သက်တံ့
၁၄. ၇. ၂၀၂၆
ရေရှည်တည်တံ့သော ပင်လယ်ရေကြောင်းအခြေပြု ဖွံ့ဖြိုးတိုးတက်မှုဆိုင်ရာ အလေ့အကျင့်ကောင်းများကို အပြန်အလှန် ဖလှယ်ကြရန် အာဆီယံအဖွဲ့ဝင်နိုင်ငံများနှင့် မိတ်ဖက်နိုင်ငံများကို တစ်စုတစ်စည်းတည်း ဖြစ်စေမည့် နိုင်ငံတကာ ပင်လယ်ပြာစီးပွားရေးဖိုရမ် (Blue Economy Forum) တစ်ခုကို အင်ဒိုနီးရှားနိုင်ငံ၊ ဂျာဗားအရှေ့ပိုင်းပြည်နယ်၊ ဗန်ယူးဝမ်ဂီ (Banyuwangi) ခရိုင်တွင် သောကြာနေ့မှ စနေနေ့အထိ အိမ်ရှင်အဖြစ် လက်ခံကျင်းပသွားမည် ဖြစ်သည်။
အဆိုပါ ASEAN-ID Blue Forum ကို အင်ဒိုနီးရှားနိုင်ငံ နိုင်ငံခြားရေးဝန်ကြီးဌာန၊ ပင်လယ်ရေကြောင်းနှင့် ငါးလုပ်ငန်းဝန်ကြီးဌာနတို့က နယူးဇီလန်နိုင်ငံ နိုင်ငံခြားရေးနှင့် ကုန်သွယ်ရေးဝန်ကြီးဌာနနှင့် ပူးပေါင်း၍ ပူးတွဲစီစဉ် ကျင်းပခြင်း ဖြစ်သည်။
အင်ဒိုနီးရှား နိုင်ငံခြားရေးဝန်ကြီးဌာနမှ တာဝန်ရှိသူတစ်ဦးဖြစ်သူ အက်ဒ်ယန်တီ ဆာဒါနာရီနီ ဝီရာဂျူဒါ (Adhyanti Sardanarini Wirajuda) က ပင်လယ်ရေကြောင်း ထိန်းသိမ်းရေးလုပ်ငန်းများကို ငါးလုပ်ငန်း၊ ခရီးသွားလုပ်ငန်း၊ အသေးစားစီးပွားရေးလုပ်ငန်းများနှင့် လူထုစွမ်းဆောင်ရည်မြှင့်တင်ရေး လုပ်ငန်းများအကြား အောင်မြင်စွာ ပေါင်းစပ်နိုင်ခဲ့ခြင်းကြောင့် ဗန်ယူးဝမ်ဂီခရိုင်ကို ရွေးချယ်ခဲ့ခြင်းဖြစ်ကြောင်း တနင်္လာနေ့တွင် ပြောကြားခဲ့သည်။
၎င်းခရိုင်၏ ဖွံ့ဖြိုးတိုးတက်မှုပုံစံသည် အင်ဒိုနီးရှားနိုင်ငံအနေဖြင့် အခြားတက်ရောက်လာသည့် နိုင်ငံများနှင့် မျှဝေလိုသော စံပြပုံစံတစ်ခု ဖြစ်သည်ဟုလည်း သူမက ဆိုသည်။
လာမည့် ဇူလိုင် ၁၇ ရက်နှင့် ၁၈ ရက်တွင် ကျင်းပမည့် ယခုဖိုရမ်သို့ မြန်မာနိုင်ငံအပါဝင် အာဆီယံအဖွဲ့ဝင်နိုင်ငံများ၊ အရှေ့အာရှထိပ်သီးအစည်းအဝေး တက်ရောက်မည့်နိုင်ငံများနှင့် ပစိဖိတ်ကျွန်းစုများဖိုရမ် အဖွဲ့ဝင်များမှ ကိုယ်စားလှယ်များ တက်ရောက်ကြလိမ့်မည်ဟု မျှော်လင့်ရပြီး၊ ဒေသတွင်း အပြာရောင်စီးပွားရေး ပူးပေါင်းဆောင်ရွက်မှုနှင့် ရေရှည်တည်တံ့သော ပင်လယ်ရေကြောင်းအရင်းအမြစ် စီမံခန့်ခွဲမှုကို အားကောင်းမောင်းသန်ဖြစ်စေရန် ရည်ရွယ်၍ ဆွေးနွေးသွားကြမည် ဖြစ်သည်။
Ref : Xinhua
About the Author
