မလေးရှားနိုင်ငံတွင် မွတ်စလင်ကော်မတီဥက္ကဋ္ဌလုပ်နေပြီး လွန်ခဲ့သည့်နှစ်နစ်ကျော်က ပြန်ပေးဆွဲခံရသည် အကြောင်းပြကာ ပျောက်ဆုံးနေသော သူဇာမောင်တို့ မိသားစုငါးဦးစလုံး မြန်မာနိုင်ငံအတွင်းသို့ ပြန်လည်ခိုးဝင်လာစဥ် ဖမ်းမိ

သတိုး
၁၇. ၁၀. ၂၀၂၅

မလေးရှားနိုင်ငံ၌ မြန်မာမွတ်စလင်ဒုက္ခသည်များကော်မတီ (Myanmar Muslim Refugee Community-MMRC) ကို ဖွဲ့စည်းပြီး ဥက္ကဋ္ဌအဖြစ်ဆောင်ရွက်ကာ ယင်းအဖွဲ့အစည်းမှ ရရှိသောငွေကြေးအကျိုးအမြတ်များဖြင့် NUG အပါအဝင် အကြမ်းဖက်များကို ထောက်ပံ့နေသော သူဇာမောင်တို့ မိသားစုမှာ မြန်မာနိုင်ငံအတွင်း ပြန်လည်ခိုးဝင်လာစဥ် ဖမ်းဆီးရမိခဲ့ကြောင်း ယခုည သတင်းထုတ်ပြန်သည်။

မလေးရှားနိုင်ငံ၊ ကွာလာလမ်ပူမြို့တွင် ရောက်ရှိနေထိုင်သည့် သူဇာမောင် (ခ) Rashidah Binti Abdul Azeez သည် မလေးရှားနိုင်ငံ၌ မြန်မာမွတ်စလင်ဒုက္ခသည်များကော်မတီ (Myanmar Muslim Refugee Community-MMRC) ကို ဖွဲ့စည်းပြီး ဥက္ကဋ္ဌအဖြစ်ဆောင်ရွက်ကာ ယင်းအဖွဲ့အစည်းမှ ရရှိသောငွေကြေးအကျိုးအမြတ်များဖြင့် အကြမ်းဖက်အုပ်စုဖြစ်သည့် NUG အဖွဲ့ကို ငွေကြေးထောက်ပံ့ခြင်း၊ NUG အဖွဲ့အတွက် ရန်ပုံငွေရှာဖွေပေးခြင်းများပြုလုပ်ခဲ့သဖြင့် ၎င်းကိုမြစ်သားမြို့နယ်၊ မြစ်သားမြို့မရဲစခန်း၌ (ပ)၁၄၀/၂၀၂၂၊ အကြမ်းဖက်မှုတိုက်ဖျက်ရေးဥပဒေပုဒ်မ ၅၂(က)ဖြင့် အမှုဖွင့်ပြီး မြစ်သားမြို့နယ်တရားရုံးသို့ ယင်းဥပဒေပုဒ်မ ၅၂(က)/ရာဇဝတ်ကျင့်ထုံးဥပဒေပုဒ်မ ၅၁၂ ဖြင့် တရားစွဲဆိုခဲ့ရာ မြို့နယ်တရားရုံးက ရာဇဝတ်အထွေထွေမှုအမှတ် ၉/၂၀၂၃ ဖြင့် လက်ခံစစ်ဆေးပြီး ၃၁-၁-၂၀၂၃ ရက်နေ့တွင် ဖမ်းဝရမ်းထုတ်ဆင့်ခဲ့သည်။

ယခုအခါ သူဇာမောင်၊ ၎င်း၏ခင်ပွန်း စောသန်းတင်ဝင်းနှင့် သားသမီး ၃ ဦးတို့သည် မြန်မာနိုင်ငံအတွင်း တရားမဝင်ပြန်လည်ဝင်ရောက်လာစဉ် ဖမ်းဆီးရမိသဖြင့် စစ်ဆေးဖော်ထုတ်ချက်အရ သူဇာမောင်သည် MMRC အဖွဲ့ကို ဖွဲ့စည်းပြီး UNHCR နှင့် NGO/INGO အဖွဲ့အစည်းများထံမှ အထောက်အပံ့များရရှိရန် ဆောင်ရွက်၍ ရရှိသောအထောက်အပံ့များကို တရားမဝင်ရွှေ့ပြောင်း လုပ်သားများအား MMRC အဖွဲ့မှ ထောက်ပံ့ကြောင်းလိမ်လည်ကာ အဖွဲ့ဝင်များဖြစ်အောင် စည်းရုံးခြင်း၊ အကြောင်းမျိုးမျိုးဖြင့် တရားမဝင်ရောက်ရှိလာသူများကို UNHCR ၏ ဒုက္ခသည်အသိအမှတ်ပြု လက်မှတ်ရရှိအောင် ဆောင်ရွက်ပေးခြင်းဖြင့် ရရှိသည့်ငွေကြေးအကျိုးအမြတ်များဖြင့် ၎င်း၏ မိသားစုအကျိုးစီးပွားပြုလုပ်ခြင်း၊ အကြမ်းဖက်အုပ်စုဖြစ်သည့် NUG နှင့် ယင်း၏လက်အောက်ခံများကို ငွေကြေးလှူဒါန်းခြင်း၊ ရန်ပုံငွေရှာဖွေပံ့ပိုးခြင်းများပြုလုပ်ကြောင်း တွေ့ရှိရသည့်အတွက် ၎င်းတို့ကို ဥပဒေနှင့်အညီ ဆက်လက်အရေးယူဆောင်ရွက်သွားမည်ဖြစ်ကြောင်း ထုတ်ပြန်ထားသည်။

ထိုသို့ ပြည်ပနိုင်ငံတွင်နေထိုင်ပြီး NUG နှင့် အကြမ်းဖက်အဖွဲ့အစည်းများကို ငွေကြေးထောက်ပံ့နေသည့် သူဇာမောင်တို့ မိသားစုငါးဦးမှာ ပြီးခဲ့သည့် ၂၀၂၃ ခုနှစ် ဇူလိုင်လ ၄ ရက်နေ့တွင် ကွာလာလမ်ပူမြို့၌ လူတစ်စုက ဖမ်းဆီး ပြန်ပေးဆွဲခံရသည်ဆိုကာ ခြေရာပျောက်သွားကြသူများဖြစ်သည်။ ယင်းတို့မိသားစုငါးဦးပျောက်ဆုံးမှုကို မလေးရှားအစိုးရက ရှာဖွေပေးရန် HRW ကလည်း တောင်းဆိုခဲ့ဖူးသလို ယင်းတို့မိသားစုမှာ နှစ်နစ်ကျော်ခန့် ခြေရာပျောက်နေခဲ့ပြီးမှ ယခုအချိန် မြန်မာနိုင်ငံသို့ ခိုးဝင်လာချိန် ဖမ်းမိခဲ့ခြင်းဖြစ်သည်။