သက်တံ့
၃၀ . ၁. ၂၀၂၆
ထိုင်းနိုင်ငံ၊ ဖူးခက်ပြည်နယ်၊ ပထုန်တောင်ကို ဖြတ်သန်းမောင်းနှင်နေသည့် တုတ်တုတ် သုံးဘီးဆိုင်ကယ်ပေါ်တွင် နိုင်ငံခြားသားစုံတွဲတစ်တွဲမှာ လမ်းပေါ်ရှိ အခြားယာဉ်မောင်းများကို ဂရုမစိုက်ဘဲ လူမြင်ကွင်း၌ ကာမစပ်ယှက်နေသည့် ဗီဒီယိုဖိုင်တစ်ခု ယမန်နေ့ (ဇန်နဝါရီ ၂၉ ရက်) က ထွက်ပေါ်လာခဲ့သည်။
၎င်းတို့၏နောက်မှ လိုက်ပါလာသည့် ယာဉ်မောင်းတစ်ဦးက ရိုက်ကူးထားသော အဆိုပါ ဗီဒီယိုဖိုင်ကို “Phuket Times” Facebook စာမျက်နှာတွင် ဇန်နဝါရီ ၃၀ ရက် (ယနေ့) ၌ တင်ခဲ့ရာမှတစ်ဆင့် လူမှုကွန်ရက်ပေါ်တွင် အလျင်အမြန် ပျံ့နှံ့သွားခဲ့သည်။ ဗီဒီယိုထဲတွင် ၎င်းစုံတွဲသည် မောင်းနှင်နေသည့် တုတ်တုတ်၏ နောက်ခန်းတွင် အဝတ်အစားများမပါဘဲ လိင်ဆက်ဆံနေကြသည်ကို တွေ့ရပြီး ဘေးပတ်ဝန်းကျင်ရှိ ယာဉ်ကြောနှင့် ကားများကို လုံးဝဂရုမစိုက်ကြပေ။
ထိုဖြစ်စဉ် ဖြစ်ပွားသည့်နေရာသည် ဖူးခက်မြို့လယ်နှင့် အနောက်ဘက်ကမ်းခြေကို ဆက်သွယ်ထားသည့် ကသုခရိုင်၊ ပထုန်ရပ်ကွက်ရှိ တောင်တက်လမ်းပေါ်တွင် ဖြစ်ပွားခဲ့ခြင်းဖြစ်သည်။
လူမှုကွန်ရက် အသုံးပြုသူများက အဆိုပါစုံတွဲအား ထိုင်းနိုင်ငံ၏ လူမှုယဉ်ကျေးမှုကို မလေးစားခြင်းနှင့် ဖူးခက်၏ ခရီးသွားလုပ်ငန်း ဂုဏ်သိက္ခာကို ညှိုးနွမ်းစေခြင်းတို့ကြောင့် ပြင်းပြင်းထန်ထန် ပြစ်တင်ဝေဖန်ခဲ့ကြသည်။
အဆိုပါ အပြုအမူသည် မည်သည့်ဥပဒေကို ချိုးဖောက်သနည်းနှင့် အရေးယူမှု ရှိ၊ မရှိကိုလည်း လူအများက မေးခွန်းထုတ်နေကြသည်။ Amarin TV ၏ ဖော်ပြချက်အရ လက်ရှိအချိန်အထိ ရဲတပ်ဖွဲ့ထံမှ တစ်စုံတစ်ရာ တရားဝင် တုံ့ပြန်ချက် ထွက်ပေါ်လာခြင်း မရှိသေးပေ။
ယခုလအစောပိုင်းကလည်း ဖူးခက်ရှိ ပထုန်လမ်းပေါ်တွင်ပင် နိုင်ငံခြားသား ခရီးသွားနှစ်ဦးမှာ မလျော်ကန်သော လိင်မှုကိစ္စများ ပြုလုပ်ခဲ့သဖြင့် အွန်လိုင်းတွင် ဝေဖန်မှုများ ထွက်ပေါ်ခဲ့ပြီး ထိုင်းနိုင်ငံ၏ ဗီဇာမဲ့ဝင်ရောက်ခွင့် (Visa-free) မူဝါဒအပေါ် ငြင်းခုံမှုများ ဖြစ်ပေါ်ခဲ့သည်။ ထိုဖြစ်ရပ်မှာ ဘန်ဂလာလမ်း (Bangla Road) အနီးရှိ ညဘက်ဖျော်ဖြေရေးဇုန်တွင် ဖြစ်ပွားခဲ့ခြင်းဖြစ်ပြီး အရှေ့အလယ်ပိုင်းနှင့် အနောက်နိုင်ငံသားဟု ယူဆရသည့် အမျိုးသားနှစ်ဦးမှာ အလွန်အမင်း မူးယစ်နေကာ လူမြင်ကွင်း၌ လိင်မှုကိစ္စ ပြုလုပ်နေသည့် ဗီဒီယိုဖိုင်များ ပျံ့နှံ့ခဲ့ခြင်း ဖြစ်သည်။
ယခုကဲ့သို့ နိုင်ငံခြားသား ခရီးသွားများ၏ မလျော်ကန်သော အပြုအမူများမှာ ထိုင်းနိုင်ငံ၏ ခရီးသွားကဏ္ဍအပေါ် လူထု၏ အမြင်ကို ထိခိုက်စေပြီး ခရီးသွားများအပေါ် စည်းကမ်းတင်းကျပ်ရန် လိုအပ်ကြောင်း ဝေဖန်မှုများ တိုးပွားလာစေသည်။ လက်ရှိအချိန်တွင်မူ ဖူးခက်ရဲတပ်ဖွဲ့က အဆိုပါနိုင်ငံခြားသားစုံတွဲကို ဖမ်းဆီးအရေးယူနိုင်ရန် စုံစမ်းစစ်ဆေးမှုများ လုပ်ဆောင်နေပြီဖြစ်သည်။
Ref : The Thaiger
About the Author
