MT News
၃၀. ၁၀. ၂၀၂၅
National Petroleum Laboratory & Online Monitoring Center ကို ယခု ၂၀၂၅ ခုနှစ် နှစ်ကုန်ပိုင်းတွင် အပြည့်အဝ အကောင်အထည်ဖော် ဆောင်ရွက်နိုင်ရေး ရည်မှန်းဆောင်ရွက်လျက်ရှိရာ သတ်မှတ်ချိန်အတွင်းပြီးစီးနိုင်ရေး စက်သုံးဆီတင်သွင်းသိုလှောင် သယ်ယူဖြန့်ဖြူးရောင်းချခြင်း လုပ်ငန်းများ ဆောင်ရွက်လျက်ရှိသည့် ပုဂ္ဂလိကလုပ်ငန်းရှင်နှင့် အဖွဲ့အစည်းများအနေဖြင့် ပူးပေါင်းပါဝင်ဆောင်ရွက်ပေးကြပါရန် စွမ်းအင်ဝန်ကြီးဌာနက အသိပေး ကြေညာထားသည်။
စွမ်းအင်ဝန်ကြီးဌာနသည် ပြည်တွင်းမှထုတ်ယူရရှိသည့် ရေနံစိမ်းများအား ဌာနကြီးကြပ်မှုအောက်ရှိ ရေနံချက်စက်ရုံများတွင် ချက်လုပ် ဖြန့်ဖြူးပေးလျက်ရှိသော်လည်း ပြည်တွင်းထုတ်လုပ်မှုမှာ နိုင်ငံအတွင်း လိုအပ်ချက်၏ ၃ ရာခိုင်နှုန်းခန့်သာရှိသည့်အတွက် ထပ်မံလိုအပ်သည့် စက်သုံးဆီအများစုကို နိုင်ငံခြားငွေဖြင့် ပြည်ပမှဝယ်ယူတင်သွင်းရလျက် ရှိသည်။
စွမ်းအင်ဝန်ကြီးဌာနအနေဖြင့်လည်း နိုင်ငံအတွက်လိုအပ်သည့် စက်သုံးဆီများကို ပြည်တွင်း၌ တိုးမြှင့်ထုတ်လုပ်ပေးနိုင်ရေးအတွက် ရေနံ ရှာဖွေ၊ တူးဖော်၊ ထုတ်လုပ်ခြင်းလုပ်ငန်းများအား မြှင့်တင် ဆောင်ရွက်ခြင်း၊ ရေနံချက်လုပ်ငန်းများ ဖွံ့ဖြိုးတိုးတက်လာရေး အစီအမံများ ချမှတ်၍ အပိုင်းလိုက် အကောင်အထည်ဖော်ခြင်းများ ဆောင်ရွက်လျက်ရှိသည်။
ယင်းသို့ ဆောင်ရွက်နေသည့်ကာလများအတွင်း စက်သုံးဆီများကို ပြည်ပမှ ဝယ်ယူတင်သွင်း အသုံးပြုရာ၌ အများပြည်သူသို့ သက်သာသောဈေးနှုန်းဖြင့် ဖြန့်ဖြူးနိုင်ရန် နိုင်ငံတော်မှရာခိုင်နှုန်းတစ်ခု စိုက်ထုတ်ကျခံဆောင်ရွက်ပေးလျက်ရှိသည့်အတွက် မြန်မာနိုင်ငံတွင် ရောင်းချလျက်ရှိသည့် စက်သုံးဆီဈေးနှုန်းများသည် ဒေသတွင်း အာဆီယံ နိုင်ငံများနှင့်နှိုင်းယှဉ်ပါက အထိုက်အလျောက်သက်သာမှု ရှိသည်ကို တွေ့မြင်နိုင်သည်။
