သက်တံ့
၃. ၈. ၂၀၂၆
ထိုင်းနိုင်ငံ၊ နရာသီဝတ်ခရိုင်ရှိ ဆီအုန်းစိုက်ခင်းတစ်ခုအတွင်း မူးယစ်ဆေးဝါး ဖြန့်ဖြူးသုံးစွဲသူများကို ထိုင်းတော်ဝင်ရဲတပ်ဖွဲ့မှ ရဲတပ်ဖွဲ့ဝင်များ သွားရောက်ဖမ်းဆီးစဉ် သေနတ်ဖြင့် ပစ်ခတ်ခံရမှုကြောင့် ရဲအရာရှိ ၂ ဦး သေဆုံးကာ ၃ ဦး ဒဏ်ရာရရှိခဲ့သည်။
နရာသီဝတ်ခရိုင်၊ တက်ခ်ဘိုင် (Tak Bai) မြို့နယ်၊ ပရိုင်ဝမ် (Praiwan) ကျေးရွာအုပ်စုရှိ ဆီအုန်းစိုက်ခင်းတစ်ခုအတွင်းမှ တဲငယ်တစ်ခုတွင် မူးယစ်ဆေးဝါး ဖြန့်ဖြူးသုံးစွဲသူများ ပုန်းအောင်းနေကြောင်း သတင်းအရ တာဘိုင်ရဲစခန်းမှ ရဲတပ်ဖွဲ့ဝင်များက ဝင်ရောက်စီးနင်းစဉ် အဆိုပါ ပစ်ခတ်မှု ဖြစ်ပွားခဲ့ခြင်းဖြစ်သည်။
ရဲတပ်ဖွဲ့၏ ပြောကြားချက်အရ စီးနင်းရေးလုပ်ဆောင်နေစဉ် သံသယရှိသူတစ်ဦးက ရဲတပ်ဖွဲ့ဝင်များအား စတင်ပစ်ခတ်ပြီး အခင်းဖြစ်ပွားရာမှ ထွက်ပြေးလွတ်မြောက်သွားခဲ့ကြောင်း သိရသည်။
ပစ်ခတ်မှုအတွင်း ရဲတပ်ကြပ် Amran Ha နှင့် ရဲအုပ် Wittaya Chaipromkaew တို့သည် ပြင်းထန်စွာ ဒဏ်ရာရရှိကာ သေဆုံးခဲ့သည်။ Amran မှာ ရင်ဘတ်နှင့် ခန္ဓာကိုယ်တို့တွင် သေနတ်ဒဏ်ရာ အများအပြား ရရှိခဲ့ပြီး Wittaya မှာလည်း သေနတ်ဖြင့် အကြိမ်ကြိမ် ပစ်ခတ်ခံခဲ့ရခြင်းဖြစ်သည်။
အခြား ရဲတပ်ဖွဲ့ဝင် ၃ ဦးဖြစ်သည့် ရဲတပ်ကြပ် Traithot Kunsanthawasri၊ ရဲအုပ် Wannuchit Saekhor နှင့် ရဲဒုဗိုလ် Kittipong Srikham တို့မှာလည်း ဒဏ်ရာရရှိခဲ့သည်။
ရဲတပ်ဖွဲ့ဝင် ၅ ဦးစလုံးကို ရှေးဦးစွာ တာဘိုင်ဆေးရုံသို့ ပို့ဆောင်ခဲ့ပြီးနောက် ဒဏ်ရာရရှိသူများကို ဆက်လက်ကုသရန် နရာသီဝတ် ရာချာနကာရင် (Narathiwat Ratchanakarin) ဆေးရုံသို့ ပြောင်းရွှေ့ပေးခဲ့သည်။
ရဲတပ်ဖွဲ့၏ ပြောကြားချက်အရ သေနတ်သမားသည် ထပ်မံပစ်ခတ်မှုများ ပြုလုပ်၍ ထွက်ပြေးလွတ်မြောက်သွားခြင်းဖြစ်သည်။ သေနတ်သမားသည် စိုက်ခင်းနှင့် ပတ်ဝန်းကျင်ဒေသကို ကျွမ်းကျင်သူဖြစ်သည့်အတွက် ဖမ်းဆီးခြင်းမှ ရှောင်ရှားနိုင်ခဲ့ခြင်းဖြစ်သည်ဟု စုံစမ်းစစ်ဆေးသူများက ယူဆထားကြသည်။
