နေမိုး
၂၅. ၇. ၂၀၂၆
နိုင်ငံတော်အစိုးရသည် PDF အပါအဝင် အဖွဲ့အစည်းအမျိုးမျိုးအမည်ခံ၍ လက်နက်ကိုင်ဆန့်ကျင်လျက်ရှိသည့် အဖွဲ့အစည်းများအတွင်း ရောက်ရှိနေသူများအား ဥပဒေဘောင်အတွင်းသို့ ပြန်လည်ဝင်ရောက်ရန်ဖိတ်ခေါ်၍ ဥပဒေဘောင်အတွင်းသို့ ပြန်လည်ဝင်ရောက်လာကြသူများကိုလည်း လိုအပ်သည့်ကူညီပံ့ပိုးမှုများ ဆောင်ရွက်ပေးလျက်ရှိရာ နိုင်ငံတော်နှင့်တပ်မတော်၏ ငြိမ်းချမ်းရေးလုပ်ငန်းစဉ်များကို နားလည်သဘောပေါက်လာသည့် PDF နှင့် တိုင်းရင်းသားလက်နက်ကိုင်အဖွဲ့ဝင် ၄၅၀၀ ခန့်က သုံးနှစ်အတွင်း အလင်းဝင်လာခဲ့ပြီဖြစ်သလို ဇူလိုင် ၂၄ ရက်တွင်လည်း PDF အမည်ခံအဖွဲ့ဝင် အမျိုးသား ၂၂ ဦးနှင့် အမျိုးသမီး ၁ ဦး၊ စုစုပေါင်း ၂၃ ဦးတို့သည် လက်နက်၊ ခဲယမ်းများနှင့်အတူ ဥပဒေဘောင်အတွင်းသို့ ထပ်မံဝင်ရောက်လာကြရာ ကြိုဆိုလက်ခံ၍ မိဘအုပ်ထိန်းသူများထံ ပြန်လည်လွှဲပြောင်းအပ်နှံပွဲကို ကမ်းရိုးတန်းဒေသတိုင်းစစ်ဌာနချုပ်ရှိ တိုင်းရန်အောင်ခန်းမ၌ပြုလုပ်ရာ တနင်္သာရီတိုင်းဒေသကြီးဝန်ကြီးချုပ် ဦးဇော်နိုင်ဦး၊ တိုင်းမှူး ဗိုလ်ချုပ် ကျော်ကျော်ဟန်နှင့်တာဝန်ရှိသူများ၊ ဥပဒေဘောင်အတွင်း ပြန်လည်ဝင်ရောက် လာခဲ့ကြသော PDF အဖွဲ့ဝင်များနှင့် ၎င်းတို့၏မိဘအုပ်ထိန်းသူများ တက်ရောက်ကြသည်။
ဦးစွာ တိုင်းဒေသကြီးဝန်ကြီးချုပ်က အမှာစကားပြောကြားပြီး တိုင်းမှူးက နယ်မြေဒေသ တည်ငြိမ်အေးချမ်းရေး၊ တရားဥပဒေပုဒ်မများနှင့်ပတ်သက်၍ အမှာစကားများ ပြောကြားကြသည်။ ထို့နောက် ဥပဒေဘောင်အတွင်း ပြန်လည်ဝင်ရောက်ခဲ့ကြသူများက ၎င်းတို့နှင့်အတူပါရှိလာသည့် M-16 သေနတ် ၂ လက်၊ ကိုးလုံးကျည်လက်လုပ် ပြောင်းချောသေနတ် ၆ လက်၊ MG-1 လက်ပစ်ဗုံး ၂ လုံး၊ စကားပြောစက် ၁ လုံး၊ ကျည်အိမ် ၃ ခုနှင့် ကျည်မျိုးစုံ ၁၉၆ တောင့်တို့ကို လွှဲပြောင်းအပ်နှံရာ တိုင်းဒေသကြီးဝန်ကြီးချုပ်နှင့်တိုင်းမှူးတို့က