၅.၁၀.၂၀၂၅
Written by KL
ရှမ်းပြည်နယ်( အရှေ့ပိုင်း)၊ တာချီလိတ်မြို့နယ်၊အခြေခံပညာအထက်တန်းကျောင်း (တာချီလိတ်)အနီးလမ်းဆုံတွင် ယနေ့ အောက်တိုဘာလ ၅ ရက်၊ နံနက် ၁၁ နာရီခွဲခန့်က မော်တော်ယာဥ်တစ်စီး အရှိန်မထိန်းနိုင်ဘဲ ဆိုင်ကယ်သုံးစီးနှင့် ကားတစ်စီးကို ဆင့်တိုက်ရာမှ နှစ်ဦးသေဆုံးခဲ့ပြီး လေးဦး ထိခိုက်ဒဏ်ရာရရှိခဲ့ကြောင်း ဒေသခံများထံမှ သိရသည်။
“လမ်းဘေးမှာရှိတဲ့လူတွေနဲ့ ရပ်ထားတဲ့ဆိုင်ကယ်တွေကိုအရှိန်ပြင်းပြင်းနဲ့ဝင်တိုက်သွားတာ။ တိုက်တဲ့လူနှစ်ယောက်ကိုလည်း ဝိုင်းဖမ်းလို့ ချက်ချင်းမိတယ်”ဟု တာချီလိတ်ဒေသခံတစ်ဦးက ပြောသည်။
ဖြစ်စဥ်တွင် တာချီလိတ်မြို့နယ် ရှမ်းရိုးမမီးပွိုင့်ဘက်မှ မြန်မာ-ထိုင်းအမှတ်(၁) ချစ်ကြည်ရေးတံတားဘက်သို့ အသက် ၄၈ နှစ်အရွယ်အမျိုးသားတစ်ဦး မောင်းနှင်ပြီး ထိုင်းနိုင်ငံသားတစ်ဦးလိုက်ပါလာသော Ford Raptor အနက်ရောင် အမျိုးအစား မော်တော်ယာဉ်မှာ ဆိုင်ကယ် ၁ စီးကို ဦးစွာတိုက်မိပြီး ထပ်မံမောင်းလာစဥ်အခြေခံပညာ အထက်တန်း ကျောင်း (တာချီလိတ်)အနီးလမ်းဆုံတွင် ဆိုင်ကယ် ၂ စီးနှင့် HONDA FIT အဖြူရောင် မော်တော်ယာဉ်တို့ကို ထပ်မံတိုက်မိခဲ့ကြောင်း သိရသည်။
ယာဥ်တိုက်မှုကြောင့် တစ်နှစ်အရွယ် ကလေးငယ်တစ်ဦးနှင့် ၎င်း၏မိခင်တို့မှာ သေဆုံးခဲ့ပြီး အသက် ၁၀ နှစ်ကျော် ကလေးငယ်တစ်ဦး၊ အမျိုးသားတစ်ဦး၊ အမျိုးသမီးတစ်ဦးနှင့် အဘွားအိုတစ်ဦးတို့မှာ ထိခိုက်ဒဏ်ရာရှိခဲ့ရာ လူနာနှစ်ဦးမှာ အသက်အန္တရာယ် စိုးရိမ်ရကြောင်း သိရသည်။
သေဆုံးသူနှင့် ဒဏ်ရာရရှိသူများကို တာချီလိတ်ပြည်သူ့ဆေးရုံသို့ ဦးလှမိုး (တာချီလိတ်)လူမှုကူညီရေးအသင်းက ပို့ဆောင်ကူညီပေးခဲ့သည်။
About the Author
