သက်တံ့
၁၅. ၅. ၂၀၂၆
ပါကစ္စတန်နိုင်ငံ အနောက်မြောက်ပိုင်းရှိ မငြိမ်မသက်ဖြစ်နေသော ဘာဂျာအာ (Bajaur) ခရိုင်အတွင်း Tehreek-e-Taliban Pakistan (TTP) အကြမ်းဖက်သမားများက စစ်တပ်နှင့် ရဲစခန်း တပ်တည်နေရာအမြောက်အမြားကို ယမန်နေ့တွင် ဟန်ချက်ညီညီ ပူးပေါင်းတိုက်ခိုက်ခဲ့ကြသဖြင့် အကြမ်းဖက်မှုများ ပြင်းထန်စွာ မြင့်တက်လာခဲ့သည်။ အဆိုးရွားဆုံး တိုက်ခိုက်မှုမှာ လွိုင်မာမွန် (Loi Mamund) နယ်မြေရှိ ဒါမန်ဂီကင်းထောက် (Damangi Scouts) စခန်းတွင် ဖြစ်ပွားခဲ့ခြင်းဖြစ်ကာ TTP တိုက်ခိုက်ရေးသမားများက အသေခံဗုံးခွဲတိုက်ခိုက်မှုတစ်ခု လုပ်ဆောင်ခဲ့ပြီးနောက် ညအမှောင်ထုကို အကာအကွယ်ယူကာ လက်နက်ကြီး၊ လက်နက်ငယ်များဖြင့် စခန်းဝန်းအတွင်းသို့ စီးနင်းဝင်ရောက်ခဲ့ကြသည်။
ပါကစ္စတန်တပ်ဖွဲ့များအနေဖြင့် အဆိုပါနယ်မြေကို ပြန်လည်ထိန်းချုပ်နိုင်ရန် ကြိုးပမ်းခဲ့ကြရသဖြင့် ပြင်းထန်သော ပစ်ခတ်မှုများသည် တစ်ညလုံးမှသည် နောက်တစ်နေ့ နံနက်အစောပိုင်းအထိ ဆက်လက်ဖြစ်ပွားခဲ့ကြောင်း ဒေသခံသတင်းရင်းမြစ်များနှင့် ဒေသတွင်း မီဒီယာများက ဖော်ပြသည်။ တိုက်ပွဲများအတွင်း နှစ်ဖက်စလုံးတွင် ထိခိုက်သေဆုံးမှု ကိန်းဂဏန်းများ ကွဲလွဲလျက်ရှိပြီး ယင်းက ကစဉ့်ကလျားဖြစ်ပွားခဲ့သည့် စစ်ဆင်ရေးအခြေအနေနှင့် လတ်တလော ထုတ်ပြန်ထားသည့် တရားဝင်သတင်းအချက်အလက် နည်းပါးမှုကို ပြသနေသည်။
ကနဦးရရှိထားသော သတင်းအချက်အလက်များအရ ဘာဂျာအာခရိုင်အတွင်း တိုက်ခိုက်မှုများကြောင့် ပါကစ္စတန်လုံခြုံရေးတပ်ဖွဲ့ဝင် အနည်းဆုံး ၁၈ ဦး သေဆုံးခဲ့ပြီး အများအပြား ဒဏ်ရာရရှိခဲ့သည်။ ပါကစ္စတန်တပ်ဖွဲ့ဝင်များအကြား စုစုပေါင်း ထိခိုက်သေဆုံးမှု အရေအတွက်မှာ ယခုထက် ပိုမိုများပြားနိုင်ကြောင်း ဒေသတွင်း ထောက်လှမ်းရေးနှင့် နီးစပ်သည့် အစီရင်ခံစာအချို့က ဆိုသော်လည်း ထိုကိန်းဂဏန်းများကိုမူ သီးခြားအတည်ပြုနိုင်ခြင်း မရှိသေးပေ။
ဒေသတွင်းမှ ထွက်ပေါ်လာသော လုံခြုံရေးဆိုင်ရာ သတင်းများအရ ဒါမန်ဂီကင်းထောက်စခန်းကို တိုက်ခိုက်မှုသည် အဓိကဝင်ပေါက်၌ အသေခံဗုံးခွဲမှုဖြင့် စတင်ခဲ့သည်။ ထို့နောက် သောင်းကျန်းသူများသည် စခန်းဝန်းအတွင်းသို့ ဝင်ရောက်ကာ ရမ်းသန်းပစ်ခတ်ခဲ့ကြသဖြင့် ပါကစ္စတန်တပ်ဖွဲ့ဝင်များသည် စခန်းအတွင်းနှင့် စခန်းအနီးဝန်းကျင်၌ အနီးကပ်တိုက်ပွဲကို အချိန်အတော်ကြာ လွှဲရှောင်မရဘဲ ဆင်နွှဲခဲ့ရသည်။
အဆိုပါစစ်ဆင်ရေးအတွင်း အသေခံဗုံးခွဲသမားများအပါအဝင် တိုက်ခိုက်သူအနည်းဆုံး ၉ ဦး သေဆုံးခဲ့ကြောင်း ဒေသတွင်းသတင်းများတွင် တာဝန်ရှိသူများ၏ ပြောကြားချက်ကို ကိုးကား၍ ဖော်ပြထားသည်။ သို့သော်လည်း ပါကစ္စတန်အာဏာပိုင်များက ထိခိုက်သေဆုံးမှု သို့မဟုတ် စစ်ဆင်ရေးဆိုင်ရာ ဆုံးရှုံးမှုများနှင့် ပတ်သက်၍ အသေးစိတ် တရားဝင်ထုတ်ပြန်ခြင်း မရှိသေးပေ။