လက်ခံရယူသည်။ ယင်းနောက် တိုင်းဒေသကြီးဝန်ကြီးချုပ်နှင့်တိုင်းမှူးတို့က လက်နက်၊ ခဲယမ်းများနှင့်အတူ ဥပဒေဘောင်အတွင်း ဝင်ရောက်လာသူများအား မောင်းပြန်ရိုင်ဖယ် ၂ လက် အတွက် ဆုကြေးငွေကျပ် သိန်း ၁၀၀၊ လက်လုပ်ပြောင်းချောသေနတ် ၆ လက်အတွက် သိန်း ၃၀၊ လက်ပစ်ဗုံး ၂ လုံးအတွက် ဆုကြေးငွေကျပ် ၆ သိန်း၊ စကားပြာစက် ၁ လုံးအတွက် ဆုကြေး ငွေကျပ် ၂ သိန်းနှင့် အလင်းဝင်ရောက်လာသူ ၂၃ ဦးအား တစ်ဦးလျှင် ဆုကြေးငွေကျပ် ၁၀ သိန်းနှုန်းဖြင့် သိန်း ၂၃၀ ကျပ်၊ စုစုပေါင်းငွေကျပ် ၃၆၈ သိန်းအားပေးအပ်ကာ ခံဝန်ကတိလက်မှတ် ရေးထိုးစေပြီး မိဘအုပ်ထိန်းသူများထံ ပြန်လည်လွှဲပြောင်းအပ်နှံပေးရာ ဥပဒေဘောင်အတွင်း ဝင်ရောက်လာသူများကိုယ်စား ဥပဒေဘောင်အတွင်းဝင်ရောက်လာသူတစ်ဦးက ကျေးဇူးတင်စကား ပြန်လည်ပြောကြားသည်။
“၂၀၂၄ ခုနှစ် ၄ လပိုင်း ၁ ရက်နေ့မှာ သူငယ်ချင်းကခေါ်လို့ ရောက်သွားခဲ့တယ်။ စခန်းမှာ သစ်ခုတ်၊ ဝါးခုတ်၊ မြေကျင်း တူးတာတွေ နေ့တိုင်းပင်ပင်ပန်းပန်း လုပ်ခဲ့ရပါတယ်။ စခန်းမှာ ခေါင်းဆောင် အကြီးပိုင်းတွေက ကြီးနိုင်ငယ်ညှဉ်း လုပ်ကြတယ်။ အစားအသောက်တွေဆို သူတို့က ကောင်းကောင်းစားပြီး ကျွန်တော်တို့ကို ပဲဟင်း၊ ငါးခြောက်နဲ့ပဲ ကျွေးတာပါ။ အသက်အန္တရာယ်များတဲ့ အလုပ်ဆို ကျွန်တော်တို့ ကပဲ လုပ်ရတယ်။ လမ်းမှာဂိတ်ဖွင့်ပြီး ပိုက်ဆံကောက်တယ်။ ရွာတွေကို တစ်လတစ်ခါ ဆက်ကြေးကောက်ကြတယ်။ ရလာတဲ့ ပိုက်ဆံ သိန်း ၂၀၀၀ လောက်ကို သိန်း ၃၀၀ လောက်ပဲ စာရင်းတင်ပြီးတော့ ကျန်တဲ့ပိုက်ဆံကို သူတို့ ထိုင်းမှာ အိမ်တွေ ခြံတွေ မြေတွေ ကားတွေ ဝယ်ပြီးတော့ နေထိုင်ကြတယ်။ စခန်းမှာကျန်ခဲ့တဲ့ ကျွန်တော်တို့က ငတ်ပြတ်ပြီးနေရတယ်။ ကျွန်တော်တို့က တော်လှန်ရေးအတွက်ဝင်လာတာဆိုပေမယ့် ထင်ထားတာနဲ့တခြားစီ ဖြစ်နေတယ်။ ပြည်သူတွေကို ဒုက္ခပေးတယ်လို့ပြောရင်လည်း ကျွန်တော်တို့ကို ဆူပူကြိမ်းမောင်းတယ်။ အချုပ်ချတယ်။”ဟု အလင်းဝင် PDF တစ်ဦးက ရင်ဖွင့်သည်။
