သက်တံ့
၂. ၂. ၂၀၂၆
ထိုင်းနိုင်ငံ၊ လမ်ပန်းပြည်နယ်ရှိ ရာစုနှစ်နှင့်ချီ၍ သက်တမ်းကြာရင့်ပြီဖြစ်သော ရှေးဟောင်းမြန်မာမှုဗိသုကာလက်ရာ ဘုန်းတော်ကြီးကျောင်းတစ်ကျောင်းမှာ တနင်္ဂနွေနေ့ နံနက်အစောပိုင်းက မီးလောင်ကျွမ်းမှုကြောင့် ပျက်စီးဆုံးရှုံးသွားခဲ့ကြောင်း အာဏာပိုင်များက ပြောကြားခဲ့သည်။
မီးလောင်မှုမှာ ယမန်နေ့ နံနက် ၆ နာရီခွဲအချိန်ခန့်တွင် လမ်ပန်းမြို့၊ ဖရာဘတ် ၂ (Phra Bat 2) ရပ်ကွက်ရှိ ဝပ်မွန်ပူယက် (Wat Mon Pu Yak) ခေါ် ဝပ်စန်သန် (Wat Santhan) ကျောင်းတိုက်တွင် စတင်ဖြစ်ပွားခဲ့ခြင်းဖြစ်သည်။ စည်ပင်သာယာရေးအဖွဲ့၊ အနီးနားရှိ ဒေသန္တရအုပ်ချုပ်ရေးအဖွဲ့များနှင့် အမှတ် ၃၂ စစ်ဒေသတပ်ဖွဲ့များမှ မီးသတ်ကား အစီးရေ ၁၀ စီးကျော် လာရောက်ငြှိမ်းသတ်ခဲ့ကြသည်။
မီးသတ်သမားများသည် ကျွန်းသစ်နှင့် အုတ်အင်္ဂတေများဖြင့် တည်ဆောက်ထားသည့် မြန်မာမှုဗိသုကာလက်ရာဖြစ်သော ပဓာနဝိဟာရ (ကျောင်းဆောင်မကြီး) တစ်ခုလုံးကို ပြင်းထန်စွာ ဝါးမြိုနေသည့် မီးတောက်များကို ရင်ဆိုင်ငြှိမ်းသတ်ခဲ့ရသည်။ နှစ်နာရီကျော်ကြာ ကြိုးပမ်းခဲ့ပြီးနောက်တွင် မီးကို ထိန်းချုပ်နိုင်ခဲ့သည်။
အဆိုပါ မီးလောင်မှုကြောင့် ဝိဟာရကျောင်းဆောင်မကြီးနှင့်အတူ ရှေးဟောင်းအနုပညာလက်ရာများ၊ ကျောင်းတိုက်ပိုင် ပစ္စည်းများနှင့် အဓိက ဗုဒ္ဓရုပ်ပွားတော်မြတ်တို့မှာ လုံးဝ (လုံးဝ) ပျက်စီးဆုံးရှုံးသွားခဲ့သည်။
ကျောင်းတိုက်တွင် တစ်ပါးတည်း သီတင်းသုံးသည့် ကျောင်းထိုင်ဆရာတော်၏ ဘေးအန္တရာယ်အတွက် အာဏာပိုင်များက ကနဦးတွင် စိုးရိမ်ခဲ့ကြသော်လည်း နောက်ပိုင်းတွင် ဆရာတော်သည် တာ့ခ် (Tak) ပြည်နယ်ရှိ ဘာသာရေးအခမ်းအနားတစ်ခုသို့ ကြွရောက်နေသဖြင့် ဘေးအန္တရာယ်ကင်းရှင်းကြောင်း အတည်ပြုနိုင်ခဲ့သည်။
အနီးနားတွင် နေထိုင်သူများ၏ ပြောကြားချက်အရ အဆောက်အအုံအတွင်းမှ မီးခိုးနှင့် မီးတောက်များ လျင်မြန်စွာ မပျံ့နှံ့မီ ကျယ်လောင်သော ပေါက်ကွဲသံ နှစ်ကြိမ်၊ သုံးကြိမ်ခန့် ကြားခဲ့ရကြောင်း သိရသည်။
အဆိုပါ ကျောင်းတိုက်သည် လွန်ခဲ့သော နှစ်ပေါင်း ၁၂၀ ကျော်က မြန်မာကုန်သည်များ လန်းပန်းမြို့တွင် သစ်လုပ်ငန်းလုပ်ကိုင်ခဲ့စဉ်က တည်ထားခဲ့သည့် ရှေးဟောင်း သမိုင်းဝင်ကျောင်းများထဲမှ တစ်ကျောင်းဖြစ်ပြီး ခရီးသွားများ စိတ်ဝင်တစား လာရောက်လေ့လာရာ နေရာတစ်ခုလည်း ဖြစ်သည်။
လက်ရှိတွင် မီးလောင်ရသည့် အကြောင်းရင်းကို အာဏာပိုင်များက စုံစမ်းစစ်ဆေးနေဆဲ ဖြစ်သည်။
Ref: Khaosod
About the Author