စွမ်းအင်ဝန်ကြီးဌာနအနေဖြင့် နိုင်ငံတော်မှ ပြည်သူလူထုသက်သာ ချောင်ချိရေးအတွက် စိုက်ထုတ်ဆောင်ရွက်ပေးမှုများအား ပြည်သူ လူထုမှ အမှန်တကယ် အကျိုးခံစားခွင့်ရရှိစေရေး၊ ဈေးကွက်အတွင်း ဖြန့်ဖြူးလျက်ရှိသည့် စက်သုံးဆီများ၏အရည်အသွေးနှင့်အခြင်အတွယ် ပြည့်မီမှန်ကန်စေရေး၊ နိုင်ငံတော်အတွက် ရသင့်ရထိုက်သည့် အခွန် အခများ အပြည့်အဝ ကောက်ခံရရှိရေးနှင့် နိုင်ငံတော်၏ စွမ်းအင်လုံခြုံရေး အာမခံချက်ရှိစေရေးတို့အတွက် ကြီးကြပ်ရန်တာဝန်ရှိသည့် ဝန်ကြီးဌာနတစ်ခုဖြစ်သည်။
သို့ဖြစ်ရာ ရေနံထွက်ပစ္စည်းဆိုင်ရာ ဖြည့်ဆည်းမှုကွင်းဆက် (Petroleum Products Supply Chain) အတွင်း စက်သုံးဆီတင်သွင်းမှု သိုလှောင်မှုနှင့် သယ်ယူပို့ဆောင်မှုမှသည် End User များသို့ ဖြန့်ဖြူးမှု အခြေအနေများအား လေ့လာစောင့်ကြည့် ထိန်းသိမ်းနိုင်ရေး၊ ရေနံထွက်ပစ္စည်းများ အရည်အသွေးပြည့်မီမှန်ကန်မှုရှိမရှိ စစ်ဆေးဆောင်ရွက်နိုင် ရေးနှင့် တိုင်းဒေသကြီးနှင့် ပြည်နယ်များအလိုက် စက်သုံးဆီ ဖူလုံမှုရှိစေရေး သိုလှောင်ထားရှိမှု (Stockpiling) အခြေအနေများအား အချိန်နှင့် တစ်ပြေးညီ (Real Time) စစ်ဆေးကြပ်မတ်ဆောင်ရွက်နိုင်ရေးအတွက် National Petroleum Laboratory & Online Monitoring Center ကို ပြည်ထောင်စုနယ်မြေ၊ နေပြည်တော်ရှိစွမ်းအင်ဝန်ကြီးဌာန၌ ၂၀၂၂-၂၀၂၃ ဘဏ္ဍာရေးနှစ်မှ စတင်အကောင်အထည်ဖော် ဆောင်ရွက် လျက်ရှိသည်။
ယင်းသို့အကောင်အထည်ဖော် ဆောင်ရွက်ရာ၌ သက်ဆိုင်ရာ ပုဂ္ဂလိကလုပ်ငန်းရှင်နှင့် အဖွဲ့အစည်းများအတွက် အကျပ်အတည်း မဖြစ်စေရန် စီမံကိန်းအား အဆင့်လိုက် အကောင်အထည်ဖော် လိုက်ပါ ဆောင်ရွက်စေခြင်း၊ အချို့ကိစ္စရပ်များအား ဖြေလျှော့ပေးခြင်းများကို လည်း ဆောင်ရွက်ပေးခဲ့ပြီးဖြစ်သည်။
ယခုအခါ စွမ်းအင်ဝန်ကြီးဌာနအနေဖြင့် အဆိုပါ National Petroleum Laboratory & Online Monitoring Center ကို ၂၀၂၅ ခုနှစ် နှစ်ကုန်ပိုင်းတွင် အပြည့်အဝ အကောင်အထည်ဖော် ဆောင်ရွက် နိုင်ရေး ရည်မှန်းဆောင်ရွက်လျက်ရှိရာ သတ်မှတ်ချိန်အတွင်းပြီးစီး နိုင်ရေး စက်သုံးဆီတင်သွင်းသိုလှောင် သယ်ယူဖြန့်ဖြူးရောင်းချခြင်း လုပ်ငန်းများ ဆောင်ရွက်လျက်ရှိသည့် ပုဂ္ဂလိကလုပ်ငန်းရှင်နှင့် အဖွဲ့ အစည်းများအနေဖြင့် ပူးပေါင်းပါဝင်ဆောင်ရွက်ပေးကြပါရန် အသိပေး ကြေညာအပ်သည်ဟု စွမ်းအင်ဝန်ကြီးဌာနက အသိပေးထားသည်။
About the Author