ထိုသို့ ဥပဒေဘောင်အတွင်း လက်နက်/ခဲယမ်းများနှင့်အတူ ပြန်လည်ဝင်ရောက်လာကြသူများမှာ မြိတ်မြို့မှ အမျိုးသား ၈ ဦး၊ ထားဝယ်မြို့မှ အမျိုးသား ၇ ဦးနှင့် အမျိုးသမီး ၁ ဦး၊ တနင်္သာရီမြို့မှ အမျိုးသား ၄ ဦး၊ ပုလောမြို့မှ အမျိုးသား ၁ ဦး၊ ပလောက်မြို့မှ ၁ ဦး၊ ရှမ်းပြည်နယ် (မြောက်ပိုင်း)၊ လားရှိုးမြို့မှအမျိုးသား ၁ ဦး စုစုပေါင်း ၂၃ ဦးဖြစ်ကြောင်း သိရှိရသည်။
အဆိုပါ ဥပဒေဘောင်အတွင်းသို့ဝင်ရောက်လာကြသည့် PDF အမည်ခံ အဖွဲ့ဝင်များသည် မိသားစုဝင်ဆွေမျိုးများနှင့်အကျပ်ကိုင်၍ အတင်းအဓမ္မစုဆောင်းခံကြရခြင်း၊ အကြမ်းဖက်အဖွဲ့များ၏ အကျိုးစီးပွားအတွက် အပြစ်မဲ့ပြည်သူများနှင့် နိုင်ငံ့ဝန်ထမ်းများအား ခြိမ်းခြောက်၊ ဖမ်းဆီး၊ သတ်ဖြတ်ခြင်း၊ စစ်ရေးပစ်မှတ်မဟုတ်သည့် အခြေခံအဆောက်အအုံများ၊ လမ်း၊ တံတားများကို မိုင်းထောင်ဖောက်ခွဲဖျက်ဆီးခြင်း စသည့်အကြမ်းဖက်လုပ်ရပ်များကို လက်မခံနိုင်တော့ခြင်း၊ ၎င်းအဖွဲ့များအတွင်း၌ပင် အထက်အောက်အဆင့်အတန်းခွဲခြား၍ အချင်းချင်းဗိုလ်ကျ နှိပ်စက်၊ သတ်ဖြတ်ခြင်း၊ အဓမ္မမှုကျူးလွန်ခြင်း၊ အနေအစားဆင်းရဲ၍ ပင်ပန်းဆင်းရဲစွာ နေထိုင်ရခြင်းနှင့် တပ်မတော်၏တိုက်စစ်ကို ခုခံနိုင်တော့ခြင်းမရှိဘဲ စိတ်ဓာတ်ကျဆင်းလာခြင်းတို့အပြင် နိုင်ငံတော်နှင့်တပ်မတော်၏ ငြိမ်းချမ်းရေးလုပ်ငန်းစဉ်များကို ယုံကြည်လက်ခံပြီး ဥပဒေဘောင်အတွင်း ငြိမ်းချမ်းစွာနေထိုင်၍ ၎င်းတို့ကြောင့် နစ်နာဆုံးရှုံးမှုများဖြစ်ပေါ်ခဲ့ရသည့် နိုင်ငံတော်နှင့်ပြည်သူလူထုအတွက် ပြန်လည်အကျိုးပြုလိုခြင်းတို့ကြောင့် လက်နက်ကိုင်လမ်းစဉ်အားစွန့်လွှတ်၍ ဥပဒေဘောင်အတွင်း ပြန်လည်ဝင်ရောက်ခဲ့ကြခြင်းဖြစ်ကြောင်း သိရှိရသည်။
