၆.၅.၂၀၂၆
Translated by Htwe Ko Tun
ဟော်မုဇ်ရေလက်ကြားအတွင်း ပိတ်မိနေသော သင်္ဘောများကို ရေလက်ကြားမှပြန်လည်ထွက်ခွာနိုင်ရန် အမေရိကန်ရေတပ်က Project Freedom စစ်ဆင်ရေးဖြင့် လမ်းညွှန်ဆောင်ရွက်ပေးမည်ဟု ပြောကြားခဲ့ပြီးနောက် မေလ ၅ ရက်တွင်မူ ထိုစစ်ဆင်ရေးအား ယာယီရပ်ဆိုင်းထားမည်ဟု အမေရိကန်ပြည်ထောင်စုသမ္မတ ဒေါ်နယ်ဒ်ထရမ့်ပ်က ပြောကြားခဲ့ကြောင်း နောက်ဆုံးသတင်းများအရ သိရသည်။
သမ္မတ ဒေါ်နယ်ဒ် ထရမ့်ပ်က အီရန်ဆိပ်ကမ်းများအား ပိတ်ဆို့ထားမှုကိုမူ ဆက်လက်ထိန်းသိမ်း ဆောင်ရွက်နေမည်ဟု ပြောကြားခဲ့သည်။ ၎င်းက အီရန်ကိုယ်စားလှယ်များနှင့် ပြီးပြည့်စုံသည့် နောက်ဆုံး သဘောတူညီချက်ရရှိရန် ကြီးမားသောတိုးတက်မှု ရရှိခဲ့သည်ဟုလည်း ပြောကြားခဲ့သည်။
Project Freedom စစ်ဆင်ရေးကို ထရမ့်ပ်က မေလ ၃ ရက် ညနေပိုင်းတွင် ကြေညာခဲ့ပြီးနောက် မကြာမီမှာပင် အမေရိကန်နှင့် အီရန်စစ်တပ်များအကြား အပြန်အလှန်ပစ်ခတ်မှုများနှင့် စွပ်စွဲချက်များ ဖြစ်ပေါ်လာခဲ့ပြီး ပျက်စီးလွယ်သော အပစ်အခတ်ရပ်စဲရေးနှင့်ပတ်သက်၍ သံသယဖြစ်မှုများ ပို၍မြင့်တက်လာခဲ့သည်။
သို့သော် အမေရိကန် အစိုးရအရာရှိများက အပစ်အခတ်ရပ်စဲရေးမှာ ဆက်လက်တည်ရှိနေကြောင်း မေလ ၅ ရက်တွင် အခိုင်အမာပြောဆိုခဲ့ကြပြီး ရေလက်ကြားမှတစ်ဆင့် သင်္ဘောများကို လမ်းညွှန်ရန် လုပ်ဆောင်ချက်အသစ်ကို ချီးကျူးဂုဏ်ပြုရန် တစ်နေ့လုံး အချိန်ကုန်ခဲ့သည်။
သမ္မတ ထရမ့်ပ် Project Freedom စစ်ဆင်ရေး ယာယီရပ်ဆိုင်းထားမည်ဟု မပြောကြားမီမှာပင် အမေရိကန် နိုင်ငံခြားရေးဝန်ကြီး မာကို ရူဘီယိုက ဖေဖော်ဝါရီလတွင် စတင်ခဲ့သော အီရန်ကို တိုက်ခိုက်ရေး စစ်ဆင်ရေးများ ပြီးဆုံးသွားပြီဖြစ်ကြောင်းနှင့် အမေရိကန်သည် အရေးပါသော ရေလမ်းကြောင်းကို အပြည့်အဝ ပြန်လည်ဖွင့်လှစ်နိုင်မည့် ပထမခြေလှမ်း ဖြစ်သော စစ်ဆင်ရေးအသစ်ကို အလေးထားနေကြောင်း အိမ်ဖြူတော်တွင် သတင်းထောက်များအား မေလ ၅ ရက်ကပြောကြားခဲ့သေးသည်။
ကာကွယ်ရေးဝန်ကြီး ပီတီ ဟက်ဆက်သ်ကလည်း မေလ ၅ ရက် မနက်ခင်း သတင်းစာရှင်းလင်းပွဲတွင် Project Freedom စစ်ဆင်ရေးကြိုးပမ်းမှုသည် ဒေသတွင်းတွင် လက်ရှိစစ်ရေး စစ်ဆင်ရေးနှင့် သီးခြားစီဖြစ်ပြီး ထူးခြားကြောင်း ပြောကြားခဲ့သည်။
၎င်းက Project Freedom သည် ကာကွယ်ရေးသဘောသဘာဝရှိပြီး အတိုင်းအတာအားဖြင့် အာရုံစိုက်ကာ ယာယီအားဖြင့် အချိန်ကာလအားဖြင့် ကြာမြင့်ပြီး တစ်ခုတည်းသော ရည်မှန်းချက်မှာ အီရန်၏ ကျူးကျော်မှုမှ အပြစ်မဲ့ ကုန်သွယ်ရေး သင်္ဘောများကို ကာကွယ်ခြင်းဖြစ်သည် ဟု ၎င်းက ပြောကြားခဲ့သည်။
Ref- CNN
About the Author