စီးနင်းမှုအတွင်း အခြားသံသယရှိသူ ၃ ဦးကို အဆိုပါတဲအတွင်း ဖမ်းဆီးရမိခဲ့သည်။ ၎င်းတို့သည် အဆိုပါ ပုန်းအောင်းရာနေရာ၌ နေထိုင်ခဲ့ကြောင်း ဝန်ခံခဲ့ပြီး ဆက်လက်စစ်ဆေးရန် ထိန်းသိမ်းထားသည်။
ဒေသတွင်း အမှတ် (၉) ရဲတပ်ဖွဲ့တိုင်းမှူး ရဲဒုတိယဗိုလ်ချုပ်ကြီး Piyawat က အဆိုပါဧရိယာသို့ လုံခြုံရေးတပ်ဖွဲ့များ ထပ်မံ စေလွှတ်ရန် အမိန့်ပေးခဲ့ပြီး စိုက်ခင်းနှင့် အနီးဝန်းကျင်နေရာများကို ရှာဖွေရန် စစ်တပ်နှင့် အုပ်ချုပ်ရေးပိုင်း တာဝန်ရှိသူများထံမှ ကူညီပံ့ပိုးမှု တောင်းခံခဲ့သည်။ ထွက်ပြေးလွတ်မြောက်နေသည့် သေနတ်သမားသည် အဆိုပါဧရိယာအတွင်း ပုန်းအောင်းနေဆဲဖြစ်သည်ဟု ရဲတပ်ဖွဲ့က ယူဆထားသည်။
အာဏာပိုင်များက ရှာဖွေရေးလုပ်ငန်းများ ဆက်လက်လုပ်ဆောင်နေစဉ်အတွင်း အဆိုပါ နယ်မြေကို ကန့်သတ်နယ်မြေအဖြစ် ကြေညာခဲ့ပြီး ဒေသခံများနှင့် မီဒီယာအဖွဲ့ဝင်များ ဝင်ရောက်ခွင့် ပိတ်ပင်ထားသည်။
ယမန်နှစ် ဇူလိုင်လကလည်း အလားတူဖြစ်စဉ်အဖြစ် ယာလာ (Yala) ခရိုင်ရှိ ကုန်စုံဆိုင်တစ်ခုအနီး ပုံမှန်ကင်းလှည့်နေစဉ် ရဲအရာရှိတစ်ဦး သေနတ်ဖြင့် ပစ်ခတ်ခံရ၍ သေဆုံးခဲ့ဖူးသည်။ ထိုစဉ်ကလည်း သေနတ်သမား မည်သူမည်ဝါဖြစ်သည်ကို ထုတ်ဖော်ပြောကြားခဲ့ခြင်း မရှိသလို ဖမ်းဆီးရမိမှုလည်း မရှိပေ။
ထို့အပြင် ထိုနှစ် ဧပြီလကလည်း လွယ်အိ (Loei) ခရိုင်ရှိ ရဲအရာရှိတစ်ဦးမှာ မူးယစ်ဆေးဝါး ဖြန့်ဖြူးသည်ဟု သံသယရှိသူတစ်ဦး၏ သေနတ်ဖြင့် ပစ်ခတ်မှုကြောင့် သေဆုံးခဲ့ရသည်။ ထိုရဲအရာရှိ မသေဆုံးမီ တစ်ပတ်ခန့်က ထိုင်း-လာအို နယ်စပ်ရှိ မြစ်အတွင်း သံသယရှိ သေနတ်သမား၏ အလောင်းမျောပါလာသည်ကို အာဏာပိုင်များက တွေ့ရှိခဲ့ကြသည်။
Ref : Thaiger
About the Author
