတ် ထိုင်းတော်ဝင်ရဲတပ်ဖွဲ့၏ တိုက်ရိုက်ဖုန်းလိုင်း ၁၅၉၉ သို့ ၂၄ နာရီပတ်လုံး ဆက်သွယ် သတင်းပေးနိုင်ကြောင်း ထုတ်ပြန်ထားသည်။
Ref: The Nation Thailand
About the Author