“၂၀၂၄ ခုနှစ် ၂ လပိုင်း ၁၄ ရက် နေ့မှာ စဝင်တယ်။ ဆေးသင်တန်း တစ်လ တက်ရတယ်။ စခန်းမှာ ထမင်းချက်တာ၊ ထင်းခွဲတာ၊ ရေခပ်တာတွေ နေ့တိုင်းလုပ်ရတယ်။ နေရထိုင်ရတာ အဆင်မပြေဘူး။ အစားဆိုလည်း ကောင်းကောင်း မစားရဘူး။ စခန်းမှာဆို ဘာမှ မလုပ်ဘဲနဲ့ အမြဲဆူပူ ကြိမ်းမောင်းခံရတယ်။ စခန်းအပြင်လည်း မထွက်ရဘူး။ အနေအထိုင် ကျဉ်းကျပ်တယ်။ စစ်ကြောင်းလာရင်လည်း ခဏခဏပြေးရတယ်။ အမြဲဆူပူ အနိုင်ကျင့်လေ့ရှိတယ်။ စခန်းမှာ မနေချင်လို့ ထွက်ပြေးတာ လေးခါရှိပြီ။ လုံးဝမလွတ်မြောက်ခဲ့ဘူး။ အခုမှ လွတ်လာတာပါ။ သူတို့ရဲ့ မတရားလုပ်တာတွေ ကြီးနိုင်ငယ်ညှဉ်းလုပ်တာတွေကို သိမြင်လာပြီးတော့ တပ်မတော်ထံ အလင်းလာဝင်ချင်နေတာပါ။ အလင်းဝင်တဲ့ အခါမှာဆိုရင်လည်း တာဝန်ရှိတဲ့ လူကြီးတွေက နွေးနွေးထွေးထွေး ကြိုဆိုပြီး ကောင်းကောင်းမွန်မွန် နေထိုင် စားသောက်လို့ရအောင် စီစဉ်ပေးကြပါတယ်။ တောထဲမှာ ကျန်ခဲ့တဲ့ ညီအစ်ကို မောင်နှမတွေ အားလုံးလည်း တပ်မတော်ထံ အလင်းဝင်ကြပါလို့ တိုက်တွန်းပြောကြားချင်ပါတယ်” ဟုလည်း အခြားအလင်းဝင် PDF တစ်ဦးက ဆိုသည်။
ထိုသို့ ဥပဒေဘောင်အတွင်း ပြန်လည်ဝင်ရောက်လာကြသူများအား ပြန်လည်ကြိုဆိုလက်ခံ၍ လိုအပ်သည့်ကူညီပံ့ပိုးမှုများ ဆောင်ရွက်ပေးကာ မိဘအုပ်ထိန်းသူများထံသို့ စနစ်တကျပြန်လည်လွှဲအပ်ပေးလျက်ရှိရာ ဥပဒေဘောင်အတွင်းသို့ ပြန်လည်ဝင်ရောက်ရန် ဆန္ဒရှိသူများကျန်ရှိနေသေးကြောင်းသိရှိရပြီး ဥပဒေဘောင်အတွင်း ပြန်လည်ဝင်ရောက်လိုသူများအနေဖြင့် နီးစပ်ရာ ခရိုင်၊ မြို့နယ်အုပ်ချုပ်ရေးအဖွဲ့များ၊ တပ်စခန်းများနှင့်ရဲစခန်းများသို့ အမြန်ဆက်သွယ်သတင်းပေးပို့လာပါက ကြိုဆိုလက်ခံကာ လိုအပ်သည့်ကူညီထောက်ပံ့မှုများ ပေးအပ်သွားမည်ဖြစ်ကြောင်းနှင့် လက်နက်/ခဲယမ်းများအတွက် ဆုကြေးငွေများပေးအပ်သွားမည်ဖြစ်ကြောင်း သိရှိရသည်။
About the Author
