ထိုင်းနိုင်ငံတွင် ခိုလှုံနေသော ဒုက္ခသည်စခန်း ၉ ခုမှ မြန်မာဒုက္ခသည် ၄၂၀၀၀ ခန့်ကို စတင်အလုပ်လုပ်ခွင့်ပြုရန် ထိုင်းအစိုးရဆုံးဖြတ်

၂၇. ၈. ၂၀၂၅
Translated by Thettant

ဩဂုတ်လ ၂၆ ရက်နေ့က ကျင်းပသည့် ထိုင်းအစိုးရအဖွဲ့ အစည်းအဝေးက မြန်မာနိုင်ငံမှ ပဋိပက္ခများကြောင့် ထွက်ပြေးလာသည့် ဒုက္ခသည်များအတွက် ယာယီခိုလှုံရာနေရာများတွင် နေထိုင်သူ မြန်မာနိုင်ငံသားများအား အလုပ်အကိုင်စီမံခန့်ခွဲရေး လမ်းညွှန်ချက်များကို အတည်ပြုခဲ့သည်။

ယင်းသည် အလုပ်သမားရှားပါးမှုကို ဖြေရှင်းရန်နှင့် နိုင်ငံ၏စီးပွားရေးကို တွန်းအားပေးရန် ရည်ရွယ်သည်။

အလုပ်သမားဝန်ကြီး Phongkwin Chungruangkit က ဤချဉ်းကပ်မှုသည် မယ်ဟောင်ဆောင်၊ တာ့ခ်၊ ကန်ချနာပူရီနှင့် ရတ်ချပူရီ ပြည်နယ် ၄ ခုရှိ မြန်မာနိုင်ငံမှ ပဋိပက္ခဒုက္ခသည်များအတွက် ယာယီခိုလှုံရာနေရာ ၉ ခုလုံးတွင် နေထိုင်သူများအား သက်သာရာရစေကြောင်း ပြောကြားခဲ့သည်။

ဤပုဂ္ဂိုလ်များသည် ပြည်နယ်အုပ်ချုပ်ရေးဦးစီးဌာနမှ မှတ်ပုံတင်ပြီးဖြစ်ကာ အလုပ်အကိုင်ရည်ရွယ်ချက်အတွက် ထိုင်းနိုင်ငံတွင် ခွင့်ပြုမိန့်အမိန့်ထုတ်ပြန်သည့်နေ့မှစ၍ အများဆုံး ၁ နှစ်အထိ နေထိုင်ခွင့် အထူးခွင့်ပြုချက်ရရှိမည်ဖြစ်သည်။

အလုပ်လုပ်ကိုင်ခွင့်ရရှိလာသည့် မြန်မာနိုင်ငံသားများသည် ထိန်းချုပ်ထားသော ဧရိယာမှ ထွက်ခွာခွင့်လျှောက်ထားပြီး အလုပ်လုပ်ခွင့်လျှောက်လွှာများ တင်ပြရမည်ဖြစ်ပြီး ခွင့်ပြုချက်ရရှိထားသော မြန်မာနိုင်ငံသားများသည် နိုင်ငံခြားအလုပ်သမားများအတွက် တားမြစ်ထားခြင်းမရှိသည့် လုပ်ငန်းကဏ္ဍအားလုံးတွင် အလုပ်လုပ်ကိုင်နိုင်သည်။ ထို့အတူ အလုပ်သမားရေးရာဦးစီးဌာန (DOE) ၏ နိုင်ငံခြားအလုပ်သမားများ ငှားရမ်းခြင်းဆိုင်ရာ အခြေအနေများကြေညာချက်အရ အလုပ်သမားနှင့် လက်လီရောင်းချမှုဆိုင်ရာ ရာထူးများအတွက် အလုပ်ရှင်များနှင့်အတူ အရည်အချင်းပြည့်မီစေမည်ဖြစ်သည်။

အလုပ်သမားရေးရာဦးစီးဌာန ညွှန်ကြားရေးမှူးချုပ် Somchai Morakot Sriwan က ထိုင်းနိုင်ငံရှိ ဒုက္ခသည်စခန်း ၉ ခုတွင် မြန်မာနိုင်ငံသားဒုက္ခသည် ၄၂,၀၀၀ ခန့် နေထိုင်နေကြောင်း ပြောကြားခဲ့သည်။

အလုပ်လုပ်လိုသူများသည် လျှောက်လွှာနှစ်ခု တင်ပြရမည်ဖြစ်ရာ ၎င်းတို့မှာ ထိန်းချုပ်ဧရိယာမှ ထွက်ခွာခွင့်နှင့် အလုပ်လုပ်ခွင့်လျှောက်လွှာတို့ဖြစ်သည်။ လျှောက်ထားသူများသည် ပြည်သူ့ကျန်းမာရေးဝန်ကြီးဌာနနှင့်အတူ နိုင်ငံခြားအလုပ်သမားကျန်းမာရေးအာမခံ အထောက်အထားအပါအဝင် လိုအပ်သောစာရွက်စာတမ်းများကို တင်ပြရမည်ဖြစ်သည်။

အလုပ်သမားများသည် ဥပဒေအရ လိုအပ်သည့် ပုံမှန်လျှောက်လွှာနှင့် အလုပ်လုပ်ခွင့်ကြေးများကိုလည်း ပေးဆောင်ရမည်ဖြစ်သည်။ သို့သော်လည်း ပထမဆုံးအကြိမ် အလုပ်လုပ်ခွင့်လျှောက်ထားခြင်းအတွက်မူ အလုပ်သမားများ၏ ငွေကြေးဝန်ထုပ်ဝန်ပိုးကို လျှော့ချနိုင်ရန် အလုပ်လုပ်ခွင့်ကြေးမှ ကင်းလွတ်ခွင့်ပြုမည်ဖြစ်သည်။

ထိုင်းနိုင်ငံတွင် ယခင်က မြန်မာဒုက္ခသည်များအား ဒုက္ခသည်စခန်း အပြင်ဘက် အလုပ်လုပ်ခွင့်ပြုမထားဘဲ ယခု ခွင့်ပြုခြင်းမှာ နှစ်နိုင်ငံစစ်ပွဲကြောင့် နေရပ်ပြန် ကမ္ဘောဒီးယားလုပ်သားများနေရာ အစားထိုးရန်၊ အလုပ်သမားရှားပါးမှု ဖြေရှင်းရန်၊ ကျဆင်း စီးပွားရေး တွန်းအားပေးရန်နှင့် အလုပ်လက်မဲ့မှုမှ ဖြစ်ပွားလာသော ခိုးဆိုးလုနှိုက်ကင်းဝေးပြီး လူမှုပတ်ဝန်းကျင် တည်ငြိမ်စေရန် စသည့် ရည်ရွယ်ချက်များဖြင့် ခွင့်ပြုပေးခဲ့ခြင်းဖြစ်သည်။

Ref, Khaosod