ညတွင်းချင်းဖြစ်ပွားခဲ့သော အကြမ်းဖက်မှုများသည် စစ်အခြေစိုက်စခန်းတစ်ခုတည်းတွင်တင် အဆုံးသတ်သွားခြင်း မဟုတ်ပေ။ ဘာဂျာအာခရိုင်မှ ထွက်ပေါ်လာသော အစီရင်ခံစာများအရ ၂၃ မြင်းစီးတပ်မ (23 Cavalry Division)၊ တပ်မဟာ ၁၇၂၊ ၁၇၃၊ ၁၇၇ (172 Wing, 173 Wing, 177 Wing) နှင့် ၂၆ နယ်ခြားစောင့်တပ်ရင်း (26 Frontier Force Regiment) တို့နှင့် ဆက်နွှဲနေသည့် စစ်ဘက်ဆိုင်ရာ အခြေစိုက်စခန်းအချို့လည်း တစ်ပြိုင်နက်တည်း တိုက်ခိုက်ခြင်း ခံခဲ့ရသည်။ တိုက်ပွဲများ ပြင်းထန်လာချိန်တွင် ဒါမန်ဂီကင်းထောက်စခန်းသို့ ဦးတည်ထားသော လမ်းများကိုလည်း ပိတ်ဆို့ထားခဲ့သဖြင့် စစ်ကူလွှတ်ရန်နှင့် ဒဏ်ရာရရှိသူများကို ကယ်ထုတ်ရန် ကြိုးပမ်းမှုများမှာ ပိုမိုခက်ခဲရှုပ်ထွေးခဲ့ရသည်။
အတည်ပြုထားသော သေဆုံးသူများအနက် ၇ ဦးမှာ ၂၆ နယ်ခြားစောင့်တပ်ရင်း (26 FF) မှ ဖြစ်ပြီး တိုက်ပွဲအတွင်း ၂၀ ကျော် ဒဏ်ရာရရှိခဲ့ကြောင်း ဒေသတွင်းသတင်းအချို့က ဆိုသည်။ ထို့ပြင် အမှတ် (၅၅) ဘာလိုချ်တပ်ရင်း (55 Baloch Regiment) နှင့် အထူးစစ်ဆင်ရေးတပ်ဖွဲ့ဝင်များလည်း ထိခိုက်သေဆုံးမှုများ ရှိနိုင်ကြောင်း ထပ်မံထွက်ပေါ်လာသော သတင်းများက ဆိုသော်လည်း ထိုပြောဆိုချက်များကို ပါကစ္စတန်အာဏာပိုင်များက တရားဝင်အတည်ပြုခြင်း မရှိသေးပေ။
အိုင်နိုင်းကီလေ (Ainai Kiley) နှင့် မာမွန် (Mamund) တို့တွင်လည်း သီးခြားတိုက်ခိုက်မှုများ ဖြစ်ပွားခဲ့ပြီး သောင်းကျန်းသူများက သေးငယ်သော လုံခြုံရေးကင်းစခန်းများကို ပစ်မှတ်ထားခဲ့သဖြင့် ရဲတပ်ဖွဲ့ဝင် အနည်းဆုံး ၄ ဦး သေဆုံးခဲ့ကြောင်း သိရသည်။ အချို့သော သောင်းကျန်းသူများသည် အနီးဝန်းကျင်တွင် ရှိနေဆဲဖြစ်နိုင်သဖြင့် ထိခိုက်မှုရှိခဲ့သည့် နေရာများ၌ နယ်မြေရှင်းလင်းရေးလုပ်ငန်းများကို ဆက်လက်လုပ်ဆောင်နေကြောင်း ပါကစ္စတန်လုံခြုံရေးတာဝန်ရှိသူများက ဝန်ခံပြောကြားထားသည်။
ပြီးခဲ့သည့် မေ ၉ ရက်နှင့် ၁၂ ရက်ကလည်း ခိုင်ဘာပတ်တွန်ခွာပြည်နယ်တွင် ပါကစ္စတန်တာလီဘန်အဖွဲ့၏ တိုက်ခိုက်မှုကြောင့် လုံခြုံရေးတပ်ဖွဲ့ဝင်များနှင့် ပြည်သူများ အနည်းဆုံး ၂၄ ဦး သေဆုံးခဲ့ရသည်။ ယခုဖြစ်ရပ်သည် တစ်ပတ်အတွင်း သုံးကြိမ်မြောက် တိုက်ခိုက်ခံရမှုဖြစ်ပြီး အာဖဂနစ္စတန်နယ်စပ်ဖြစ်သော ပါကစ္စတန်အနောက်မြောက်ပိုင်းတွင် ရင်ဆိုင်နေရသော လုံခြုံရေးအခြေအနေမှာ ပိုမိုစိုးရိမ်စရာဖြစ်လာကြောင်း မီးမောင်းထိုးပြနေသည်။
Ref: Times Now
About the Author
