သက်တံ့
၂၅. ၅. ၂၀၂၆
ရုရှားထိန်းချုပ်ထားသည့် လူဟန့်စ်ခ်ဒေသရှိ စတာရိုဘီလ်ခ်ကောလိပ်ကျောင်းအား ယူကရိန်းက ဒရုန်းဖြင့် တိုက်ခိုက်မှုအတွင်း သေဆုံးရသည့်ကျောင်းသား ၂၁ ဦးပုံရိပ်ကို ရုရှားဘက်က ထုတ်ပြန်လာခဲ့သည်။
၂၀၂၆ ခုနှစ် မေလ ၂၂ ရက်နေ့က ရုရှားထိန်းချုပ်ထားသော လူဟန့်စ်ခ် (Luhansk) ဒေသ၊ စတာရိုဘီလ်ခ် (Starobilsk) ကောလိပ်ကျောင်းသားအဆောင် ဒရုန်းဖြင့် တိုက်ခိုက်ခံရမှုတွင် သေဆုံးသူ စုစုပေါင်း ၂၁ ဦး ရှိပြီး ၄၀ ကျော် ဒဏ်ရာရရှိခဲ့သည်။ ဤတိုက်ခိုက်မှုကြောင့် ငါးထပ်ပါ အဆောင်၏ အပေါ်ဆုံးသုံးထပ် ပြိုကျပျက်စီးခဲ့ပြီး နိုင်ငံတကာ သံတမန်ရေးရာ အငြင်းပွားမှုများ ဖြစ်ပွားစေခဲ့သည်။
ဖြစ်စဉ်မှာ မေလ ၂၁ ရက်မှ ၂၂ ရက်သို့အကူး ညသန်းခေါင်အချိန်တွင် စတာရိုဘီလ်ခ်ရှိ ဆရာအတတ်သင်ကောလိပ်၏ ကျောင်းသားအဆောင်နှင့် စာသင်ဆောင်ကို ဒရုန်းအုပ်စုဖြင့် တိုက်ခိုက်ခဲ့သည်။
တိုက်ခိုက်မှုဖြစ်ပွားချိန်တွင် အဆောင်အတွင်း၌ ဆယ်ကျော်သက်အရွယ် ကျောင်းသား၊ ကျောင်းသူ ၈၆ ဦး ရှိနေခဲ့ကြောင်း ရုရှားအာဏာပိုင်များက ပြောကြားသည်။ ရှာဖွေကယ်ဆယ်ရေးလုပ်ငန်းများအပြီးတွင် သေဆုံးသူ ၂၁ ဦး ရှိကြောင်း အတည်ပြုခဲ့သည်။ ရုရှားခန့်အပ်ထားသော ဒေသခံအရာရှိများက သေဆုံးသူများ၏ ဝမ်းနည်းဖွယ် အထိမ်းအမှတ်ဓာတ်ပုံများနှင့် အမည်စာရင်းများကို ထုတ်ပြန်ခဲ့ပြီး အများစုမှာ ကျောင်းသူလူငယ်များ ဖြစ်ကြသည်။
အဆောက်အအုံ၏ အစိတ်အပိုင်းအများအပြား ပြိုကျပျက်စီးသွားပြီး ကျောင်းသားစားပွဲများနှင့် အဆောင်ကြမ်းပြင်များ ပြိုကျနေသည်ကို အခင်းဖြစ်ပွားရာ ရုပ်သံနှင့် ဓာတ်ပုံများတွင် တွေ့ရသည်။
ရုရှားအာဏာပိုင်များက ဤဖြစ်ရပ်ကို အရပ်သားများအား ရည်ရွယ်ချက်ရှိရှိ တိုက်ခိုက်သည့် “အကြမ်းဖက်မှု” နှင့် စစ်ရာဇဝတ်မှုအဖြစ် ဖော်ပြခဲ့ပြီး အနီးအနားတွင် စစ်ဘက်ဆိုင်ရာနေရာများ မရှိကြောင်း ပြောကြားသည်။ မော်စကိုသည် ကုလသမဂ္ဂ လုံခြုံရေးကောင်စီ အရေးပေါ်အစည်းအဝေးခေါ်ယူရန် တောင်းဆိုခဲ့ပြီး ရုရှားသမ္မတ ဗလာဒီမာ ပူတင်က လက်တုံ့ပြန်မည့် နည်းလမ်းများကို ပြင်ဆင်ရန် အမိန့်ပေးခဲ့သည်။
ယူကရိန်းတပ်ဖွဲ့များနှင့် တာဝန်ရှိသူများက အရပ်သားအဆောက်အအုံကို ပစ်မှတ်ထားတိုက်ခိုက်ခဲ့ခြင်း မရှိကြောင်း ငြင်းဆိုသည်။ ယူကရိန်းစစ်တပ်သည် နိုင်ငံတကာ လူသားချင်းစာနာထောက်ထားမှုဆိုင်ရာ ဥပဒေများကို တိကျစွာလိုက်နာကြောင်းနှင့် လူဟန့်စ်ခ်ဒေသတွင်း တိုက်ခိုက်မှုသည် ရုရှား၏ ထိပ်တန်းဒရုန်းကွပ်ကဲမှုစနစ် အခြေစိုက်ရာနေရာကို ဦးတည်ခဲ့ခြင်းဖြစ်ကြောင်း ပြောကြားခဲ့သည်။
Ref: RT & AA
About the Author
